মোহাম্মদ আব্দুস সাত্তার সাজবমগী শৈরেং অহুম
ঐগী খূৎপিগী মপাঙ্গল
হাঙলবা থম্মোয়গী অতিয়াদা লাক্লি,
খাক লাউদুনা লাক্লি
রাজনিতিগী মম্লবা নোং মপৈ-মপৈ
হুন্নরি পরিং লান্না ৱাংনা-ৱাংনা
মৈরী ৱাৎত্রবা চিন্বান্দগী
মৈজাও থোকপমখৈ।
কিজরে,
কিজরে য়ৈথুবীরমগদৌরিব্রা
নৌরবা ৱাখলগী পামেলশিংবু
কল্লবা নোংলৈ- নোংহুম'সিনা
নত্ত্রগা
চাকথেক্লমগদ্রা তাঙ্গোই তানা
থম্মোয়নুংদা মচু শংখ্রবা
সংবিধানগী ইয়ুম'সে
মদুনা খল্লকই,
চেল্লসিরনে থাদোক্তুনা
লান্নংলবা রিফ্যুজিগুম
মাইগৈ শলাই খঙদা
থাপ্না য়াম্না থাপ্না
থৱায়'সিগীদমক।
অদুবু
য়োকপিরকপগী মহৈ
খোম্নাংগী লন্দোন'সিখক
পিরাং চদুম কয়ানসু
ঙমদ্রবদা কোকহনবা।
করম্না থদৎকনি
ঈতিন্নখ্রবা
নুংশি লীপুন্দি ইপোক্লম'সিগী
খল্লদুনা ঐনা
চৎলি
কাইরবা লীক্লি মচেৎশিং
হাইদোক-হাইদোক্লদুনা
উৎলদুনা
ঐগী খূৎপিনসু
মাগী মপাঙ্গল
অরৈবী থানা
অমা হেনবদা
নিংথৌ খূভম ফংলিবা
গনতন্ত্র'সিগী দমক।।
মাইওল লাল্লবা রাজনেতা
থাংগনি কদোমদা কৈন্য -খোঙথাং
থিগনি কদাইদা য়াইফ-মান্দোপ
য়েৎশিন্নখ্রবদা পান্দম থৌরিনা
রাজনিতিগী কুংলা তিংখংলক্তা।
লৈতারোলগা য়েংথিনরবা লিরুং-তেন্না
থাদোরক্লবদা হু তৈরবা তেনজৈ,
তোকঙা ওইহৌরনি
অমভেৎকরগী সংবিধান
অমসুং
গান্ধীগী মংলান।
অসুম্না,
পেল্লগদ্রনে!
অজাৎকি থৱাই মিরেলনা।
লংলা অমসুং লংজিন
খুৎথেক্লক্লবদা কুচুগী পুক্নিংনা,
ঈ ওইনা চেল্লরবদা
ফুরুপকী তুরেলনা,
কিন্থরক্লবদা চিং তমগী চেকপলনা
লেপখিগদ্রনে ভারতকী চৈখৈ।
ইতিহাসতা লাইয়েক তম্নরক্লবদা
ললোন্দা লাইশোল শক্নরক্লবদা
করম্না খংলুগনি শাস্ত্রগী মাইথোং
কনানা তম্লক্কনি অচুম্বা মহৈ।
লেন্দবদি য়াদে, লেল্লিবনি ঐসু
অমম্ব'সিগী মরক'সিদা
নোঙাল্লকপা ঙাইদুনা।।
নুংবংলে
শানৌ খোয়থীৎ পাখংবা
তরঙ হৌনা পাইরক্লে
চীংলেন য়ৌঙম কারক্লে।
নুংশি মৈনা থোইজিল্লক
লৈরাং মায়ওন কোকঙামলে
খকমা তানা নুংওল্লে।
চিনথৌ লৈরক খোইহুম্না
নুংহক থীৎনা চৈবিদা।
তাংজা শাজৌ থোইবদি
নুংপ্রং ইরৈ চনখরে
কোলোয় খোইরি থোকঙমদা
নুংশি য়াহৌ নুংবংলে।।
[অরিবা লোনগৈশিং অসিগী অর্থ খরসু থমজরমগে -
নুংবংবা-তৌফম খংদবা/ খোয়থীৎ - পূক্নিং য়াম্না নুংশিবা/ তরং হৌনা - য়াম্না কন্না/ চিংলেন য়ৌঙম-ফংনবা কন্না হোৎনবা/থোইজিল্লকপা-হেনজিল্লকপা/ খকমা-অতৎ অখম লৈতবা/ চিনথৌ লৈরক খোইহুম্বা - ৱা য়াম্না ঙাংবা লৈকাইগী মী/ নুংহক থীৎনা - য়াম্না কন্না, হন্না হন্না/ তাংজা শাজৌ থোইবা-উপাই লৈজদ্রবা পাখং/ নুংপ্রং - চমম্নবা, /খোয়রি-পূক্নিংগী ৱা ]
- ট্যাগ:
- শৈরেং
0 কমেন্ট:
কমেন্ট তৌবিয়ু