মৈতৈ ময়েক্কী এক্সপার্ট কম্মিটি শেম্লগনি
ইম্ফাল, ফেব্রুয়ারি ২৩ :চৎনদনু লৈখ্রবা মৈতৈ ময়েক ২৭ অসিগী মতাংদা ৱাফম কয়া থোরকপনা মরম ওইরগা অমুক হন্না য়েংশিন্নবা এক্সপার্ট কম্মিটি অমা শেম্লগনি হায়বা ৱাফম এডুকেশন মিনিষ্টার টিঐচ বসন্তকুমারনা এসেমব্লিগী ঙসিগী মীফমদা ফোঙদোকখ্রে।
এসেমব্লিগী ঙসিগী মীফমদা ওপোজিসন এমএলএশিং কে রঞ্জিৎ, টিঐচ লোকেশ্বর অমসুং সূর্যকুমার ওক্রমনা এডুকেশনগী ডিমান্ড খন্ননবা পুখৎলকপা পোলিসি কাটশিংগী পাউখুম পীবদা চৎনদুনা লৈরিবা মৈতৈ ময়েক ২৭ অসিবু এক্সপার্ট কম্মিটি অমা শেম্লগা য়েংশিনহন্নবা ৱাফম হাউসতা থমখিবনি।
মিনিষ্টার টিঐচ বসন্তকুমারনা হায়, কুমজা ১৯৭৮ তা মীওই ১৪ না শাবা এক্সপার্ট কম্মিটি অমনা য়েংশিল্লবা মতুংদা হৌজিক চৎনরিবা মৈতৈ ময়েক ২৭ অসি রিকম্মেন্ড তৌরকখিবনি। এক্সপার্ট কম্মিটি অদুনা রিকম্মেন্ড তৌরকখিবগী মতুং ইন্না লৈঙাক্না ময়েক ২৭ অসি এপ্রুব তৌদুনা কুমজা ১৯৮০ দা লৈঙাক্কী গেজেট নোটিফিকেসন থোকখি অমদি এডুকেসনেল ইন্সটিট্যুসনশিংদা চৎনবা হৌখি।
মখাতা তানা একাডেমিক ইয়ার ২০০৬ তা ক্লাস ৱান অমসুং টুদা তম্বীবা হৌখি অমদি হৌজিক চহি ১০ হেন্দুনা বেঙ্গলি স্ক্রিপ্তকী মহুৎতা মৈতৈ ময়েক্না মপুং ফানা মহুৎ শিনখ্রে হায়বা ৱাফম মিনিষ্টারনা হাউসতা থমখি। মিনিষ্টার বসন্তকুমারনা মখা তানা হায়, টিঐচ জিতেন কৌবা এডভোকেট অমনা হৌজিক চৎনরিবা মৈতৈ ময়েক ২৭ অসিগী মতাংদা রিপ্রেজেন্টসন অমা পীরকপনি।
মরম অসিনা লৈরিবা ইসু অসিনা মরম ওইরগা এডুকেসন ডিপার্টমেন্টকী মায়কৈদগী ডাইরেক্টর লেঙ্গুয়েজ এন্ড প্লান্নিং এন্ড ইমপ্লিমেন্টেসনদা এক্সপার্টশিংগী লিষ্ট অমুক হন্না পীখৎলক্নবা খঙহনখ্রে। মৈতৈ ময়েক্কী মরমদা হেন্না খঙবা এক্সপার্টশিংগী কম্মিটি অমা শেম্নবা ওর্দার অমসু থোকখ্রে হায়বা ৱাফম এডুকেসন মিনিষ্টার টিঐচ বসন্তকুমারনা হাউসতা থমখি। হৌজিক চৎনরিবা ময়েক অসিনা পুয়া পাবা য়াদ্রে হায়বা ৱাফম লাকপনা অমুক হন্না য়েংশিনবা চুম্মি হায়না এমএলএ টিঐচ লোকেশ্বরনা ফোঙদোকখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু