লাইরিকশিং মীতৈ ময়েক্তা ইথোকহন্নিংই: এম এল এ করাম শ্যাম
ইম্ফাল, ফেব্রুয়ারি ৪ : লমদম অসিগী তুংগী মীরোলশিংগী খল্লগা খোরিরোলদা খূৎ থারিবশিংনা স্তেত অসিদা হান্না লৈখ্রবা বেঙ্গলি ময়েক ওইবা মীতৈলোনগী লাইরিকশিং অসি মীতৈ ময়েক্তা অমুক হন্না ইথোকহন্নিংই। মসিনা স্তেত অসিদা তুংগী লান ওইগদবা ইশাগী ইরোল, ইয়েক্তা ইজবা লাইরিক কয়া মরাং কায়না লৈবগী মথক্তা তুংগী মীরোলশিংদসু লাইরিক্তগী ফংবা য়াবা মখল কয়াগী পূক্নিং লৌশিং ফংবা ঙমগনি হায়না লংথবাল এ সিগী এম এল এ করাম শ্যামনা ফোঙদোকখ্রে। এম এল এনা ৱাফম অসি রাজেন তোইজাম্বনা বেঙ্গলি ময়েক্তগী মীতৈ ময়েক্তা ইথোক্লবা ‘চহী তরেৎ খুন্তাকপা’ অমসুং ‘সাহিত্য অমসুং নাৎকী ৱারেং খরা’ হায়বা লাইরিক অনী অসি ফোঙবগী থৌরমদা ফোঙদোকখিবনি।
অশাংবা কম্যুনিকেসন্না শীন্দুনা মণিপুর স্তেত ফিল্ম দিবেলপমেন্ত সোসাইটিগী প্রিভিউ থিয়েটার হোলদ পাঙথোকখিবা থৌরম অদুদা এম এল এ করাম শ্যামনা মখা তানা হায়, স্তেত অসিদা মীতৈ ময়েক খঙবা মী কয়া মরাং কায়না লৈরমগনি অদুবু বেঙ্গলি ময়েক্তগী মীতৈ মচেক্তা ইথোকপা নৎত্রগা ওন্থোকপগী থবক তৌরিবা অসিদি তশেংনা থবক অসি তৌগেনা খনবা, খোরিরোলদা ঙাওজবা মী খক্তনা তৌই। মরম অসিনা খোরিরোলদা খূৎ থারিবশিংনা হনবা লৈতনা তুংগী মীরোলগী খল্লগা বেঙ্গলি ময়েক্তগী মীতৈ ময়েক্তা ইথোক্নবা অমসুং ওন্থোক্নবা থবক পায়খৎপীয়ু।
লমদম অসিগী হৌরক্লিবা নহারোলশিংদা মণিপুরগী মশক নাইরবা, খোরিরোলদা লুপ্লবা অদুবু ইবগী থৌনা লোইশিল্লক্লবা অইবা-অইবীশিং অসিদগী ৱাখল্লোন ময়াম অসি ফজনা লৌহৌবীয়ু। মসি লৌহৌরগা খোরিরোলদা খূৎ থারবদি তুংগী হৌরক্লিবা মীরোলশিংদা মখল মখা কয়াগী পূক্নিং-লৌশিং ফংবা য়াবা লাইরিক কয়া ফংগনি খল্লি হায়না শ্যামনা ফোঙদোকখি।
থৌরম অদুদা মণিপুর সাহিত্য পরিষদ ইম্ফালগী প্রেসিদেন্ট লোংজম জয়চন্দ্র অমসুং দি কালচারেল ফোরাম মণিপুরগী প্রেসিদেন্ট প্রোফেসার হুইরেম বিহারী সিংহসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু