• 699
• ৩১শে অগাস্ট ২০২২ ইং
• Share on:

সোবিতা মোংজমনা ইবা লাইরিক অমদি ওদিও সী দী কেসেট ফোংখ্রে

ইম্ফাল, আগস্ট ২৯ : কনাগুম্বা শৈশকপা-শৈশকপিশিংনা ঈশৈ অমা শক্লমদাই মীকুপ্তা ইশৈ ইরিবশিংগী মীং হেক হেক নিংশিংবিদবগী মতৌ অমা উৎলকপা য়াওরকপসি লাইবক থিবনি। ইশৈ ময়েক ইরিবশিংবু কৈদৌনুংদা মীরাইরোইদবনি, মখোয়বু ইকায়খুম্নবিগদবনি। অফবা ইশৈ ময়েক ইরিবশিংগী চাওরবা থৌদাং লৈ। ইশৈ ইরিবা, শক্লিবা, শৈবাল্লিবা অমদি মিউজিসিয়ান অসি অমত্তা ওইনা পুল্লবা মতমদতা অফবা ইশৈ পুথোকপা ঙমগনি হায়না সোসিয়েল কালচারেল এক্টিবিষ্ট রাকেস নাওেরেমনা ফোঙদোকখ্রে। 
ৱাফম অসি ঙসি প্রোগ্রেসিব রাইটার্স এসোসিয়েসন (পি দব্লিয়ু এ), মণিপুরনা শিন্দুনা মণিপুর দ্রামাতিক য়ুনিয়ন (এম দি য়ু), য়াইস্কুলদা পাঙথোকখিবা সোবিতা মোংজমনা ইবা ৱারিমচাগী লাইরিক ফোংবগী থৌরমদা অখন্নবা মীথুংলেন ওইনা শরুক য়াখিবা রাকেস নাওরেমনা ফোংদোকখিবনি। থৌরম অদুদা নম্বোল মিউনিসিপাল কাউন্সিলগী ক্যেরটেকার চ্যেরপার্সন চিংঙাখম বসন্তা সিংহনা অথোইবা মীথুংলেন, পি দব্লিয়ু এগী ভাইস প্রেসিদেন্ট ডো: নির্মলা রাজকুমারিনা থৌরম মপু, পেট্রোইটিক রাইটার্স ফোরাম মণিপুরগী পেত্রোন মেম্বার ৱাহেংবম হেমাবতি অমদি সোসিয়েল এন্ড কালচারেল এক্টিবিষ্ট রাকেস নাওরেমনা অখন্নবা মীথুংশিং ওইনা শরুক য়াখি। ঙসি ফোংখিবা লাইরিক ‘য়োৎশবি মখোং অহুম’গী মরমদা নম্বোল এল সানোই কোলেজকী ডা: সলাম সন্তিবালানা ৱা ঙাংখি। 
থৌরমদুদা শরুক য়ারদুনা রাকেস নাওরেমনা মখা তানা হায়, হৌরক্লিবা নহাশিংনা ফত্তবা হৈনবি থাদোক্তুনা লমদমসিগী আর্ট এন্দ কালচারদা মীৎয়েং থম্নরকপনা ইনাকখুল্লবা মণিপুরগী কালচারগী মশক অসি ঙসিদি মালেমগী মীয়ামনা পাম্নবসু হেনগৎলক্লি। লমদমসিগী অইবা অইবিশিংগী মরক্তা কা হেন্না ৱাবা, কা হেন্না খুদোংচাদ্রবা অনা অয়েক মায়োক্নরকপা মতমদা ইশামকসু পাব্লিসিটি সেক্রেটারি ওইরিবা ‘লাইক মাইন্দেদ গ্রুপ’ কী মাইকৈদগী পাংবা য়াবা মতেং পাংনবা হোৎনজগে। লমদমসিগী মীয়াম পুম্নমক্না অমত্তা ওইনা লমদমসিগী কালচার অমদি ঙমখৈগীদমক লেপমিন্নসি। কালচার য়াওদনা অফবা খুন্নাই অমা খক ওইবা ঙম্লোই। 
থৌরম অদুদা অথোইবা মীথুংলেন ওইনা শরুক য়াখিবা চিংঙাখম বসন্তনা ফোংদোকখিবদা, লমদমসিগী লাইওইখ্রবা অইবা অইবিশিংনা লাইরিক কয়া ইদুনা, ইশৈ কয়া ইদুনা থম্বিরম্বনা ঙসিগী মীরোলসিনা মণিপুর মচা অমা ওইনা চাওথোক্না হিংবা ঙম্লিবনি। লমদমসিগী অইবা অইবিশিংগী চাওরবা কৎথোকপা অসি ঙসিগী অমদি তুংগী মীরোলনা খক কাওফম থোক্তে। মমল য়াম্লবা খুৎই লাইরিকশিং ঙসিগী মীরোলনা ঙাক্তুনা থম্মিন্নসি হায়খি। 
ঙসিগী ফোংখিবা লাইরিক অমদি অডিও সি ডি কেসেটকী অইবী সোবিতা মোংজমনা ফোঙদোকখিবদা, ঐহাক্কী ৱারিমচাগী লাইরিক অমদি ইশৈ ১৫গী অপুনবা ওদিও কেসেট অসিনা মীয়ামদা পিজিনিংবা পাউজেলদি লমদমসিদা পোকপা মচা অমা ওইনা লমদমসিগীদমক করিগুম্বা অফবা থবক খরদি শোইদনা তৌমিন্নসি। ঙসিগী মীরোলনা লমদম অসিগী শক্তম ঙাক্তুনা থমহৌসি। লমদমসিগী নাৎ অমদি শক্তম ঙাক্তুনা থমসি হায়বনা মীরোলসিগী অচেৎপা ৱাশক ওইমিন্নসি হায়খি। 
সোর্স: পান্দম