‘ঈ মরীগী ইচিন ইনাওশিং নুংশিনবা পুরক্নবা থবক লৌখৎপা হৌরে’
থৌবাল, ফেব্রুয়ারি ২৩ : বাংলাদেশ লৈবাক্তা খুন্দারিবা মণিপুরী, মৈতৈশিংগা মণিপুরদগী বাংলাদেশ লৈবাক্তা মহৈ মশিং তম্লিবা মহৈরোয়শিংগা হেন্না নক্নবা মরী অমা শাগৎমিন্নদুনা ঈ মরীগী ইচিন ইনাওশিংগী নুংশিনবা পুরক্নবা থবক লৌখৎপা হৌরে হায়রি।
মণিপুরদগী বাংলাদেশ লৈবাক্কী বগুড়াদা লেবা টিএমএসএস মেডিকেল কলেজতা এমবিবিএস অরোইবা চহীদা তম্লিবী মহৈরোয় ৬ বাঙলাদেশকী ঢাকাদা বাংলাদেশতা লল্লোন ঈতিক তৌদুনা লৈবা মৈতৈ মচা খোইরোম প্রশান্ত লাইশ্রম অমসুং বিশগাও মণিপুরী ক্লাব (বিএমসি) গী জেনারেল সেক্রেটারি সোরাইজম উৎপলনা হরাও তরাম্না ওক্তুনা ঢাকাদা লৈরিবা মণিপুরী, মীতৈশিংনা খুন্দারিবা মফমশিংদা মখোয়গী পুন্সি মহিং অমসুং মখোয়গী য়ূম্লৈ কৈরৈনচিংবুস য়েংবগা লোয়ননা ৱারি ৱাতাই শান্নদুনা ঈ মশেলগী ইচিন ইনাওগী নুংশি মরী শাগৎমিন্নখ্রে হায়রি।
অমরোমদা, মণিপুর লৈঙাক্কী পাব্লিক হেলথ ইঞ্জিনিয়ারিং ডিপার্টমেন্ট, কঞ্জুমার এফিয়ার্স, ফুড এন্দ পাব্লিক দিষ্ট্রিবিউশনগী মিনিষ্টার ওইরিবা লৈশাংথেম সুশিন্দ্রো য়াওনা বাংলাদেশতা লিংখৎখিবা মনিপুরী য়ুথ ফোরাম (এমৱাইএফ) গী লুচিংবা খোইরোম প্রকাশ অমসুং হৌবম সৌরভনা বাংলাদেশকী সিলেটতা ওক্তুনা মণিপুরী তারিবা খুন কয়াদা মখোয়বু পুবীদুনা মণিপুরী, মৈতৈশিংগী পুন্সি মহিং খঙমিন্নবা সিন লাংই হায়না এমৱাইএফকী মায়কৈদগী ফোঙদোরকপা লৈরে।
বাংলাদেশতা মণিপুর, মৈতৈশিংনা অহানবা খুন্দারকখিবনি হায়না লৌনরিবা বিশগাওগী অরিবা ক্লাব অমা ওইরিবা বিশগাও মণিপুরী ক্লাব (বিএমসি) গী জেনারেল সেক্রেটারি সোরাইজম উৎপলনা ফোঙদোরকপদা ঙসি বগুড়াদা মহৈ তম্লিবা ইচনশিংনা লাকপদা মখোয়বু ঐখায়না ওকপা ঙমখিবসি ঐখোয়গী লাইবক ফবনি। ঙসিগী মখোয় ৬ না লাকপগুম মমাঙঙৈদা রংপুর মেডিকেল কলেজদা এমবিবিএস তম্লম্বা মহৈরোয়বুসু তরাম্না ওকপগী থৌরম কয়া পাঙথোকখি। বাংলাদেশকী মফম কয়াদা এমবিবিএস তম্লিবা মখোয়গা বাংলাদেশকী মৈতৈ ঐখোয় য়াম্না চেৎনা মরী অমা লৈফম থোকই হায়না ফোঙদোরকখি।
সোর্স: সঙাই এক্সপ্রেস।
0 কমেন্ট:
কমেন্ট তৌবিয়ু