• 194
• ৮ই সেপ্টেম্বর ২০২৪ ইং
• Share on:

শান্তিগী য়াকাইরোল শক্লিবী আর কে সনাহনবী চনুগী শৈরেং লাইরিক “লান খাম্লে ইমানা”    -- তোংব্রম অমরজিৎ

 ইংনা চিকনা শান্তি ওইনা লৈজরম্বা ইরমদম মনিপুর ঙসিদি কাংলুপ ফুরুপ নাইবা মশাগীতা কনবা লুচিংবা খরনা নাকপাক তাহন্নবা খুজিল থৌরাং ফাওবা তৌরক্লি। অসিগুম্বা পুকনিং থম্মোয়না য়ানিংদবা থৌদোকশিং থোক্লকত্রিঙৈগী মমাংদা অইবা অইবীশিংনা তুংদা ওইহৌগদবা, থোক্লক্কদবা থৌদোকশিংবু মচিন্দা লাই তোংবগুম লাইফাও ওই শৈরেং ইদুনা হেক্তা ফোংদোকলকই। ৱাখৈ অমগী লংলা অদু অসি তৌরগদি শাফগনি হায়না পুকমেল পাউমেল্লকই অদুসু শৈরেংগী খুত্থাংদা। ভিসন অমা উরক্লি অইবী আর কে সনাহনবীসু কংলৈ ইমানা থোক্লকতুনা লান খাম্বগী শক্তম অমা ...

লাইরিক্কী মমিং- লান খাম্লে ইমানা (২০১৮)
অইবী- আর কে সনাহনবী (লীকখোম্বী) চনু
অফোঙবা- সনাতোন রাজকুমারনা ‘ইমাখোল’গীদমক ফোঙজবা
লাইরিক্কী মখুম- ডা. মাখোনমনি মোংসাবা 
লাইরিক্কী মমল- লুপা ২০০/- লমায় মশিং- ১৩০ 

আর কে সনাহনবী (লীকখোম্বী) চনু ১৯৬২গী ফেব্রুৱারী ১দা লুৱাংশংবম মখা লৈকায়দা পোকই। আর কে চীংলেনসনা অমদি মংশাতাবম নিঙোল আর কে ওংবী পিশক শিজগী মচানুপী অহলনি। সনাহনবী সাইন্স গ্রেজুয়েটনি। মীতৈ ময়েক্কী ইনস্ট্রক্তর কম লিডরশিপ ট্রেনিং কোর্স পাস তৌরে। শিনফম্না ওজানি। ওল ইন্দিয়া রেডিওগী শকখঙলবা শৈরেংবীনি। ইমাখোল, পাৱক, লৈকোল, ইপাক ফিল্ম প্রদক্সন, অম্মিক, শৈপাল, শাল, সিনে রাইটর্স গীল্ড হায়রিবা লমদম অসিগী খোরিলোলগী, ফিল্মগী, শৈরাংবশিংগী লূপ কয়াগী মেম্বর ওইরি। মনিপুরী খোরিলোলদা অইবীনা তৌরিবা মমল য়াম্লবা খুদোল অসিবু শকখঙবা ওইনা সাহিত্য একাদেমি, নিউ দেল্লীগী ২০১৯গী ‘বাল সাহিত্য পুরুস্কার’, মহাক্কী অঙাংশিংগী খোরিলোলগী প্লে ‘থৱায়গী থৱায়’ দা  পীদুনা ইকায়খুম্নবা উৎখি। ঙসিসু ইবগী লমসিদা লেপ্তনা থৌনা লৈনা চংশিল্লিবী ইচং থৌবী অইবী অমনি।   
 

মালেম তাইবঙপালসিদা মীওইবনা লৈরিবমখৈ লান হায়বসিদি অদুমক শোকনদুনা লৈখিগনি। অদুবু করম্না লান থোকহল্লোই হায়বগীসু পোরম পোমিৎ অদুমক লৈগনি। অফবা লৈরবদি ফত্তবসু লৈবগুম, অঙানবা লৈরবদি অমম্বা লৈবগুম মীওইবা খুনাই মরক্তসু অফবা ফত্তবা অনীমক পুন্না হিংলি। ফত্তবনা লাঙ্গোই চল্লকপা মতম,অচুম্বা হায়বদু করিনো খঙলক্তবা অমদি অফ ফত্তা করিনো খন্থরক্তবা মতমদা মশা মশাগীতা খন্দুনা ঐ মঙাইরে হায়দুনা হে তোংলকপা মতমদা লান হায়বদুদি হেক্তা থোকই। তৌইগুম্বসু অসিগুম্বা মীওইবা খুনাইদা শিংনরক্লবা শান্তি হায়বদু লৈরক্তবা মিকুপশিংদা শান্তিগী পাউজেল পুবা মীওই কাংলুপসু থোক্লক্তবা নত্তে। অসিগুম্বা শান্তি পামজবা ইংবা তপ্পা মীওইবা খুনাই অমা ওইহঞ্জনিংবা কয়াগী মরক্তা খোরিলোল শুরিবা অইবা অইবীশিংসু চোংথোক্লক্তবা ঙমদে মীওইবা খুনাইগীদমক্তা। ইংনা চিকনা শান্তি ওইনা লৈজরম্বা ইরমদম মনিপুর ঙসিদি কাংলুপ ফুরুপ নাইবা মশাগীতা কনবা লুচিংবা খরনা নাকপাক তাহন্নবা খুজিল থৌরাং ফাওবা তৌরক্লি। অসিগুম্বা পুকনিং থম্মোয়না য়ানিংদবা থৌদোকশিং থোক্লকত্রিঙৈগী মমাংদা অইবা অইবীশিংনা তুংদা ওইহৌগদবা, থোক্লক্কদবা থৌদোকশিংবু মচিন্দা লাই তোংবগুম লাইফাও ওই শৈরেং ইদুনা হেক্তা ফোংদোকলকই। ৱাখৈ অমগী লংলা অদু অসি তৌরগদি শাফগনি হায়না পুকমেল পাউমেল্লকই অদুসু শৈরেংগী খুত্থাংদা। ভিসন অমা উরক্লি অইবী আর কে সনাহনবীসু কংলৈ ইমানা থোক্লকতুনা লান খাম্বগী শক্তম অমা। চীংলৈবাক্কী ইমা মনিপুরনা চোংথোক্লক্তুনা লান খামহল্লকলি। খোঞ্জেল থোকনা কংলৈ ইমানা হায়রক্লি ‘লান খাম্লে ইমানা’ হায়না মিংথোনবা লাইরিক  অসিগী মিংথোল ওইরিবা শৈরেং অসিদা অসুম্না, “লেপ্লো নঙগী লানপুংগী পুংখোল/ হে লানপুং থিনবা!.../ লাল্লোইহনবা/ লান লেপ্পু খুদক্তা/ ইতম্বাকসে লানফম ওন্থোকনবা/ নাউপুরকপরা,/ নাউয়োক্লকপরা,/ নাউয়োক্লকপরা নখোয়বু?/ লান খাম্লিবসে/ অতৈ কনা নত্তে/ পলেম নমা ঐহাকনি/ পন্থৌগী য়াথংনি/ লান লেপ্পু খুদক্তা…/ পন্থৌনা হৌবু লাউরক্লে/ শিন্থা থৌবু পীরক্লে/ হৌ হৌ হৌ হৌরো/ ইমা থৌরৈ তেংবাঙগে,…/ লৈঙাকপুং।/ খ্রিং খ্রিং খিংদোক্লো/ নতীক নয়াই ফুদোক্লো/ লৈঙাক চুপ্লি চেৎনা পায়রো/ ঈরীক ঈশেং খীকনা চাইনা/ ইমানা পরিং চুম্বীগে/…” (লাঃ ৭০-৭১) য়াকাইরোল ঈশৈনি অইবীনা মতাং অসিদা মতম অসিগী ইহুল খঙনা শৈশকহল্লক্লিবসি। ঐখোয় মশেল চাওবা তান্নবা, হুন্নবা, থাজনদবা অমসুং লৈবাক্কি খনদবা লুচিংবা শাবশিংনা কাং খোং চায়বগুম্না পাল্লক্লিবা লমদম অসিদা হঞ্জিন হঞ্জিন য়াকাইরোলদি শক্তবা য়ারোই। মিকপ থোকপা মতম থিন্থরবনি।  

অপিকপা ফুরুপ কাংলুপশিংবু ঙাক শেন্নবা ভরতকি সংবিধাননা অখন্নবা হকশিং পীরি। অদুবু হায়রিবা হক অদু লৈনা লৈনা মীশিং য়ামজদবা কাংলুপ ফুরুপশিংদি  মীশিং বিলিয়নদা পাথোক্তুনা লৈরবা কাংলুপশিংনা তপ্না তপ্না মখোয়গী খায়াৎনুংদা য়োৎশিনবগুম তৌরক্লি। অসিগুম্বা ফিভম মতম অসিদা অইবী সনাহনবী( লীকখোম্বী) চনু ইরমদম অসিগী মরাইবক্কী খনবদা মিপাইদবা ঙমদে। মসিগী ময়েক লারবা মমিনি মহাক্কী সিম্বোলিক ওইবা শৈরেং ‘কোন্থোঙ চেৎনা লোনশিল্লু’ হায়বসিদা ফোংদোক্লকলিবা নুংগী ৱাফমসু। অইবীনা হায়রক্লি, “ কনা কনানোনে/ ফূৎ-ফা, ফূৎ-ফা/ ফাওজীন্নরক্লিবা ময়ামসীবো?/ শকঙবা অমত্তসু য়াওদেনে/ পংচঙদা চঙলকইনে তৌরিসে” পরেং খরসি কংলৈ পোকপী ইমানা হায়হল্লকলি। ঙসি ইললিগেল ইমিগ্রেন্টশিংগী ইসুনা ৱাহৌ ওইদুনা লমদম অসিদা থোকহন্নিংদবা থৌদোকশিং লেপ্তনা থোক্লকলি। মসিদা খূ শেন্দবা য়াদে হায়বদু য়েলহৌ ফুরুপ ওইরিবশিংদা পাউজেল পীনিংই চেকশিন্না মিকুপ নাহুম শিংনা লৈনবা হায়দুনা। অদুনা কংলৈ ইমানা থোক্লক্তুনা পাউমেল্লকলি, “ পারী ইমোমশা!/ কোন্থোঙ লোনশীন্দ্রবো নখোয়বু?” কোন্থোঙ হায়বা ফজখ্রবা ৱাহৈ অমসুং ৱাহন্থোক লৈখ্রবা অসিগী ৱাহন্থোক অসি ঙসিগী লূচিংবশিংনা খঙলিগদ্রা হায়বসিসু হংনিংঙাই ওইরক্লি। ইশাগী ইরমদম, ইপা ইপুগী হৌরকফম লমদম, য়েলহৌ ফুরুপশিংগী খোরি নাওফম তাফম ওইরিবা অসিদা অমুক লাঞ্জেন্নবা হায়বসিদগী হেন্না ফিভম শোকপা অমসুং লূবা ৱাফম লৈতে। মঙলাকনবগুম কবিনা ফোঙদোক্লকলি, “পন্থৌ ইংখোল চাইগোয়নুং/ শুমাঙ-থেল্লোং, শঙ্গোয়-লূকোয়/ নম্বো থাবো থাখরে/ ফম্ব-ও, হিপ্প-ও/ নয়ুম য়ুমজাও য়ৌশিল্লক্লনি/ ইমাদি চরম ফুল্লেদা।” (লাঃ ৪৭)  
 

লাইরিক অসিদা পুন্না শৈরেং ৭২ য়াওরি। তোঙান তোঙানবা থিমদা চাংয়েং তৌদুনা নিংথিজনা ফোঙদোকপা তোপ তোপ্পা শৈরেংগী মহাও চেল্লবা কয়াসু থেংনবীগনি। লেপ্তনা ইরিবা অমসুং চংশিল্লক্লিবা শৈরেং অমদি খোরিলোলগী খোঙচৎ অসিদা মায় পাকনা অদুমক চংশিনবীগনি হায়না থাজবা থমজরি।