আপডেট:
image

বাংলাদেশকী মীতৈশিং মীখা থানা হিংবা য়াদে হায়বা ৱাখল্লোনবু চেৎনা থাগোন্নদুনা লৈহৌরি - জ্ঞানন্দ নাওরেম

 

মণিপুরী/মীতৈ অয়াম্বা বাংলাদেশ লৈঙাক্কী নৎত্রগা লন্নাই থবক তৌবা নৎত্রগনা লল্লোন ইতিক তৌদুনা হিংনবা হোৎনবনা অয়াম্বনি। লৌউ-শিংউ তৌদুনা য়াম্না ৱানা হিংনবা হোৎনবা মীগী মশীংদি য়ামহৌদে। বাংলাদেশতা লৈরিবা মীতৈ অয়াম্বা ময়ায় ওইবা পুন্সি মহিং অমদা হিংহৌরি। বাংলাদেশকী মণিপুরীশিংনা ফত্তবা থবক অমত্তা তৌদবনা অতোপ্পা কাঙলূপকী মীওইশিংনা মখোয়বু থাজবা অমসুং ইকায়খুম্ননা চৎপা ফুরুপ অমসু ওইহৌরি।


মণিপুরগী মপান্দা খুন্দাখিবা মণিপুরীশিংগী মনুঙদা বাংলাদেশতা খুন্দারিবা মণিপুরীশিংনা মপূং ওইনা খুন্দাবা হৌরকখিবা খুল অমনি হায়না লৌনরিবা লৈবাক অদুগী গাজিপুর, হবিগঞ্জ দিষ্ট্রিক্টতা লৈরিবা বিশগাঁওদা লৈকায় মশীং য়ামখৎলকপগী মহুত্তা হান্না লৈরম্বা লৈকায় মশীংদগী শুপ্নতগী লৈকায় ৩ খক্তমক ঙাইহৌরে। হান্না লৈরম্বা লৈকায়শিংনা বাঙ্গালি অমসুং বাঙ্গালি মুসলিমশিংনা তপ্না তপ্না খুন্দাশিল্লক্লে হায়হৌই।

 

বিশগাঁওদা লৈরম্বা খুলশিংগী মমিং ওইনা পনবা য়াবদা চিরোম লৈকায় (যাত্রা গাঁও) ফাটাবিল, মাইমোম লৈকায়, বামোন লৈকায় (ঠাকুরগাঁও), মাইবম লৈকায়, করাম লৈকায়, খোলা (কাটানিপার), টুবাতলি, দুধপাটিল, বনগাঁও, টিলাবাড়ি, বোর্জুম, কাঠালিপাড়া, চম্পক নগর, ছনখলানচিংবনি হয়ারি। লোয়ননা হৌজিক ত্রিপুরাগী খোৱাই দিষ্ট্রিক্টতা বিশগাঁওগা থংননা লৈবা দুরনগর, জাম্বুরা, কোর, বোইসমারা, গৌড়নগরনচিংবা খুল কয়া বিশগাঁওগী মনুং চল্লম্বনি হায়রি । অদুবু কুমজা ১৯৮৭তা লৈবাক অসিগা পাকিষ্টানগা লম খাইদোক্নখিবনা হৌজিক খোৱাই দিষ্ট্রিক্টতা তারিবা খুলশিং অসি বিশগাঁওদগী চৎখিবনি হায়রি।

 

বিশগাঁওগী মৈতৈশিংনা মতম অদুদা মণিপুর, আসাম অমসুং ত্রিপুরানচিংবা মীতৈ তাবা মফমশিংগা য়াম্না নক্নবা মরী লৈনরম্বগী মরমনা বিশগাঁও নাৎ-কালচার, খোরিরোল, স্পোর্টসনচিংবদা য়াম্না থৱায় য়াওনরম্মী। মতম অদুদা নট সঙ্কির্টন শকপা, পুঙ য়ৈবা, ৱারী লীবা, লাইরিক হায়বা-থিবা নৎত্রগা মাইবা শাবদা য়াম্না মতিক ময়াই লৈবা মীশিং বিশগাঁওদা পোকখিবনি। মরম অদুনা বাংলাদেশ অপূম্বদা মীতৈ তারিবা মফমশিংদা ইকায়খুম্নবা ঙাকপগী মাঙজিল থানা লাকখিবনি হায়রি।

 

মণিপুরদা নিংথৌ খাগেম্বনা লৈঙাক্লিঙৈ মতম কুমজা ১৫৯৭-১৬৫২ দগী হৌদুনা মণিপুরী মীতৈশিংনা বাংলাদেশতা খুন্দাবা হৌরকখিবনি। মীতৈশিংনা হেন্না মপূং ওইনা খুন্দাখিবনা কুমজা ১৮১৯ দগী ১৮২৬ ফাওবা অৱাগী মখূৎতা মায়থীদুনা মণিপুরদা চহী ৭ খুন্তাক্লিঙৈগী মতমদা য়াম্লবা মণিপুরীশিং থৱায় কন্নবগীদমক আসাম, ত্রিপুরা অমদি বাংলাদেশতা লাঞ্জেল্লক্তুনা লৈনখিবনি হায়নসু বিশগাঁওগী অহল লমনশিংনা ফোঙদোরকখি।

 

বিশগাঁওদা লৈরিবা আবাদগাঁও, খুনৌ অমসুং গোবরখোলা হায়রিবা খুল অসি হৌজিকসু মীতৈশিংনা খুন্দারি। আবাদগাঁওদা য়ূম্নাক ২৭, খুনৌদা য়ূম্নাক ৩৫ অমসুং গোবরখোলাদা য়ূম্নাক ৬ খক্তমক ঙাইশিল্লক্লে। বিশগাঁওদা লৈরম্বা খুলশিং করিগীদমক মশীং হন্থরক্লিবনো হায়দুনা হংলুবদা খুলগী অহলশিংনা হায়, বিশগাও অসি টাউনদগী য়াম্না লাপথোক্না লৈবনা থবক ইনখাং, লৈঙাক্কী নৎত্রগা প্রাইভেটকী থবক তৌবগী খুদোংচাবা ইফং ফংদে অমসুং লল্লোন ইতিক তৌনবগী খুদোংচাবা লৈতবনা হেন্না চাওখৎপা অমসুং খুদোংচাগদবা সিটিশিংদা চৎনখিবা অমসুং য়ুম হোংনখিবনা মপূং ওইবা মরমশিংনি হায়রকখি।

 

মণিপুরী/মীতৈ অয়াম্বা বাংলাদেশ লৈঙাক্কী নৎত্রগা লন্নাই থবক তৌবা নৎত্রগনা লল্লোন ইতিক তৌদুনা হিংনবা হোৎনবনা অয়াম্বনি। লৌউ-শিংউ তৌদুনা য়াম্না ৱানা হিংনবা হোৎনবা মীগী মশীংদি য়ামহৌদে। বাংলাদেশতা লৈরিবা মীতৈ অয়াম্বা ময়ায় ওইবা পুন্সি মহিং অমদা হিংহৌরি। বাংলাদেশকী মণিপুরীশিংনা ফত্তবা থবক অমত্তা তৌদবনা অতোপ্পা কাঙলূপকী মীওইশিংনা মখোয়বু থাজবা অমসুং ইকায়খুম্ননা চৎপা ফুরুপ অমসু ওইহৌরি।

 

মফম অসিদা লৈরিবা মীতৈশিংনসু ঐখোয়দি য়াম্না হন্থবা থাক্তা হিংবা য়াদে, ঐখোয়গী ইপা ইপুশিংনা মীখা থানা হিংবা য়াদে হায়বা ৱাখল্লোন অদু ঙসিসু বাংলাদেশতা লৈহৌরি। মসিনা মরম ওইরগা মচা মশুশিং লাইরিক নীংথিনা তমহন্দুনা হোৎনবা য়াবা কয়া কন্না হোৎনহৌরি। মীতৈশিংগী মরক্তা বাংলাদেশ মিনিষ্ট্রিগী এদিসনেল সেক্রেটারী, জজ, ডাক্তার, দেপ্যুটি কমিশনার, এদিশনেল দেপ্যুটি কমিশনার, পুলিশকী এস পি. এদিশনেল এস পি, এসিষ্টেন্ট কমিশনার, এদভোকেট, লেকচারার, ওজা, বেঙ্ক তৌবা মীওই কয়া য়াওনা অচৌবা ফম পায়দুনা বাংলাদেশ লৈবাক্কী লৈঙাকলোন ফাওবদা শরুক য়াবসু য়াওরে হায়না ফোঙদোরক্লি।

 

হৌজিকমক্কী ওইনা বাংলাদেশকী করম করম্বা মফমশিংদা মীতৈশিংনা খুন্দারিবগে হায়না হংখিবা ৱাহংগী পাউখুমদা হবিগঞ্জ দিষ্ট্রিক্টতা গোবরখোলা, আবাদগাঁও অমসুং শিবনগর য়াওরি। মৌলভিবাজার দিষ্ট্রিক্টতনা খাজিপুর, বিলাশর (টিকরিয়া), রামনগর, মঙ্গলপুর, চিৎলিয়া, নিলকুঠি, ছয়চিরি, মাধবপুর, হকটিয়ারখোলা, কাটাবিল, শ্রীপুর, গঙ্গানগর, ভানুবিল, তেতইগাঁও (মঙ্গে মখোঙ), নয়াপত্তন, ছনগাঁও, কোনগাঁও, ফটিগুলি, ভান্ডারিগাঁও, নলধরি, বরইতলী, গোয়ালবাড়ী, ছোটধামাই, গৌনগর, পাথারি, পুথাডর য়াওরি।

 

সিলেট দিস্ট্রিক্টকী মনুংদনা মণিপুরী রাজবাড়ি, লামাবাজার, লালাদিঘীরপার, নরসিংহটিলা, সাগরদিঘীরপাড়, কেওয়াপাড়া, সুবিদবাজার, আম্বরখানা, বড়বাজার, শিবগঞ্জ, নয়াবাজার, দক্ষিণগাঁও য়াওরি। অদুগা সুনামগঞ্জ দিষ্ট্রিক্টকী মনুংদনা রতনপু অমসু নগালখাট য়াওরি হায়রি। হায়রিবা খুলশিং অসিদা মণিপুরী/মীতৈশিংগী মশীং চাওরাক্না লিশীং ১২ রোম খুন্দারি।

 

মহৈ তম্ফমদা অমদি বাংলাদেশকী অতোপ্পা কাঙলূপশিংগা ৱারী ৱাতাই শানবদা, কৈথেলদা বেঙ্গলি ঙাঙলবসু মৈতৈলোন মাঙখিদনবা য়ূম য়ূমদা নৎত্রগা মণিপুরী/মীতৈশিংনা ৱারী শানবা মতমদদি অয়াম্বনা শীজিন্নহৌরি। অদুবু বাঙ্গালিশিংগা অসুম লৈমিন্নরকপনা বাঙ্গালি লোন অসিগা অদুমক খরদি য়ানশিন্নরে।

 

বিশগাঁও মণিপুরী ফেষ্টিবেল ওরগানাইজিং কাউন্সিল, বিশগাঁওনা শীন্দুনা মণিপুরীশিংনা ইহান হানবা ওইনা খুন্দারকখিবা বাংলাদেশকী খুল অসিদা তুংগী মীরোলনা নীংশিংদুনা লৈহৌনবা খুল অসিদগী হৌরকখিবা মফম অমসুং মতমনা য়াদদুনা বাংলাদেশকী তোঙান তোঙানবা মফমশিংদা হোংদুনা লৈখ্রবা মণিপুরী কয়ানা ঐখোয়গী নাৎ, চৎনলোন, লোন অমদি হৌরকলোন য়াওনা হৌজিক্কী মীরোল অসিনা কাউনরকপদৌনা তৌরক্লে। মতম অমদা মীতৈশিংগী মশেলগী মরক্তা অমগা অমগা অরৈ-লৈত তাথোক তাশিন তৌনরম্বদু ঙসিদি মাঙশিল্লক্লে। অসিগুম্বা ফীভমসিদগী মীতৈশিং পূন্না অমগা অমগা উন্নমিন্নদুনা অমসুং ৱারী ৱাতাই শানদুনা পাউ ফাওদোক্নবগী মথৌ তারে হায়বদগী কুমজা ২০২০ দা অহানবা ওইনা ‘বিশগাঁও মণিপুরী ফেষ্টিভেল’ হৌদোক্তুনা পাঙথোকখি। হন্দক ফেষ্টিভেল অসি অনীরকশুবা ওইনা পাঙথোকখ্রে।

 

ফেষ্টিবেল অসিদা হন্দক্কী ওইনা মণিপুরদগী ব্লু বেন্দ মিউজিক বেন্দনা মপূং ওইবা থৌদাং লৌদুনা শক্নাইরবা শৈশকপা শৈশকপী কয়ানা মীতৈগী ইনাক খুল্লবা নাৎ অমসুং চৎনবী লৈরি হায়না মীয়ামদা উৎখি। থৌরম অসিনা বাংলাদেশতা লৈরিবা মণিপুরীশিংগী ৱাখলদা চাওথোকচবা পোকহল্লি হায়নসু শরুক য়ারখিবশিংনা ফোঙদোক্নরকখি।

 

সোরাইজম উৎপল (জেনারেল সেক্রেটারি, বিশগাঁও মণিপুরী ক্লাব) না ফোঙদোরকপদা বিশগাঁওদা মণিপুরীশিংনা চাওথোকচনীংঙাই ওইরিবদি মফম অসিদা লৈরিবা মণিপুরী ক্লাব অসিসু অমনি। ক্লাব অসি কুমজা ১৯৮০ দা লিংখৎখিবা ক্লাবনি। বাংলাদেশকী মনুং চনবা হবিগঞ্জ দিষ্ট্রিক্টতগী সিলেট ডিভিশন ফাওবগী মনুংদা খ্বাইদগী অরিবা ক্লাবশিংগী মনুঙদা অনী নৎত্রগা অহুমশুবদা লৈরবা ক্লাবনি হায়রি।

 

বাংলাদেশকী কুমজা ১৯৭১ গী নীংতম লান লোইরগা ক্লাব অসি লিংখৎখিবা বিশগাঁও খক্তদা নত্তনা বাংলাদেশতা লৈরিবা মীতৈশিংগী মরক্তা মরু ওইবা থৌদাং কয়া লৌদুনা লাকখি। লোয়ননা পুন্সি মহিংদা অপুনবগী পাঙ্গল অমসু শাগৎতুনা লাক্লি হায়খি। ক্লাব অসিনা কালচার, স্পোর্টস, খোরিরোলনচিংবগী থৌরম কয়া পাঙথোরকপগা লোয়ননা ক্লাবকী শঙলেন শাবগী মথৌ তারক্লে হায়খি। কুমজা ১৯৭১ গী বাংলাদেশকী নীংতম লানদা শরুক য়াখিবা লান্মীশিংগী নীংশিং মমি অমসু ইকায়খুম্নজনবগী নীংশিং খুভম অমসু শানবগী ৱারেপ লৌখিবসু লৈখ্রে হায়রি।

 

মণিপুরীশিংনা ইহান হান্না খুন্দাখিবা মফম অসিবু বাংলাদেশ অমদি মণিপুরগী মীয়াম্না তুং কোইনা খঙজহৌনবা অমদি ঈগী খোঙ্গুল লীবীবা লাকপদা শীজিন্ননবা মীথুংশঙ অমসু লৈঙাক অমদি মীয়ামগী তেংবাঙগা লোয়ননা শাহন্নীংবগী অপাম্বা ফোঙদোরকখি। মসিগীদমক মীয়ামদগী পীবিরক্কদবা মতেং ঙাইদুনা লৈজরি হায়বগা লোয়ননা হন্দক পাঙথোকখিবা বিশগাঁও মণিপুরী ফেষ্টিবেল ২০২৩ দা শরুক য়ারখিবশিংবু বিশগাঁও ক্লাব অমসুং মফম অসিগী মীয়াম্না ঙমখৈ লৈতনা থাগৎপা ফোঙদোকপরিকখি। 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: