মপোক থৌরম পাঙথোকপগা লোয়ননা লাইরিকশিং ফোঙখ্রে
ইম্ফাল, জুলাই ২৫ : নিঙোল খুৎ মণিপুর, ৱাংজিং শাফোঙলকপগী ৪রক শুবা মপোক নুমীৎ থৌরম ঙসি খোরিরোল শঙলেন ৱাংজিংদা পাঙথোকখ্রে। থৌরম অদুদা সাহিত্য একাদেমী নিউ দিল্লীগী মণিপুরী লোলগী এদভাইজরি বোর্দকী কনভিনর নোংমাইথেম কিরনকুমারনা অথোইবা মীথুং, নিঙোল খুৎ মণিপুরগী পাউতাক্লোই য়েংখোম ইন্দিরানা থৌরম মপু, মণিপুরী সাহিত্য পরিষদ থৌবাল দিষ্ট্রিক্ট মশাগী প্রেসিডেন্ট মোইরাংথেম রাজেন্দ্র, খোরিরোল শন্দোকরূপ ৱাংজিংগী প্রেসিদেন্ট তোংব্রম বাবুলাল, হৈরোক্তগী সোসল ৱার্কর থোকচোম প্রেমজিৎ অমসুং ‘নিঙোল মপাও’ গী পাব্লিসার রাকেশ নাওরেমনা অখন্নবা মীথুংশিং ওইনা শরুক য়াখি।
থৌরম অদুগী ৱাহৌদোক পীরদুনা নিঙোল খুৎ মণিপুর ৱাংজিংগী সেক্রেটারী হৈখাম চাওবনা হায়, নিঙোল খুৎ মণিপুর অসি লমদম অসিগী খোরিরোলগী লমদা শাফোঙবা কুইদ্রিবা নুপীশিংতগী ওইবা খোরিরোলগী লূপ অমনি। লূফ অসি লমদম অসিগী খোরিরোলদা থৱায় য়াওজবা নুপী অইবীশিংনা পুনশিল্লগা শেমজবনি, মণিপুরদা নুপীশিংগী ওইবা খোরিরোলগী লূপ অসি য়াম্না তাঙনা লৈরি। ঙসিদি খোরিরোলবু পামজবা অইবী কয়া ৱাংজিং, হৈরোক অমসুং নক্নবদা লৈরিবা খুঙ্গংশিংদগী থৌনা ফনা চোংথোরক্লে। অসিগুম্বা কয়া অসিনা মরম ওইরগা লূপ অসি শাফোঙলকখিবনি। মীয়াম্না মতেং পাংবীয়ু, নুপী অইবীশিংবু পূক্নিং থৌগৎপীয়ু হায়খি।
ঙসি পাঙথোকখিবা মপোক থৌরমগী মনুং চন্না ফোঙখিবা লাইরিকশিং অদুদি হৈখাম চাওবনা এদিটর ওইবা নিঙোল খুৎকী খোমজিনবা ৱারীমচা লাইরিক অসিদা লূপ অসিগী অইবী ২৪গী তোঙান তোঙানবা ৱারীমচা ২৪ য়াওরি। লাইরিক অসি লূপকী ৫ শুবা লাইরিকনি। সনসম ভোরোতনা নিঙোল খুৎ মণিপুর ৱাংজিংগীদমক ফোঙবনি। অনীশুবদা হৈরোক্তগী অইবী থোকচোম নিঙোল খুন্দোংবম ওংবী গুনমনি লৈমনা ইবা নুংশিবী ঐগী খুঙ্গং হায়না মিংথোনবা অইবীগী পোক্নফম লমদম হৈরোক্কী মরমদা ইবা লাইরিকনি।
অইবী অসিগী মঙাশুবা লাইরিক অসি নিঙোল খুৎ মণিপুর ৱাংজিংনা ফোঙবনি। অহুমশুবা ফোঙখিবা লাইরিক অদুনা নিঙোল খুৎ মণিপুর ৱাংজিংগী অইবী ২৩গী খোমজিনবা শৈরেংগী লাইরিকনি। লাইরিক অসি তেন্থাদগী রাকেশ নাওরেমনা নিঙোল খুৎ মণিপুর ৱাংজিংগীদমক ফোঙলগা হৈখাম চাওনবা এদিটর ওইবনি। থৌরমগী শরুক অমা ওইনা নিঙোল খুৎ মণিপুর ৱাংজিংগী পাউতাক্লোই য়েংখোম ইন্দিরানা শৈদিন মপু ওইরগা শৈরেং শৈদিন্নবা অমসু পাঙথোকখি।
সোর্স: হুইয়েন লানপাউ
- ট্যাগ:
- ফেসবুক
- Manipur
- Manipuri
- Meitei
- Lairik Fongba
0 কমেন্ট:
কমেন্ট তৌবিয়ু