মনিপুর স্তেট কলা একাডেমি এৱার্দ ২০২০ ফংলবী নহা আর্টিস ৱারিবম নেলোপল দেবী — তোংব্রম অমরজিৎ
মনিপুর লৈঙাক্কী ওইনা আর্ত এন্দ কলচরগী মখাদা লৈবা মনিপুর স্তেট কলা একাদেমিনা তোঙান তোঙানবা হীরমশিংদা মরু ওইনা আর্ত অমসুং কলচরদা থোইদোক হেন্দোকনা থবক তৌরিবা মীওইশিংদা পিদুনা লাকপা এৱার্দশিংগী মরক্তা অমা ওইরিবা লেমজনিংঙাই ওইরবা(২০১৮-২০২০) মনিপুর স্তেট কলা একাদেমি এৱার্দ, ২০২০(লাই য়েকপদা) নেলোপলনা য়েকপা “সাইওন” হায়না মিংথোনবা আর্ট ৱার্ক অসিদা পিনবা মিং লাওথোকখিবা অসিনি। লেমজনিংঙাই ওইরবা মনা অসিনা হেন্না পুকনিং থৌগৎপা ওইদুনা মখা তানা ফজরবা কলাগী পোত্থোক কয়া লেপ্তনা পুথোক্লক্কনি খল্লি।
ৱারিবম নেলোপল দেবী
নীংশিংবা থোক্ত্রবা মতমদগী হৌনা মালেমগী মফম কয়াদা ফিশা-লোনশা তৌবা, ইমুং মনুংগী কুপ্নোম, মচা মশু শেম্বা, লৌ ইংখোল শুবা অসিদগী হেন্দোক্তুনা লৈবাক খুনাইগী থবক থৌরমশিংদা নুপী ওইবীশিংনা চাওরবা থৌদাং কয়া লৌদুনা লাকপগী ৱারী কয়া লৈরি। হৌজিকসু হীরম কয়াদা নুপীশিংনা নুপাদগী তাদনা মশক থোকপা থবক কয়াসু পাঙথোক্লি। হৌজীক্তি নুপীনা ফাইটর জেট ফাওবা থৌরক্লি। লৈবাক অমগী প্রসিদেণ্ট, প্রাইম মিনিস্তর ফাওবা ওইরক্লি। নুপীনা লাই য়েকপা শাবসু পুকনিং থৌগৎনবা হেল্লকলি। মনিপুরদসু হৌখিবা চহী খরসিদা নুপী লাই য়েকপা শাবা থোকলকলি। মসিমক য়াম্না পুকনিং থৌগৎনিংঙাইনি।
ৱারিবম নেলোপল দেবী ইম্ফাল ইস্তকি মনুং চন্না লৈবা লাইফম খুনৌ মমাং লৈকাই, লাইফম সিফাইদা লৈবা ৱারিবম শামু সিংহ অমসুং ৱারিবম ওংবী ডাশুমতি দেবী অনীগী মচা নিংঙোল ওইনা ইং ১৯৯৩গী ওক্তোবর ২৪দা পোকখি। মচিল মনাও মঙা পোকপগী মনুংদা মহাকনা নুপীদা মরিশুবী ওইনা তাইবং খোঙদারকখি। ভাইরোদান হিন্দি হায়স্কুলদ্গী ২০০৯দা ক্লাস তেন পাস তৌখি। হায়র সেকেন্দরিনা বিরমঙ্গল কলেজ সাওম্বুংদগী পাস তৌখি। লাই য়েকপা হায়বা হীরম অসিদা য়াম্না অঙাং ওইরিঙৈদগী পামজদুনা লাকখি। পুকনিং থম্মোয়না পামজবা হীরমদা মহৈ মসিন মখা তানা তমথদুনা খঙনিংলিবা অমদি হৈনিংলিবা আর্তকি মহৈ তম্বা ফংলগনি খনবদা য়াম্না হরাওজখি। ইমুংগী মীওইশিংনসু পুকনিং য়াম্না থৌগৎখি। মরু ওইনা অপোকপা শামুনা মচা নুপীবু কদায়দা করি শোয়খিগদগে হায়না চেকশিন্না শেন্নজদুনা লাকখি। অপোকপী পলেম মমা ডাশুমতিসু অদুমঙাই মচা নীংঙোলগী অনীংবা অপাম্বা খুদিং থুংজনবা মতম খুদিং পুকনিং থৌগত্তুনা লাকখি। মসিমকনা ইম্ফাল আর্ট কলেজদা বচেলর ওফ ফাইন আর্ট ২০১৬দা পাস