image

ইন্টারনেসনেল মাদার্স লেংগ্বেজ দে ২০২৪ পাক শন্না পাঙথোক্নখ্রে

ইম্ফাল, ফেব্রুয়ারি ২১ : দিরেক্তরেত ওব লেংগ্বেজ প্লানিং এন্দ ইমপ্লিমেন্তেসন, মণিপুরনা শীন্দুনা ‘মাল্টিলিঙ্গুএল এদজুকেসন ইজ এ পিল্লর ওব ইন্টারনেশনেল লার্নিং’ হায়বা হীরমসিদা ইন্টারনেসনেল মাদার্স লেংগ্বেজ দে ২০২৪ গী থৌরম মণিপুর প্রেস ক্লাবতা পাঙথোকখ্রে।

থৌরম অসিদা দিরেক্টোরেটসিগী দিরেক্তর এল রাধাকান্তনা থৌরম মপু, সাহিত্য একাদেমী এৱার্দী ডা. থোকচোম ইবোহনবীনা অথোইবা মীথুং অমসুং জি পি উইমেন্স কোলেজ মণিপুরী দিপার্টমেন্টকী হেদ ডা. ৱাইখোম রোমেশনা অখন্নবা মীথুং ওইখি।

দিরেক্তরেত ওব লেংগ্বেজ প্লানিং এন্দ ইমপ্লিমেন্তেসন, মণিপুরনা শীন্দুনা পাংথোকখিবা  ইন্টারনেসনেল মাদার্স লেংগ্বেজ দে ২০২৪ 

থৌরম মপুগী ৱারোলদা এল রাধাকান্তনা হায়খি, চাওখৎলকপগী মতুংইন্না থোক্লকপা অনৌবা ৱাহৈ কয়া অমা ইমালোলদা করম্না হাপচিনগদগে খন্নবা মতম ওইরে। ঐখোয়না ইংলিস অমসুং হিন্দী হৈবা মথৌ তাবগুম মহৈরোয়শিংনা লাইরিক তম্বদা ইমালোলদা তম্বীরবদি হৈবা অমসুং খঙবগী চাং হেনবদা নত্তনা তুংদা খুদোংচাবা কয়া ফংগনি হায়খি।

অমরোমদা, মণিপুর য়ুনিভার্সিটিগী মণিপুরী দিপার্টমেন্টনসু মালেমগী ইমালোলগী নুমিৎ পাঙথোকখ্রে হায়না দিপার্টমেন্ট অসিগী হেদ প্রোফেসর লোইতোংবম বীরজিতনা থাদোরকপা চেরোল অমনা ফোঙদোরক্লি।

মণিপুর য়ুনিভার্সিটিগী মণিপুরী দিপার্টমেন্টননা শীন্দুনা  পাংথোকখিবা  মালেমগী ইমালোলগী নুমিৎ

থৌরম অদুদা এম য়ুগী ভাইস চাঞ্চেল্লর প্রোফেসর এন লোকেন্দ্রনা অথোইবা মীথুং, দিন ওফ হ্যমেনিটিজ এম য়ু প্রোফেসর এস ইমোবানা অখন্নবা মীথুং অমসুং হান্নগী এম য়ুগী ভি সী ইন-চার্জ ওইরম্বী প্রোফেসর এস সনাতোম্বীনা থৌরম মপু ওইখি। থৌরমদুগা মরী লৈননা লোল অমসুং সাহিত্য হায়বা হীরমসিদা নেসনেল সেমিনার অমসু পাঙথোক্তুনা মীওই ২০ লোম্না পেপর পাথোকখি হায়রি।

অমরোমদা, মণিপুর য়ুনিভার্সিটি ওফ কালচার (এম য়ু সী) গী মণিপুরী দিপার্টমেন্টকী মহৈরোয়শিংনা শীন্দুনা য়ুনিভার্সিটিসিগী ক্লাসরুমদা মালেমগী মমালোলগী নুমীৎ থৌরম পাঙথোকখি হায়না দিপার্টমেন্টসিগী মহৈরোয় লাইশ্রম বিন্দিবালানা থাদোরকপা চেরোল অমনা ফোঙদোরক্লি। থৌরম অসিদা মমালোলগী নুমিৎ অমদি নুংগী ৱারোল হায়বা হীরমসিদা য়ুনিভার্সিটিগী ওজা মাখোনমনি মোংশাবনা ৱা ঙাংখি। থৌরম মপু ওইনা ডা. দব্লিযূ এঞ্জলা, অথোইবা মীথুং ওইনা ডা. ইরেংবম টিকেন অমদি অখন্নবা মীথুং ওইনা ডা. এন বিনাতানা শরুক য়াখি হায়রি।

