• 528
• ২০শে মার্চ ২০২৪ ইং
• Share on:

মণিপুরি লোনবু আসামগি এসোসিয়েৎ ওফিসিয়েল লেংগ্বেজ ওইনা সকখঙখিব - -দিলিপ ময়েংবম

আসামগি চীফ মিনিস্তর হিমন্ত বিশ্ব শর্মাবু ঙমখৈ লৈতনা থাগৎফম থোকঈ। মরমদী আসামগি মণিপুরিসিংগি অপাম্বদু থুংহন্বগা লোয়ননা য়াম্ন ফজখ্রবা ৱাফম অমা মহাক্না পুখৎলকখি-ৱারেফ অসী আসামদা খুন্দারিব মণিপুরি খুন্নাইগি নাৎ, খুন্নাই, লিংগুইস্তিক আইদেন্তিতি অমদী ঈনাক খুল্লব পূক্কৈ অসীবু ঙাকতুন থম্নব, লীদুনা থম্নব অমদী চাওখৎহন্নবা পান্দমদ লৌবনী। য়াম্না নুংঙাইবা ফাওঈ।

দিলিপ ময়েংবম

   আসামগি মনিপুরি লোন্ন মমারোল ওইব মীতৈ অমগী মীতৈ পাঙলসিংন মতম কুইনদগি তাল্লকপ দিমান্দ অম হন্দক্ত মঙফাওনখ্রে। চহী অসীগি ফেব্রুয়ারি ২৩, ইরাই নুমিত্ত নুমিদাং অথেঙবফাওব ফমখিব আসাম লৈঙাক্কি কেবিনেৎ মীফমদ মণিপুরি লোনবু আসামগি এসোসিয়েৎ ওফিসিয়েল লেংগ্বেজ ওইহন্নবা অয়াব পীখ্রে।

মীফম অদুন Assam official language (Amendment) Bill, 2004  বু অয়াব পীখি, বিল অসীন হায়রিবদী মনিপুরি লোনবু আসামগি এসোসিয়েৎ ওফিসিয়েল লেংগ্বেজ ওইন আসামগি জিলা মরিঃ কসার, করিমগঞ্জ, হায়লাকান্দি অমদী হোজাইদ চৎননবা সকখঙবীয়ু হায়বনী। বিল অসীনা Assam Official Language Act, 1960 বু এমেন্দ তৌরগা অনৌবা সেকসন 5B অম হাপচিন্দুন মণিপুরি লোনবু আসামগি এসোসিয়েৎ ওফিসিয়েল লেংগ্বেজ ওইহনগনী। কেবিনেৎন অয়াব পীখ্রবনিন এসেম্বলিদ পাস তৌব হায়বদুদী অরায়ব ৱাফম ওইরে।

মতাং অসিদ আসামগি চীফ মিনিস্তর হিমন্ত বিশ্ব সরমবু ঙমখৈ লৈতনা থাগৎফম থোকঈ। মরমদী আসামগি মণিপুরিসিংগি অপাম্বদু থুংহন্বগা লোয়ননা য়াম্ন ফজখ্রবা ৱাফম অমা মহাক্না পুখৎলকখি-ৱারেফ অসী আসামদা খুন্দারিব মণিপুরি খুন্নাইগি নাৎ, খুন্নাই, লিংগুইস্তিক আইদেন্তিতি অমদী ঈনাক খুল্লব পূক্কৈ অসীবু ঙাকতুন থম্নব, লীদুনা থম্নব অমদী চাওখৎহন্নবা পান্দমদ লৌবনী। য়াম্না নুংঙাইবা ফাওঈ। আসামদা খুন্দারিবা মণিপুরসিংগ ওল আসাম মণিপুরি স্তুন্দেন্স য়ুনিয়ন্ন য়াম্ন হরাও তয়াম্ব ফোঙদোকপগা লোয়নন আসামগি চীফ মিনিস্তরবু থমোয় সেংন থাগৎখি। মণিপুরগি চীফ মিনিস্তর নোংথোম্বম বীরেন্নসু হিমন্ত বিশ্ব সরম হরাও তয়াম্ব ফোঙদোকপগ লোয়নন আসামগি মণিপুরিশিংদা লৈঙাক্ন থমলিব থাজব অদুগিদমকসূ থাগৎখি।

 আসামগি চীফ মিনিস্তর হিমন্ত বিশ্ব সরম  অমসুং মণিপুরগি চীফ মিনিস্তর নোংথোম্বম বীরেন

আসামগা মীতৈসিংগ থায়নদগি হৌন অচেৎপ মরী লৈনরকঈ। আসামদ য়াম্ন কন্ন হৌখিবা মীতোপ তানথোকপগি ঈহৌদ আমসুন কন্ন সৌগৎখি। ব্রহ্মপুত্র তম্পাক্ক বরাক তম্পাক্ক তোখাই তাগে তৌরুরব ফীবমদু আমসুন সমজিন্বদ মতেং পাংখি। আমসুন ওল্লকপ এ জি পিন আসমদ লৈঙাক পায়রকপদা আমসুগি মনমদ তোংলগ এ জি পি বরাক তম্পাক্ত চঙলকখি। অসূম্ন অচেৎপ মরী অম লৈরকখি। হিমন্ত বিশ্ব সরম ঈহৌ অদুদ য়াওরকখিব মীসক অমনী।

আসামগি ওফিসিয়েল লেংগ্বেজ এক্ত, ১৯৬০ অসী ঈরাই লায়ন ফংখিব নত্তে। ঈহৌ কয়া হৌরব তুংদা ফংখিবনী। ১৮২৬ত ত্রিতি ওফ য়ান্দাবু বৃতিস লৈঙাক্ক বরমা লৈঙাক্ক সহি তৌনখ্রবা মতুং আসমদ অওন্ব লাকখি। চহীসিদ আসামবু বেঙ্গোলগি সরুক অম ওইন লৌসিনখি। অদুদগি ১৮৩৬ কি এপ্রিল থাদ বেঙ্গোলি লোনবু আসামগি কোর্টকি লোন ওইহনখি। মথংদ স্কুলদ তম্নব লোনসু ওইহনখি। চহী ১০ রোম লৈরগদী য়ানীংদবগি ঈহৌ লাকখি। মরমদী মপাল ফরিবা বেঙ্গোলিসিংবু বৃতিসনা কোর্টত থবক সূহন্নবা, স্কুলদ ওজা ওইহন্নবা চাং য়াম্ন আসামদ পুসিল্লকখি। মদুন আসামগি ইকো সিসতেমদ কায়হল্লকখি। মতমদুদ আসামিজ লোন্দ লাইরিক ফোঙব কয়া তৌদ্রি। বেঙ্গোলিন থবক মুনখিব, লোন্দ, সাহিত্যদ, মনাৎত পীরকলিবা অকায়বদু খঙলকপদগি লাইরিক লাইসু হৈব আসামিজসিংন লুচিংদুনা আসামিজ লোন্ন কোর্টকি লোন ওইহন্নব, স্কুলদ তম্নব লোন ওইহন্নবা ঈহৌ সাগৎলকখি।

ঙাইদুন লৈরম্ব খুদোংচাব অমা ফংলবগুম American Baptist Missionary ন ঈহৌ অসী সৌগৎখি। মখোয়না আসামিজ লোন্দ লাইরিক কয়া ফোঙখি। ধরমগি ৱাফমত নত্তনা ‘অরুনোদোই’ কৌবা আসামিজ লোনগি চেফোঙ অম ১৯৪৬ কি জানুয়ারি থাদগি সিবসাগরদা ফোঙব হৌখি। আসামিজ অইবা কয়া থোরকখি। মখোয়গি মনুংদ মমীং লৈরব অইবা হেমচন্দ্র বরুৱা য়াওরকখি। চেফোঙ অসিদ ঈ-পাউগ লোয়নন আসামগি বুরনজিসিংসু ফোঙখি। মথং মথং লাইরিক কয়াসু ফোঙবা হৌরকখি। মিসনরি অসীন আসামিজ লোনবু কোর্টকি লোন অমদী স্কুলদ তম্নব লোন ওইহন্নব ঈহৌদ সৌগৎখি। ইস্ত ইন্দিয়া কোম্পানিদসু ইথিল পীবদগি, ১৮৭২ দ বেঙ্গোলগি লেফতেনেন্ত গবর্নর জোরজ কেম্পবেলন আসামদ আসামিজ লোনবু মহৈ-মসিং তম্ব অমদী লৈঙাক্কি লোন ওইনা সীজিন্নরগনি হায়ন লাউথোকখি। ১৮৭৪ দ আসাম অসী চীফ কমিসনারন ঙাকপ রাজ্য অমগি থাক্ত ৱাংখৎহনখি। চীফ কমিশনারন আসামিজ লোনবু প্রাইমারি স্কুলদ তম্নব লোন ওইরগনি হায়না লাউথোকখি। ১৯০০ ফাওবদী মিদল অমদী হায় স্কুল ফাওব লোন্ন তম্লম্মী।

১৯০১ দা গৌহাতিদ কোলেজ অম লিংখৎনবা ৱাফম চীফ কমিসনার হেনরি কতন্ন য়াবীবদগি কতন কোলেজ লিংখৎখি। লাইরিক ফোঙবগি, সাহিত্য চাওখৎনবা হোৎনবগি তঙাইফদব লাকখি। অদুন ১৯১৭ ত আসাম সাহিত্য সভা লিংখৎখি। সাহিত্য সভান আসামিজ লোন অমদী সাহিত্য চাওখৎনবা হোৎনবদ অচৌবা থৌদাং লৌখি। ১৯৫০ দ ভারতকি চৎন পথাপ সেম্বদ আসামিজ লোনসু ৮ সুব সিদ্যুলদ য়াওখ্রে।

১৯৫৪ দ সাহিত্য একাদেমি লিংখৎলব মতুংদ আসামিজ লেঙগ্বেজ ওইনদী সকখঙদ্রি আসামদ। অদুন ১৯৫৯ দ আসাম সাহিত্য সভান আসামিজ লোনবু আসামগি ওফিসিয়েল লেঙগ্বেজ ওইহন্নবা ৱারেপ লৌখি। আসাম প্রদেস কংগ্রেসনসু মদুবু সৌগৎখি। ১৯৬০ গি জুলাই ৪দ অচৌবা রেলি অম সীনখি। মদুদ পুলিসক নিংঙাই সংদানরকপদগি পুলিসন নোংমৈ কাপ্পদ মহৈরোই ১ সিখি, ৬ ন সোকখি। অদুদগি ঈহৌ কনখৎখ্রে। আসাম বিধান সভাদ মুখ্য মন্ত্রি বিমোলা প্রসাদ চালিহান আসাম অফিসিয়েল লেংগ্বেজ বিল ১৯৬০ ওক্টোবর ১০ দ পুথোকখি। মদুদ আসামিজ অমদি ইংলিসপু ওফিসিয়েল লেংগ্বেজ ওইহম্ব, তুংদ আসামিজন সিনখিব হায়ন য়াওবনী। বিল অদু ১৯৬০ গি ওক্টোবর ১০দ পাস তৌরগ দিসেম্বর ১৭ ত গবরনরগি অয়াব পীখি। মসিন বেংগোলি লোনগি মহুত্ত আসামিজ লোন্ন ওফিসিয়েল লেংগ্বেজ ওইনা সিন্দোকখি। পুৱারী অম আসামিজ লোন্ন সেমখি।

আসামগি মীতৈন নম্ন খুন্দাব মফমসিদ ১৯৫৬ তগি প্রাইমারি স্কুলসিংদ মণিপুরি লোন্ন মিদিয়ম ওইন তম্ব হৌখি। ১৯৬৩ দগি এম ই স্কুলসিংদমুক তমথখি। ১৯৭৯ দ এইচ.এস.এল.সি পরিখাদ মণিপুরি লোন্ন থাব হৌখি। অদুদগিদী এম এ, পি ঐচ দি ফাওবা চৎথখ্রে। বোরোসু মণিপুর লোনগ তুংথ-মাঙথ লাকখি। অদুবু বোরো একোরদকি মতুংদ মখোয়গিদী ৮ সুব সিদ্যুলদ চনখ্রে, সাহিত্য একাদেমিন সকখঙখ্রে। অদুত নত্তনা আসামগি এসোসিয়েৎ ওফিসিয়েল লেংগ্বেজ ওইন ১৯৮৪ দ অয়াবা পীখি। ১৯৮৫ দা Assam Official language Act. 1960 অদু সেমদোক্লগ সেকসন 5A হায়ব অম হাপ্লগ বোরোন মপূঙ ওইন তাব আসামগি ওফিসসিংদ ওফিসকি থবক থৌরম পাঙথোকপদ বোরো লোন সীজিন্নগনি হায়ন পল্লিবদু রাজ্যপালন অয়াব পীখি।

মদুগ চপ মান্নন ওফিসিয়েল লেংগ্বেজ এক্ত, ১৯৬০ অসী সেমদোক্লগ সেকসন 5B হায়ব অম হাপচিল্লগ মনিপুরিন মপূঙ ওইন তাব আসামগি জিলা ৪-কসার, করিমগনজ, হাইলাকান্দি অমদী হোজাইগি ওফিসসিংদ ওফিসকি থবক থৌরম পাঙথোকপদ মণিপুরি লোন্ন সীজিন্নগনি হায়বনী। মসীন ২০১৯ দা APSC ন থবক লৌবদ আসামিজ, বোরো অমদি বেংগোলি লোন অহুমগি মনুংদ অম ক্বালিফাইং পেপর ওইন থাগদবনী হায়বদগি অচৌবা ৱাথোক অমা ওইখিবদু মতম পূম্বগি ওইন কোক্লগনী। আমসু অমদী অতৈ লূপ কয়ান আসামগি চীফ মিনিস্তর অমদী এদুকেসন মিনিস্তরদা ৱাকৎখি। মণিপুরদগিসু খোরিরোলগি লূপ ৫ ন চে থাদুন মণিপুরি লোনসু য়াওহন্নবা হায়জখি।

মতমদুদা হিমন্ত বিশ্ব সরম এদুকেসন মন্ত্রি ওইরি। মহাক্না সিলচরদা লাকপ অমদ মদু সোয়খিবনী, মনিপুরি য়াওন ত্রাইবেল কমিউনিতি খরসু ক্বালিফাইং পেপর থাদব য়ারনী হায়ন লাউথোকখি। মণিপুরি লোনবু Associate Official Language ওইহন্বদী প্রোসেস সাংঙি, মদুদী কোন্ন তৌসী হায়রমখি। APSC গি ইসু অদুদগি মণিপুরি লোনবু এসোসিয়েৎ লেংগ্বেজ ওইহনগদবনী হায়ব খোঙজঙ কনসীল্লকখি। মনিপুরি য়ুথ ফ্রন্ত ওফ আসামনসু ঈহৌ কন্ন সাগৎখি। আমসু অমদী অতৈ লূপশিংসু হান্নদগি দিমান্দ তৌরকখি।
তানজা চাব মীৎকুপতু হিমন্ত বিস্ব সরম চীফ মিনিস্তর ওইরবা মতুংদ লাকখি। হন্দক্কি ফেব্রুয়ারি ৮ দা গুৱাহাতিদ পাঙথোকখিব ওল আসাম মণিপুর স্তুদেন্তস য়ুনিয়ন (আমসু) গি ৪৬ সুব চহীগি মীফমদ আসামগি চীফ মিনিস্তরবু মীথুংলেন ওইন য়াওবীনবা হায়জবদা য়াবীরকখি। অদুবু নুমিত্তু এসেম্বলি মীফম লৈবদগি চিম্বন লাকপ ঙমখিদে। আসামগি কাঙলূপ কয়াগি লুচিংবসিং সরুক য়াখি। মহাক য়াওহৌদবগি নুংঙাইতবদু কোকহন্নবা চীফ মিনিস্তরন নুমিৎ নীনি লৈরগা আমসুগি লুচিংবসিং কৌরকখি। মদুদ দিমান্দ অনী য়াওবা মেমোরেন্দম অম পীসিনখি।

অমন সিলচর ময়োন্দ লৈব মণিপুরি বোইজ হোস্তেলদ  G+2 গি RCC বিলদিং অম সাবীয়ু অদুগ অনীসুবদন মনিপুরি লোনবু আসামগি এসোসিয়েৎ ওফিসিয়েল লেংগ্বেজ ওইহন্বীয়ু হায়জখি। ৱাফম অনীমক মহাক্ন খন্নগে হায়ন তাকপীরকখি। অদুদগি ফেব্রুয়ারি ২৩ দ নুংঙাইব পাউ অসী ফোঙলকপনী। ত্রাইবেল লোল ৬: মিসিং, রাভা, কারবি, তিৱা, দিওরি অমদী দিমাসাবু প্রাইমারি থাকত স্কুলদ তম্বগি অয়াবসু নুমিৎসিদ লাউথোকখি। আসামগি মীতৈসিং বমবুলা থাদুনা নুংঙাইরব পাউ অসীবু তরাম্ন ওকখি। আমসুবু ঈকাই খুম্নবগা লোয়ননা মাণিপুরি জাতিবুস ঈকাই খুম্নবীবনী। মসিগিদমক শ্রী হিমন্ত বিস্ব সরমবু হায়নীংঙাই লৈতন থাগৎফম থোকই।

কোর্টেসি : পোক্নফম