বাংলাদেশতা টিম ৮না শরুক য়াদুনা নিংতম কাং টুর্নামেন্ট ২০২৪ হৌদেকখ্রে
ইম্ফাল, ফেব্রুয়ারি ২১ : বাংলাদেশ মণিপুরী কাং ফেদরেসন (বাংলাদেশ না শীন্দুনা ঙসিদগী হৌরগা বাংলাদেশকী আদমপুর বাজারগী কমলগঞ্জতা লৈবা নয়াপত্তন কাংশঙদা টিম ৮ না শরুক য়াদুনা নিংতম কাং টুর্নামেন্ট ২০২৪ হৌদোকখ্রে।
ঙসি হৌদোকখিবা নিংতম কাং টুর্নামেন্টগী থৌরম অদুদা বাংলাদেশ মণিপুরী কাং ফেদরেসনগী হান্নগী প্রেসিদেন্ট কে মুহিন্দ্রোনা অথোইবা মীথুংলেন ওইনা শরুক য়াখি।
হৌদোকপা নুমিৎকী অহানবা মেটচতা নয়পত্তন য়ুথ ক্লাব অমদি হামোম খুল মহাদেব কাংখূৎ-এ গা মায়োক্নখি। হামোম খুল মহাদেব কাংখুৎ এ না টোস ঙমদুনা মায়কৈ খনখি অদুগা নয়াপত্তন য়ুথ ক্লাবনা কাং কাপ্পা হৌখি। পুং ৩ শান্নখিবা কাংগী মেটচ অদুদা নয়পত্তন য়ুথ ক্লাবনা হামোম খুল মহাদেব কাংখূৎপু পাঞ্জল ১৫-৬ তা মায়থীবা পীখি। নয়াপত্তন য়ুথ ক্লাবকী কাঙলোয় এ অশোককুমারনা মেন ওফ দি মেটচ তাখি। অহানবা প্লেগী ওইনা টি ঐচ রূপচান্দনা জজ অদুগা রাধকিশোরনা কাং কীপর ওইখি।
হৌদোকপা নুমিৎকী অনীশুবা মেটচ ওইনা কুনাগাও উজাও লাইরেম্বী কাংখূৎ অমদি ভানুবিল ভানুমতি কাংখূৎ বি অনী শান্নখি। কুনাগাও উজাও লাইরেম্বী কাংখূৎনা টোস ঙমদুনা মায়কৈ খনখি। অদুগা ভানুবিল ভানুমতি কাংখূৎ বি না কাং কাপ্পা হৌখি। অপীবা পুং ৩দা কুনাগাও উজাও লাইরেম্বী কাংখূৎনা ভানুবিল ভানুমতি কাংখূৎপু পাঞ্জল ১২-৩দা মায়থীবা পীখি।
মেটচ অদুগী ওইনা কুনাগাও উজাও লাইরেম্বী কাংখূৎকী কাঙলোয় এস ওংবী দিপালিনা মেন ওফ দি মেটচ তাখি। ঙসি শান্নখিবা মেটচ অদুগী জজনা এম অশোককুমার অদুগা টাইম কীপারনা রাধাকিশোরনা ওইখি। থা অসিগী ২৩ দা মঙ্গলপুর নিত্যানন্দ কাংখূৎকা ভানুবিল ভানুমতি কাংখুঃ সী গী মরক্তা লম্বা তৌনগনি।
সোর্স: হুইয়েন লানপাউ।
0 কমেন্ট:
কমেন্ট তৌবিয়ু