লিসিপ্রিয়া কাঙুজমনা য়ুএন-সিওপি ২৮ ক্লাইমেত কনফারেন্সতা ৱা ঙাঙখ্রে
ইম্ফাল, দিসেম্বর ৬ : চহী নৌরিবী মালেমগী মীয়াম্না থোইদোক হেন্দোক্না শকখঙনরবী মীতৈ চনু লিসিপ্রিয়া কাঙজমনা হৌজিক দুবাইদা পাঙথোক্লিবা য়ুনাইতেদ নেসন্স ক্লাইমেত কনফারেন্স ২০২৩, মীয়াম্না সিওপি ২৮ হায়রগসু খঙনবা মালেমগী য়াম্না মরুওইবা মীফমদা ৱা ঙাঙলদুনা মণিপুরদা হৌজিক থোক্লিবা ঈরাং অসিদা মীতৈ লানখিদে হায়না ফোঙদোকখ্রে হায়রি।
মালেমগী লুচিংবা কয়া উনদুনা ক্লাইমেত চেঞ্জনা অৱাবা নংহল্লবা লায়রবা চাওখৎলক্লিবা লৈবাকশিংগীদমক ইনাকখুনবা লৈবাকশিংনা ডলার বিল্লিয়ন কয়া পীবীনবা তকশিনখি। মহাক্না সিওপি ২৮ গী ফেথ সেসন্দা ফোঙদোকখিবদা, হৌজিক থোক্লিবা লান অসি য়েলহৌমীসু ওইদবা কুকি কৌবা মী কাঙলূপ খরনা য়েলহৌমী অমদি লাইনিংগী মিংদা হৌখিবা মে ৩দা ঈরাং হৌদুনা মীতৈশিংগী য়ূম কয়া মৈ থাদুনা লান অসি হৌরকখিবনি। মখোয়গী অরোনবা এজেন্দাদি কুকিলেন্দ অমা শেম্বনি। অদুবু মখোয়গী মঙলান অসি শুকওই ওইথোক্লই হায়খি।
লিসিপ্রিয়া কাঙুজমনা সিওপি ২৮ গী ফেথ সেসন্দা শরুক য়াবগী মতাং অমা Pic.@ Licypriya Kangujam
কুকিশিংনা ঈরাং অসিদা মীতৈ নুপী কয়া ইকায়খুম্নবা মাঙহনবীরি। অঙাং কয়া থিবা ফংদ্রি অমদি নহা কয়াবুনা পুল্লপ পুল্লপ পরেং লেপফন্দুনা নোংমৈনা কাপ্তুনা নুংতিগী হাৎপীরি। ঙরাংসু কুকিশিংনা খূৎলায় পায়জদবা খুল ঙাকপা অঙাং য়াওনা নহা ১৩ মীহাৎ থিনা হাৎপগী পাউ মালেম শিনবা থুংনা য়ৌরিবা অসিনা অশেংবা সাক্ষিনি। মসি মীতৈ ফুরুপ অসি মুত্থৎনবা চঙশিল্লকপা অফোঙবা জিনোসাইদনি।
মালেমগী কম্যুনিতিশিংনা নাকল নাম্মগী মীৎয়েং নত্তবদা ঙল্লিঙৈদা অচুম অরান থিদুনা থিংহৌবনা অচুম্বা ওইগনি। অদুগা থোক্লিবা লান অসিসু লাইনিংগী মিংদা শোক্নবা লান নত্তে। মসিদা মীতৈ খৃষ্টান হায়বা অমা লৈতে অমদি মেজোরিতি মাইনোরিটি হায়বা লৈতে হায়খি।
মীতৈ হায়রিবা ফুরুপ অসিদি মালেমগী অপীকপা ফুরুপনি। মীতৈদি মী মিলিয়ন ১.৫ রোম লৈবদা কুকিদি মালেমগী ওইনা মী মিলিয়ন ৩ রোম হেন্না লৈ। মখোয়দি মিজোরাম, বর্ম্মা অমদি ইজরেলদা মশীং য়াম্না তাই। মরম অসিনা মাইনোরিতি ওইরিবা অসি কুকিরা হায়বসি মীয়াম্না লেপ্পীয়ু। মীতৈশিংনা জস্তিস পাম্মী।
লিসিপ্রিয়া কাঙুজমনা য়ুএন-সিওপি ২৮ ক্লাইমেত কনফারেন্স শরুক য়াবগী মতাং অমা Pic.@Licypriya Kangujam
লিসিপ্রিয়ানা য়ু এ ইগী প্রেসিদেন্ত মোহমদ বিন জায়েদ, মঙ্গোলিয়াগী প্রেসিদেন্ত উখনাগীন খুরেলসুখ, কলম্বীয়াগী প্রেসিদেন্ত গুতাভো পেত্রো, ইতালিগী প্রাইম মিনিস্তর জোরজিয়া মেলোনি, য়ুএসএগী ভাইস প্রেসিদেন্ত কমালা হেরিস, ইজিপ্তকী প্রেসিদেন্ত এল সিসি, ইস্ত তিমোরগী প্রেসিদেন্ত জোস রাম্মোস হোর্তা, নোর্জেগী প্রাইম মিনিস্তার জোনাস গার, ফ্রাঞ্চকী প্রেসিদেন্ত ইম্মানুয়েল মাকরোন, য়ুকেগী নিংথৌ কিং চার্লস ৩, ভেতিকানগী হেদ পোপ ফ্রান্সিস অমদি য়ু কেগী প্রাইম মিনিস্তর রিশি সুনাক্নচিংবা লুচিংবা কয়া উনদুনা মালেমগী ক্লাইমেত চেঞ্জনা অৱাবা তাহল্লবা লৈবাকশিংগীদমক ডলার বিল্লিয়ন কয়া লোস এন্দ দেমেজ ফন্দদা হাপ্পীয়ু হায়না তকশিনখি।
লান তৌদুনা ডলার বিল্লিয়ন কয়া মাঙহনবগী মহুত্তা মালেমগী লায়রবা কোকহনবদা অঙাংশিং, মহৈ মশিং তমহনবদা অমদি ক্লাইমেত চেঞ্জ থেংনবদা ওইনা ঐখোয়না শীজিন্নরবদি কয়াদা নিংথিজবা মালেম অমা ওইগনি হায়না লুচিংবশিং অদুগী পূক্নিং চিংশিনখি।
ঐখোয়না মালেম অসি কনগে হায়রবদি ক্লাইমেত চেঞ্জ থোকহল্লিবা ফোসিল ফ্যুএলশিং অসি ক্লিন ইনর্জিনা অথুবা মতমদা শিন্দোকপা মথৌ তাই হায়খি। লিসিপ্রিয়া মখা তানা দিসেম্বর ১২ ফাওবা পাঙথোক্কদৌরিবা সিওপি ২৮ মীফম অসিদা তোঙান-তোঙানবা সেসন কয়াদসু ৱা ঙাঙখিগনি। থৌরম অসিদা ইন্দিয়াগী প্রাইম মিনিস্তর নরেন্দ্র মোদিসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু