ৱাংজিংদা লৈবা খোরিরোল শঙলেন্দা অইবা ২ গী লাইরিক ফোঙখ্রে
ইম্ফাল, অক্টোবর ০৭ : খোরিরোল শন্দোকলূপ ৱাংজিংনা শীল্লগা তোঙানা তোঙানবা অইবা অনীগী লাইরিক অহুম হৌনবী মতুংইন্না ঙসি ৱাংজিংদা লৈবা খোরিরোল শঙলেন্দা ফোঙখ্রে। ঙসি ফোঙখিবা লাইরিকশিং অদুদি বাংলা সাহিত্যগী মমিং লৈরবা অইবা কাজি নজরুল ইসলামগী মাষ্টার পিছ অমা ওইরিবা বাংলা লোলদা ইবা সনচিতা হায়বা শৈরেংগী লাইরিক অদুদগী শৈরেং ৩০ খনগৎলগা যমুনা লাইরেঞ্জমনা মণিপুরী লোলদ হন্দোকপা নজরুল ইসলামগী শৈরেং খরা হায়না মিংথোনবা লাইরিক অমগা সন্তো এমনা ইবা দ্রামাগী লাইরিক অনী তাবুনুংদগী অমসুং মল্ল-মল্লা লৈনুংশি হায়রিবা লাইরিকশিং অসিনি।
যমুনা লাইরেঞ্জমগী লাইরিক অসি খোরিরোল শন্দোকলূপ ৱাংজিংগীদমক সনসম ভোরোতনা ফোঙবনি। লাইরিক ফোঙবগী থৌরম অদুদা সাহিত্য একাদেমী নিউ দিল্লীগী মণিপুরী লেঙ্গুয়েজ এদভাইজরি কম্মিটিগী কনভিনর নোংমাইথেম কিরনকুমারনা অথোইবা মীথুং, খোরিরোল শন্দোকলূপ ৱাংজিংগী প্রেসিদেন্ট তোংব্রম বাবুলালনা থৌরম মপু, মণিপুরী সাহিত্য পরিষদ থৌবাল দিষ্ট্রিক্ট মশাগী প্রেসিদেন্ট মোইরাংথেম রাজেন্দ্র, সাহিত্য য়োকখৎ লূপ তেন্থাগী প্রেসিদেন্ট কার্টিক মাইবা অমসুং নিংঙোল খুৎ মণিপুরগী প্রেসিদেন্ট খুন্দোংবম গুনমনি লৈমনা মীথুংশিং ওইনা শরুক য়াখি।
লাইরিক অদুগী মরমদনা শক্নাইরবা নৈনরোই ডা. সনসম নবদ্বিপনা মরিক চুম্না ৱা ঙাংখি। লোয়ননা সন্তো এমনা ইবা লাইরিক অনী অদুসু হায়রিবা অহানবা লাইরিক ফোঙবগী থৌরম অদুদা শরুক য়াখিবা মীথুংলেনশিংনা ফোঙখি। লাইরিক অসিগী মরমদনা শক্নাইরবা নৈনরোই নবকুমার নোংমৈকাপ্পমনা ৱা ঙাংখি। লাইরিক ফোঙবগী থৌরম অদুগা মরী লৈননা অইবী যমুনা লাইরেঞ্জমনা মালেমদা ফাওরিবা অইবা কাজি নজরুল ইসলামগী থাক ৱাংলবা খুৎইগী চাউরবা পূক্কৈদগী পীকখ্রবা শৈরেংগী শরুক খরা লৌখৎচরগা হন্দোকচবনি হায়খি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু