মীনা দেবীগী ‘তং তাদ্রবদা’ শৈরেং লাইরিক ফোঙখ্রে
ইম্ফাল, সেপ্তেম্বর ৮ : রাজকুমারী মীনা দেবীনা ইবা শৈরেং ৮২ য়াওবা ‘তং তাদ্রবদা’ হায়বা শৈরেং গী লাইরিক অমা সাহিত্য একাদেমি এৱার্দি ক্ষেত্রি রাজেননা অয়াংপল্লি রোদতা লৈবা পার্সনেলিতি দিবেলপমেন্ত ত্রেনিং সেন্তরদা ঙসি পাঙথোকপা অচম্বা থৌরম অমদা ফোঙদোকখ্রে।
ক্ষেত্রিময়ুম শান্তনা প্রিসাইদ তৌদুনা অমসুং দাঃ রাজকুমার সনাজাওবা সিংহনা গেস্ত ওব ওনর ওইদুনা পাঙথোকখিবা লাইরিক ফোঙবগী থৌরম অদুদা ক্ষেত্রি রাজেননা হায়খি, শৈরেং ইরিবা ইরিবীশিং অসি অপুননা পুবনা অয়াম্বনি। মখোয়না শৈরেং ইরিঙৈগী মতম অসিদা সংসার অসি কাঙথোক্তুনা মখোয়গী মপূক্নিং দা ফাওরকখিবা থম্মোয়গী ঈহুল অদু ফোঙদোক্নবা হোৎনৈ। মতমদুদা মখোয়গী পূক্নিং ৱাখল অদু মপান্থোং গী ঈথিল অমত্তনা লেপহনবা ঙমহন্দবা হায়বা অসি মখোয়গী মণি মুক্তাগুম্না লংলবা মগুণনি। মসিগী গুণসিমক রাজকুমারী মীনা দেবীগী শৈরৈংশিং অসিদা মমি তাবা উরি।
রাজকুমারী মীনা দেবীগী অহুমশুবা শৈরেং লাইরিক অসি মহাক্কী হান্না ফোঙদোকখ্রবা লাইরিকশিংদগী পুমতোং তোঙানবা মহাও পীবা হৌজিক্কী তংদু লৈতাদ্রবা ইতিহাসকী তাঙ্কক অসিবু তরং তরংনা য়েক্তুনা খ্বাই মীয়ামদা মরু ওইনা মরৈবাক মরমদম্বু নুংশিজবা মীওইশিংদা উৎপা শৈরেং লাইরিক্নি হায়না রাজকুমার সনাজাওবা সিংহনা ফোঙদোকখি।
প্রেসিদেন্তকী ৱারোল পীরদুনা ক্ষেত্রিময়ুম শান্তনা রাজকুমারী মীনা দেবীগী শৈরেং লাইরিক অসি অনৌবা মতম অসিগী মণিপুরগী তং তাদ্রবা ফীবম অসিনা লমদম অসিবু অমুক হন্না তংদু লৈতাবা সনাগী লৈবাক অমা ওইরক্নবা ৱাখলগী মমি তাই হায়খি।
সোর্স: পোক্নফম
0 কমেন্ট:
কমেন্ট তৌবিয়ু