চাউবা, সনাইথোইবদা পদ্মশ্রী মনা খূৎশিন্নখ্রে
ইম্ফাল, এপ্রিল ৫ : মিনিষ্ট্রি ওব হোম এফিয়ার্স, গবর্নমেন্ত ওব ইন্দিয়ানা শীন্দুনা ঙসি নিউ দিল্লীদা লৈবা দরবার হোলদা পাঙথোকপা ইনভেস্তিত্যুর সেরিমনি-২ দা মণিপুরদগী থৌনাওজম চাউবা সিংহ অমসুং ককচীংতাবম সনাথোইবা শর্ম্মাদা পদ্মশ্রী মনা খুৎশিন্নখ্রে। ঙসিগী থৌরম অদুদা ইন্দিয়াগী ওইনা পূন্না মী ৩দা পদ্মবিভুষণ, মী ৫ দা পদ্মা ভুষণ অমসুং মী ৪৭ তা পদ্মশ্রী মনা লান্থোকখি। মনাশিং অদু ইন্দিয়াগী প্রেসিদেন্ট দ্রৌপদী মুর্মূনা লান্থোকখিবনি।
য়ুনিয়ন মিনিষ্টার ওব ষ্টেত অমসুং দিপুতি চীফ মিনিষ্টার ওইরম্লবা থৌনাওজম চাউবা সিংহনা, ইং ১৯৬০ দগী চহী ৫০ রোম মীয়ামদগীদমক থবক তৌদুনা লাকখিবা অদুবু শকখঙবা ওইনা পদ্মশ্রি (পাব্লিক সার্বিস) পীদুনা ইকায়খুম্নখিবনি। মহাক নম্বোল কেন্দ্রদগী ইং ১৯৭২ দা অহানবা ওইনা এম এল এ ওইবগা লোয়ননা থংনা থংননা তার্ম মঙারক নম্বোল কেন্দ্রগী মীহুৎ ওইদুনা মীয়ামগী থবক তৌরকখি।
ইং ১৯৭৪ দা মণিপুর লেজিসলেটিব এসেমব্লিগী দিপুটি স্পিকার, ইং ১৯৭৭ তা মিনিষ্টার ওব স্তেত ওইরম্লবা মতুং ইং ১৯৮০ দা কেবিনেত মিনিস্তর ওইখি। ইং ১৯৯৪ দা মণিপুরগী দিপুতি চীফ মিনিস্তর ওইখি। মহাক ইং ১৯৯৬, ১৯৯৮ অমসুং ১৯৯৯ দা মথংশিৎনা ১১শুবা, ১২ শুবা অমসুং ১৩ শুবা লোক সভাগী মেম্বার ওব পার্লিয়ামেন্ত ওইখি। প্রাইম মিনিস্তর অতল বিহারী বাজপাইগী মতমদা য়ুনিয়ন মিনিস্তর ওব স্তেত ফোর স্পোর্টস, য়ুথ এফিয়ার্স, কালচার এন্দ ফুদ প্রোসেসিংগী মিনিস্তারগী থৌসু পুরকখি। মহাক ভারতিয়া জনতা পার্তি মণিপুর প্রদেশকী টার্ম অনীরক প্রেসিদেন্ট ওইরম্মী।
থিয়েটারগী লমদা থৌনাওজম চাউবনা ইং ১৯৫৬ তা পাব্লিক থিয়েটার আর্টিষ্ট এসোসিয়েসন লিংখৎতুনা ইং ১৯৭৮ দগী ঙসি ফাওবা চেয়ারমেনগী থৌ পুরি। লৌউ-শিংউগী লমদা মহাক্না ইং ১৯৫৬ তা উৎলৌ জোইন্ত ফার্মিং কো-ওপরেতিব সোসাইতি, ইং ২০০২ দা কৃষি বিজ্ঞান কেন্দ্র (কে ভি কে) বিষ্ণুপুর দিস্ত্রিক্ত লিংখৎখিবগা লোয়ননা ইং ২০১৭ পন্দিত দিন দয়াল উপধ্যায় এগ্রিকালচারেল ইনস্তিত্যুত বিষ্ণুপুর দিষ্ট্রিক্ত লিংখৎখি অমসুং হৌজিকুস ইনস্তিত্যুত অসিগী চেয়ারমেনগী থৌ পুরি।
ককচীংতাবম সনাথোইবা শর্ম্মাদা পদ্মশ্রী মনা খুৎশিন্নবা
থাঙ-তাগী লমদা থোইদোক হেন্দোকপা থবক তৌবগীদমক পদ্মশ্রী এৱার্দ পীরকখ্রবা ককচীং তাবম সনাথোই শর্ম্মা, হুয়েন লাল্লোং মণিপুর থাঙ-তা কালচারেল এসোসিয়েসন, ইরিলবুংগী প্রিন্সিপাল কম দিরেক্তর ওইরি। মহাক ইন্দিয়া গবর্নমেন্তকী মিনিষ্ট্রি ওব কালচারগী এক্সপার্ত কমিটি মেম্বার, সেন্তার ফোর কালচারেল রিসোর্সেস এন্দ ত্রেনিং নিউ দিল্লীগী মেম্বার (২০০৮-২০২০), মণিপুর য়ুনিভার্সিটি ওব কালচারগী অহানবা অমসুং অনীশুবা একাদেমিক কাউন্সিলগী মেম্বার, মণিপুর স্তেত কলা একাদেমিগী টার্ম অনীরক জেনারেল কাউন্সিল মেম্বার ওইখি। জে এন মণিপুর দান্স একাদেমি ইম্ফালগী থাঙ-তাগী কমিটি শেম্বদা য়াওখিবগা লোয়ননা শ্রী শ্রী গোবিন্দজি তেম্পল বোর্দ মণিপুরগী থাঙ-তাগী গুরু ওইনসু থৌ পুরমখি।
সনাথোইবনা মমাঙদা ফংখ্রবা এৱার্দশিংগী মনুঙদা সঙ্গীত নাটক একাদেমি এৱার্দ (২০১৪), মণিপুর স্তেত কলা একাদেমি এৱার্দ (১৯৯৩-৯৪), মণিপুর সাহিত্য পরিষদনা পীবা কলা ভুষণ (২০১০), মণিপুর স্তেত কলা একাদেমিগী ফেল্লোশিপ (১৯৮৭-৮৮), শ্রীশ্রী গোবিন্দজি তেম্পল বোর্দ মণিপুরনা পীবা শাফা-লানফাবা (১৯৯৭) অমুসং জয়পত্র এৱার্দ (২০২২) পনবা য়াই।
সোর্স: পোক্নফম
0 কমেন্ট:
কমেন্ট তৌবিয়ু