image

‘মমি শেংখিদ্রবা নুংশিবা’ হায়না মীংথোনবা নোভেল ফোঙখ্রে

ইম্ফাল, ফেব্রুয়ারি ২৩ : শক্নাইরবা অইবা মৈনম ভরতনা ইবা ‘মমি শেংখিদ্রবা নুংশিবা’ হায়না মীংথোনবা নোভেল ঙসি রিন্দা পাব্লিকেসনগী বেন্নর মখাদা ফোঙখ্রে। মণিপুর প্রেস ক্লাবতা পাঙথোকখিবা লাইরিক ফোঙবগী থৌরম অদুগা মরী লৈননা অইবগী ৱারোল পীরদুনা মৈনম ভরতনা হায়, খুনাই অসিগী ইমুংশিং য়েংলুবদা নাকল অমদনা য়াম্না নুংঙাইনা লৈবা অমদি নাকল অমদনা ইচা দারা লৈররোইদরা হায়বা ৱাখলসিদা অচৌবা অৱাবা মায়োক্নরি।

ইচা দারা লৈনবা লাই তিন খুরুম্নবা নত্তবা ষ্টেট অসিদসু অনৌবা টেক্নোলোজি লৈরে। ফার্টিলিটি ক্লিনিক ফাওবা লৈরে। ফার্টিলিটি ক্লিনিক্তা শেল ফনা য়াম্না তিংলবসু মায় পাক্তবা কয়া অমসু য়াওরি। হিরম অসিদা ইমুং অমনা থেংনরিবা অৱাবা অমসুং নুংঙাইতবা অসি লাইরিক অসিদা উৎলি।

অমরোমদা, তাইবং শেম্বা মপুনা নুপা অমসুং নুপীদা মচা দারা পান্ননবা পীরক্লগসু খুৎশেমগী ওইবা লাইবক থিবা থৌদোক্না মরম ওইরগা মচা দারা তাবা ঙমদবগী থেংনরিবা অৱাবা কয়া অসি য়েংলুরগা লাইরিক অসি ইনিংবগী ইথিল ফাওরকখিবনি। মণিপুরদা মীশিং য়েংলুরগা মৈতৈ মুৎখিবা য়াবগী মীপাইবা লৈরিবা অসিগী মতাংদসু নোভেল অসিদা ময়েক শেংনা উৎলি হায়নসু মহাক্না মখা তানা ফোঙদোকখি।

থৌরম অদুদা শরুক য়াখিবা স্কুল ওফ হিউমেনিজম, মণিপুর য়ুনিভার্সিটিগী হান্নগী দিন প্রোফেসার পোলেম নবচন্দ্রনা হায়, মণিপুর খুনাই অসিদা নুপীদা য়েংলম্বা মীৎয়েং হায়বদি থৱায় পান্দবা পোৎশককুম পুথোক পুশিন য়াবা অমগুম লৌনরম্বগী মশক লাইরিক অসিদা মমি তাহল্লি। অইবা অসিনা নোভেল অসিদা ৱারি লিবগী মওং থিম অসি য়াম্না ফজৈ। হেল্লোইনা পুরুকপা মী অমগুম লাইরিক অসিবু পারুবা মীপুম খুদিংমক ৱারি অসিগী শুহ্মৎয়াইনা অপাবশিংবু কোইপাই পায়হনবা ঙম্বগী ৱারি  য়াওরি।

লাইরিক অসিদা একাদসি ৱাফমসু য়াওরি। মসিনা খুনাই অসি লাই তিনগী থাজনবী লৈরম্মী হায়বসু ময়েক শেংনা উৎলি। নোভেল অসিদা ৱারিখক নুংঙাইহনবা নত্তনা লৌখৎলকপা য়াবা মচাককয়া অমসু য়াওরি। লাইরিক অসিদা মহৌশাগী উপাল ৱাপাল হৈপাল লৈপালগা মীওইবগী এনাতোমিগা চাংদম্নবা ৱাফম কয়া অমসু য়াওরি। নোভেল অসিনা অইবা অসিগী হান্নগী লাইরিক অদুদগী তাদনা অপাবশিংদা তোপ তোপ্পা মহাও অমা পীবা ঙমগনি হায়বগী থাজবা চপ চানা লৈ হায়নসু মহাক্না মখা তানা ফোঙদোকখি।

ঙসিগী থৌরম অদুদা সাহিত্য একাদেমি এৱার্দি ডাক্তর সগোলশেম নবচন্দ্র মৈতৈ,স্কুল ওফ সোসিয়েল সাইন্স, মণিপুর য়ুনিভার্সিটিগী হান্নগী দিন প্রোফেসার নাওরেম জয়কুমারসু শরুক য়াখি। লোয়ননা সাহিত্য একাদেমি এৱার্দি ডাক্তর কোইজম শান্তিবালানা লাইরিক অদুগী মশক তাকখি।

অইবা মৈনম ভরতকী ফোঙখ্রবা লাইরিকশিংদি মেদাম (নোভেল ভোল্যুম ১ এন্দ ২), সনা চহী অহুম (মনিং তম্লবা মীরোৎ) অমসুং ঙসি ফোঙলিবা নোভেল মমি শেংখিদ্রবা নুংশিবা হায়রিবসিনি। মৈনম ভরত পোলিটিসিয়ান অমসুনি। মহাক বিজেপি মণিপুর প্রদেশকী প্রেসিদেন্ট অনিরক ওইরম্লবা মীশক্নি। বিজেপিগী মীরেপ ওইনা থাংমৈবন্দ এসিগী এমএলএসু ওইরম্লবনি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু