সাহিত্য একাদেমিগী এডভাইজরি বোর্ডকী মেম্বারশিং খনখরে
ইম্ফাল, এপ্রিল ০৪ : মণিপুরী লেঙ্গোইজ এডভাইজরি বোর্ড সাহিত্য একাদেমি, নিউ দিল্লিগী মীওই তরানা শাবা মেম্বারশিং খনখরে হায়রি।
খল্লবা মেম্বারশিংদি প্রোফেসার রাজেন তোইজাম্বা, লোংজম জয়চন্দ্র, ডা. এলাংবম প্রিয়োব্রত, ক্ষেত্রি রাজেন, এ সি নেত্রজিৎ, প্রোফেসার তোইজম তম্ফা, ডা. কে ঐচ. জয়চন্দ্র, ডা. লাইখুরাম রামেশ্বর, ডা. কে. নয়নচান্দ অমদি খোইস্নাম বীরোলানি। খল্লবা মেম্বারশিং সাহিত্য একাদেমিগী এক্সিক্যুটিভ কাউন্সিলগী হৌখিবা মার্চ ২৯দা নিউ দিল্লিদা পাঙথোকখিবা মীফম অমদা অয়াবা পীখিবনি।
খল্লবা মেম্বারশিং অসিদা য়াওরিবা প্রোফেসার রাজেন তোইজাম্বা. সাহিত্য একাদেমি এৱার্দিনি। লোয়ননা মণিপুরী লেঙ্গোইজ এডভাইজরি বোর্ড অসিগী কনভেনার ওইবা খক্তা নত্তনা ইষ্টার্ন রিজনেল বোর্ড সাহিত্য একাদেমীগীসু কনভেনর ওইরি। লোংজম জয়চন্দ্র, শক্নাইরবা ভারতকী মীওই নিপান খনবগী মনুংদা মণিপুরী মচা অমা ওইনা মহাক য়াওরকপনি। মহাক মমাংদসু মণিপুরী লেঙ্গোইজ এডভাইজরি বোর্ড অসিগীসু কনভেনর ওইরম্লে। ডা. এলাংবম প্রিয়োবর্ত, ষ্টেট গভর্ণমেন্টকী মীহুৎ অমা ওইনা মখোয় অহুম সাহিত্য একাদেমিগী জেনারেল কাউন্সিলগী মেম্বার ওইনসু শরুক য়ারি।
অতৈ মেম্বারশিং ক্ষেত্রি রাজেন সাহিত্য একাদেমি এৱার্দিনি, এ. সি. নেত্রজিৎ মশাগী শৈরেং অমদি ৱারেংগী লাইরিকশিং ফোঙখ্রে। মখোয় অনী হৌখিবা মমাংগী টার্ম অমদসু মণিপুরী লেঙ্গোইজ এডভাইজরি বোর্ডকী মেম্বারশিং ওইখ্রে। প্রোফেসার তোইজম তম্ফা মণিপুর ইউনিভার্সিটিগী মণিপুরী ডিপার্টমেন্টকী হেড ওইরি। ডা. কে. ঐচ. জয়চন্দ্র মণিপুরী ওজা অমা ওইনা মণিপুর কলেজদগী পোত্থাখ্রে। মশাগী নৈন-ৱারেংগী লাইরিক ফোঙখ্রে। ডা. লাইখুরাম রামেশ্বর প্রেসিদেন্সি কলেজগী ইংলিশকী ওজানি, মশাগী ওইনা ইংলিশকী লাইরিক অমা ফোঙখ্রে। ডা. কে. নয়নচান্দ আসামদগীনি, সিলচরগী জি. সি. কলেজদগী মণিপুরী ওজা অমা থবক্তগী পোত্থারে। খোইস্নাম বীরোলা, ত্রিপুরাদগীনি। শৈরেংগী লাইরিক কয়া ফোঙখ্রবী এৱার্ড কয়াসু ফংখ্রবী অইবীনি।
0 কমেন্ট:
কমেন্ট তৌবিয়ু