তৌখি। হোৎনবা লেপ্তবা অমদি তন্দবা অসিনা মরম ওইদুনা স্কুল তমলিঙৈ মতমদা পেন্তিং কম্পিতিসনশিংদা শরুক য়াদুনা লাকখি। মনা মথুমশিং ফংলকখি। বি এফ এ লোয়রবা মতুংদা মখা তানা এম এফ এ তম্নিংনা তম্বদি ফংখিদে অদুবু লাইবক ফবদগী ২০১৯দগী হৌদুনা অহানবা ওইনা মনিপুর য়ুনিভর্সিতিদা হাংলিবা দিপার্তমেণ্ট ওফ ফাইন আর্টসতা এদমিসন ফংদুনা অহানবা বেচট ওইনা মহাকনা পামজরিবা অমদি নিংজরিবা এম এফ এ (গ্রাফিক্স) তম্বা ফংখি। থৱায় য়াওবা অমসুং কন্না হোৎনবগী মহৈসু ফংখি। দিপার্টমেন্ট অসিগী অহানবা বেচটকী নেলোপলনা অহানবা পোজিসনসু লৌখি। গোল্ড মেদাল্লিস্ট হায়বদু ফংখি। কয়াদি হরাওজরমগনি মহাকপু পোকচরিবা পলেম পন্থৌ ওইরিবা ৱারিবম শামু অমদি ৱারিবম ওংবী দাশুমতি অনীনা মচা নিংঙোল নেলোপলনা গোল্ড মেদল ফংলকপদা অদুসু লাই য়েকপগী এম এফ এগী পরিক্ষাদা। নেলোপলগা উনদুনা ৱারী ঙাইহাক শাবদা হায়রকখি, মহাক এম এফ এ তম্বা ফংলরোইদ্রা হায়না য়াম্না নুংঙাইজদবা অমদি পুকনিং ৱাখল শোন্থরুখি। মরমদি ইম্ফাল আর্ত কলেজদা বি এফ এ তম্বা লোয়রগা মখা তানা হায়র স্তদিস তমনিংলবসু মনিপুরগী মপান্দা চৎতুনা তম্বগী খুদোংচাবা কয়া ফংদবা মরম্না চৎপা ফংখিদে। অদুবু মনিপুর য়ুনিভর্সিতিদা ফাইন আর্তস দিপার্টমেন্ট হাংবীরক্তুনা মহাকনা মংজরম্লিবা মঙলান্দ অদুদি মঙফাওনবা ঙম্লে। লাই য়েকপা শাবা হায়বসি অঙনবা মতমদা মনিপুরদা নুপীনা কয়া তৌনরমদে। লাই য়েকপা ফাওবা শোয়বদা ফত্তে হায়বা থাজনবী অমনা মরম ওইদুনা খ্বাইদগী অথোইবা কলা অমা ওইরিবা ফাইন আর্তস অসিদা হৈথোই শিংথোইরবা নহারোলশিংনা মায়পুননা চংশিনবদা খুরৌ থাংলম্মি মতম অমদা। তৌইগুম্বসুং হৌজীক মতমদদি অসিগুম্বা মিৎয়েং অসিদগী লাপথোকলক্তুনা হৌরক্লিবা নহারোল কয়া লাই য়েকপা শাবা অমদি মসিগা মরি লৈনবা হীরম কয়াদা মলেমসিদা লৈরিবা মীওইশিংদগী তাদনা ফজরবা অমদি পুকনিং হুনিংঙাই ওইরবা আর্ত ৱার্ক কয়া পুথোকপা হৌরক্লি। মলেমগী থাক্তা পাঙথোকপা আর্ত একজিবিসনশিংদা, নেস্নেল লেভেল্গী একজিবিসন অমসুং আর্ত ফ্যিয়রদা লমদম অসিগী নহা ওইরিবা আর্টিসশিংসু লেপ্তনা শরুক য়ানরক্লি। লৈবাক অসিগী মমিং লৈরবা আর্ত গেল্লরিশিংদা লমদম অসিগী আর্টিসশিংনা য়েকপা অমসুং আর্ত ৱার্কশিং থেৎতুনা থম্নরক্লি। অমসুং মহৈরোইশিং অমদি মীয়াম্না শোন্নরিবা আর্ত ইন্সতিত্যুসনশিংদা মনিপুরদগী হৌখিবা আর্টিসশিংনা ওজা ওইবা কয়া লৈরি। মসিমক মনিপুর পুম্নমক্কি মায় ওইজরিবনি। মখোয়না মনিপুরবু মলেমদা মশক তাক্লি।
য়াম্না নহা ওইরিবী তুংগী আশা কয়াসু লৈরিবী আর্তিস ৱারিবম নেলোপল দেবী হৌজীক ফাওবদা আর্ত একজিবিসন অমসুং আর্ত ৱার্কশোপ ১৪ হেন্না শরুক য়াখিবা লৈরে। খরদং পল্লবদা, সাস্কার ভারতি মনিপুর আর্ত ৱার্কশোপ, ২০১২; ইন্তরনেস্নেল ইম্ফাল আর্ত কেম্প, ২০১৭; মনিপুর স্তেট কলা একাডেমিনা ই জেদ সিসিগী মখাদা শিনবা ৱার্কশোপ ওন মলতিমেদিয়া, ২০১৯; ৬শুবা মাহারাজকুমার প্রিয়োব্রাতা মেমোরিএল আর্ত একজিবিসন অমসুং আর্তস সোসাইতি মনিপুর এন্ন্যুএল আর্ত একজিবিসন, ২০২০; ললিট কলা একাদেমি, ন্যুউ দেল্লিনা শিনবা প্রিন্ট বাইনিএল ইন্দিয়া, ২০২০; আর্ত সোসাইতি মনিপুরনা শিনবা অহানবা নুপী আর্তিসশিংগী ৱার্কশোপ অমদি একজিবিসন, ২০২১; লোক্তাক ফোকলোর ম্যুজিয়ম্না শিনবা অহানবা কলেন আর্ত একজিবিসন, ২০২১ অসিনচিংবা আর্ত একজিবিসনশিংদা লেপ্তনা শরুক য়াদুনা লাক্লি।
নেলোপল, অঙাং ওইরিঙৈদগী হৌনা লাইধি শাবা অসিসু পামজদুনা লাকখি। মরমদি নেলোপলগী মদোমচা সোইবম বির্লা লাইধী শাবদা মমিং লৈরবী লমদম অসিগী খুৎহৈবীশিংগী মরক্তা মহাকসু অমনি অদুনা অঙাং ওইনা য়াম্না পামজনা য়েংখি অমসুং মদোমচানা শাবা লাইধী অদুদা মহাকসু য়াওশিন্দুনা অদুমক ফজনা শেম শাবা হৌরকখি। মসিমকনা মহাকনা ফাইন আর্তস তম্বদা প্রিন্ট মেকিংদা হেন্না খুদোংচাবা অমদি খুলোইবসু হেনগৎলকখি। তমজরুবা মহৈগী মহৈ ফংবা হৌরকখি। মিনিস্ত্রি ওফ কলচর গভরমেন্ট ওফ ইন্দিয়াগী মখাদা লৈবা নোর্ত ইষ্ট জোন কলচর সেন্তরনা নেলোপলগী ত্রেদিসনেল দোল মেকিংদা লৈরিবা টেলেণ্ট অসিবু শকখঙবা ওইনা ২০২০গী ‘য়ং টেলেণ্ট আর্তিস এৱার্দ’পীদুনা ইকায়খুম্নবা উৎখি। মসিগী মমাংদসু মনিপুর য়ুনিভর্সিতিগী দিপার্টমেন্ট ওফ ফাইন আর্তস্না শিনবা অহানবা মহৈরোইশিংগী আর্ত একজিবিসন্দসু মনা ফংখি। অদুগা আর্তস সোসাইতি মনিপুরগী ১২শুবা এন্ন্যুএল আর্ত এৱার্দসু নেলোপলনা ফংখি। পুম্নমক অসি মহাকনা থৱায় হকচাং য়াওনা লাই য়েকপগী কলা অসিদা হোৎনজরকপগী মহৈনি। নুপীনা লাই য়েক্লগা করি তৌদোইনো হায়নরম্বা ৱাখল্লোন অমসুং য়েংলম্লিবা মিৎয়েং অদু হৌজীক্তি হোংদোকপা মতম ওইরে হায়বদু ময়েক লানা উহনবা ঙম্লে। নেলোপলগুম্না লাই য়েকপা শাবা পামজবা হৌরক্লিবা মহৈরোই কয়াদা মহাকনা ইনোৎ অমদি হাপ্লগনি খল্লি।
হেন্না নুংঙাইরিবদি মনিপুর লৈঙাক্কী ওইনা আর্ত এন্দ কলচরগী মখাদা লৈবা মনিপুর স্তেট কলা একাদেমিনা তোঙান তোঙানবা হীরমশিংদা মরু ওইনা আর্ত অমসুং কলচরদা থোইদোক হেন্দোকনা থবক তৌরিবা মীওইশিংদা পিদুনা লাকপা এৱার্দশিংগী মরক্তা অমা ওইরিবা লেমজনিংঙাই ওইরবা(২০১৮-২০২০) মনিপুর স্তেট কলা একাদেমি এৱার্দ, ২০২০(লাই য়েকপদা) নেলোপলনা য়েকপা “সাইওন” হায়না মিংথোনবা আর্ট ৱার্ক অসিদা পিনবা মিং লাওথোকখিবা অসিনি। লেমজনিংঙাই ওইরবা মনা অসিনা হেন্না পুকনিং থৌগৎপা ওইদুনা মখা তানা ফজরবা কলাগী পোত্থোক কয়া লেপ্তনা পুথোক্লক্কনি খল্লি।
নেলোপলনা ইম্ফাল আর্ত কলেজতা তম্বা মতমদা হৌজীক হৌজিক প্রিন্সিপাল ওইরিবা ওজা হেমণ্টানা আর্ত হিস্তরি মমুৎ তানা তাক্লকপা অদুগা অমুক মনিপুর য়ুনিভর্সিতিদা লৈরিবা দিপার্টমেণ্ট ওফ ফাইন আর্তসকী ওজাশিংনা তাকপী তম্বীরকপা অদুনা লাই য়েকপগী লমসিদা খঙনিং হৈনিংবা কয়াদি খঙবা ঙম্লে ফোংদোকলকখি। মহাকনা ঙসি মায় পাক্লকলিবা অসিগী ক্রেদিট পুম্নমক মহাকপু তাকপি তম্বীরকখিবা ওজাশিংদা পিজরি হায়নসু তমলকখি। লাই য়েকপগী হিরমসিদা মহাক্কী অপোকপা ৱারিবম শামু অমদি মমা দাশুমতিনা মচাগীদমক পম্বোম তিংবিবা অদুগীদমক শেম্বীবা তাইবঙ মপুবু থাগৎচৈ নেলোপলনা। অদুগা মহাক্কী আর্তিস মরুপ মপাংশিং অমদি আর্ত লভরস পুম্নমক্কি মফমদা তৌবীমল খঙবসু ফোংদোকলখি।
মনিপুরদা লৈরিবা আর্তকি লূপশিংনা অমদি আর্ত লভরশিংনা শিন্দুনা একজিবিসন অমসুং ৱার্কশোপ কয়া অসুম পাঙথোকলকপা অমসুং মনিপুর য়ুনিভর্সিতিদা ফাইন আর্তস দিপার্টমেন্ট হাংলকপা লোয়ননা মনিপুর য়ুনিভর্সিতি ওফ কলচরদসু ভিজ্যুএল আর্ত হাপ্লকপা অসিনা লাই য়েকপগী খরা হেন্না কনবা ইহৌ অমদি তপ্না তপ্না লাকপা হৌরে খল্লি। মনিপুরবু মালেমগী মীয়ামদা মশক তাকপদা ভিজ্যুএল আর্তিসশিংনসু ঙসিদি চাওরবা থৌদাং লেপ্তনা লৌরক্লি। মতাং অসিদা লৈঙাক্কি ইদুকেসন দিপার্টমেণ্ট অমসুং মরি লৈনবশিংদা হায়জনিংবদি মনিপুরদা লৈরিবা স্কুলশিংদা ভিজ্যুএল আর্তকি ওজা অসি তঙাইফদনা য়াওহনবীয়ু হায়বসিনি। মরমদি মনিপুর য়ুনিভর্সিতিদা এম এফ এ তম্বগী দিপার্টমেণ্টদি হাংলে অদুবু স্কুল খুদিংমক্তদি ফাইন আর্তকি ওজা লৈতবা কয়া য়াওরি। মনিপুরগী কলচরেল হিস্ত্রিদা লাই য়েকপা শাবগী থৌদাং য়াম্না চাওনা য়াওরি হায়বসি মীপুম খুদিংনা খঙদবগুম তৌই। নুপিশিংসু লাই য়েকপা শাবা য়াই হায়বসি হৌজীক্তি থবকনা অমদি মায় পাকপগী ৱারী কয়ানা লেংদ্রবা খুদম ওইরক্লি। মৈতৈ নুপীদি থৌনা ফগদবনি , য়ুম পাল্লবা মতুংদা নুপি আর্তিসশিংনা ইশানা পামজবা থবক অদু থাদোকলোইদবনি। কন্না হোৎনবগী মহৈদি নোংমা শোয়দনা য়ানগনি হায়রকখি নেলোপলনা
0 কমেন্ট:
কমেন্ট তৌবিয়ু