খোরিরোল শন্দোক লূপ ৱাংজিং, মণিপুরী সাহিত্য পরিষদ থৌবাল দিষ্ট্রিক্ট মসা অমসুং নিঙোল খূৎ মণিপুর ৱাংজিংনা পুন্না শীল্লগা খোরিরোল শঙলেন ৱাংজিংদা ঙসি মালেমগী ইমালোলগী নুমিৎ থৌরম পাঙথোকখি। থৌরম অদুদা খোরিরোল শন্দোক লূপ ৱাংজিংগী প্রেসিদেন্ট তোংব্রম বাবুলাল, মণিপুরী সাহিত্য পরিষদ থৌবাল দিষ্ট্রিক্ট মসাগী প্রেসিদেন্ট মোইরাংথেম রাজেন্দ্র অনীনা অথোইবা মীথুং অমসুং নিঙোল খূৎ মণিপুর ৱাংজিংগী প্রেসিদেন্ট খুন্দোংবম গুনমনি লৈমনা থৌরম মপু ওইনা শরুক য়াখি।

থৌরম অদুদা খোরিরোল শন্দোক লূপ ৱাংজিংগী সেক্রেটারী লাইশ্রম শ্যামোনা থৌরমগী নুংগী ওইবা ৱারোল থমখি। লোয়ননা চেফোঙ অমগা লোয়ননা ‘মমল নাইদ্রবা খুদোল’ হায়না মিংথোনবা নহাকপম বিরেননা ইবা ৱারী লিশাংগী লাইরিক অমসু থৌরম মপুনা হৌনবী মতুংইন্না ফোঙখি।

অমরোমদা, সাহিত্য থৌপাং লূপনসু ইন্টারনেসনেল মাদার্স লেংগ্বেজ দেগী থৌরম পাঙথোকপগা লোয়ননা শৈরেং-লাইরিক ফোঙবগী থৌরম অমা হান্নগী মণিপুর লেজিসলেটিভ এসেমব্লী ম্যুজিয়ম এন্দ আর্কাইবস ওদিটোরিয়ামদা পাঙথোকখি। থৌরম অসিদা মণিপুর লেজিসলেটিভ এসেমব্লী ম্যুজিয়ম এন্দ অর্কাইবস ওদিটোরিয়ামদা পাঙথোকখি।

থৌরম অসিদা মণিপুর লেজিসলেটিভ এসেমব্লীগী সেক্রেটারি করাম মেঘজিৎনা অথোইবা মীথুং, পেটিগ্রিয়ু কোলেজ উখ্রুলগী সিনিয়র এসিষ্টেন্ট প্রোফেসর ডা. ঐচ সিমলৈঙমনা থৌরম মপু ওইখি। থৌরমদুদা খুম্বোংময়ুম গৌড়হরি মধুমতি মাদার্স লেংগ্বেজ এৱার্দ রোবিন্সন মোয়োনদা লান্থোকখি।

পেট্রিওটিক রাইটার্স ফোরাম মণিপুরনশীন্দুনা  পাংথোকখিবা  মালেমগী ইমালোলগী নুমিৎ

পেট্রিওটিক রাইটার্স ফোরাম মণিপুরনসু ইন্টারনেসনেল মাদার্স লেংগ্বেজ দে অমদি লিটরেরি এৱার্দ প্রেজেন্টেসন সেরেমোনি ঙসি আই এম এ বঙ্কেট হোল কৈশাম্পাৎ জঙ্কসন্দা পাঙথোকখ্রে। থৌরম মপু, ফিল্ম ফোরাম মণিপুরগী হান্নগী চ্যেরমেন এস মঙ্গোলজাও অমদি লৈমরোল খোর্জৈকোলগী প্রেসিদেন্ট ক্ষেত্রিময়ূম সুবদনিনা মথংশিৎনা অখন্নবা মীথুংশিং ওইনা শরুক য়াখি।

সোর্স: হুইয়েন লানপাউ।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু