মণিপুরদা মৈতৈ-কুকী ঈরাং ত্রিপুরাদা খোইরু থাউমৈ থান্দুনা শান্তিগী খোঙচৎ
আগরতলা, মে ৮ : মণিপুরদা মৈতৈ অমদি কুকী কাঙলুপ অনীগী মরক্তা থাজনদবগী শিংলিবা নুংশিৎ অমদি থোক্লিবা কাঙলুপকী ঈরাংনা মরম ওইদুনা মরাল লৈজদ্রবা মৈতৈ মচাশিংগী য়ুম মকৈ মৈ থাদোকপীবা অশোক অপন নংলিবা অসিগী নুংঙাইতবা অমদি পেন্দবা ফোঙদোকপা ওইনা ত্রিপুরাগী চোইজাইননা তাবা মৈতৈশিংনা মাগী মাগী লৈকাই খুঙ্গংদা খোইরু মৈরা চুখত্তুনা শান্তিগী খোঙচৎ অমসু থোকখ্রে।
ত্রিপুরাগী ডিষ্টিক্ট খরদা মৈতৈ সোসিয়েল ৱার্কার খরনা শীন্দুনা মাগী মাগী খুঙ্গং লৈকাইদা মৈরা চুখত্তুনা অহল লমনশিং য়াওনা শান্তিগী খোঙচৎ থোকপনি। গৌরনগরদা মৈরা পায়বী লুচিংবী এন বীনতানা লুচিংদুনা মৈরা পায়দুনা গৌরনগর, পাহারমুড়া, কোরনচিংবা মফমশিংদা চৎখিবা শান্তিগী খোঙচৎ অদুদা অহল লমন ইমা ইবেনশিংসু শরুক য়াখি হায়না গৌরনগর খুঙ্গংদগী ফংবা পাউদা হায়রি।
অমরোমদা নলগড়িয়া খুঙ্গংদসু সোসিয়েল এক্টিভিষ্ট খরনা শীল্লাংদুনা পাঙথোকখিবা শান্তিগী থৌরমদা সহিত্য একাডেমি ত্রিপুরাগী মেম্বার খোইস্নাম বীরলানা লুচিংদুনা খোইরু থাউমৈ থান্দুনা লৈখিদ্রবশিংগী আত্মা শান্তিগীদমক থৌনিজবগা লোয়ননা শান্তিগী খোঙচৎ অমসু থোকখি। থৌরম অদুদা পুথিবা ওয়েলফেয়ার এন্ড কালচারেল সোসাইটিগী সেক্রেটারী সিনাম দীফক কুমারসু শরুক য়াখি।
অমরোমদা বামুটিয়া তালতলাসু মৈরা থান্দুনা শান্তিগী খোঙচৎ থোকখি। থৌরম অদুদা মণিপুরগী মীওই খরা য়াওনা অভয়নরদগী পুথিবা ওয়েলফেয়ারগী সেক্রেটারী সিনাম দীপক কুমার সিংহ, ওয়েলফেয়ারগী থৌবু কেএইচ ধনজিৎনচিংবা মীওই কয়া শরুক য়াখি হায়রি। মণিপুরদা মৈতৈ-কুকী কাঙলুপ অনীগী মরক্তা থোক্লিবা ঈরাং অসিদা শান্তিগী পাউজেল অমা পীবগা লোয়ননা শান্তিগী খোঙচৎ অমা থোক্ননবা বাজালঘাট বয়েস ক্লাবনা লেফুঙ্গা পুলিশ ষ্টেশনদা অয়াবগী চে পীশিনখি। অদুবু পুলিশনা অথিংবা লৈবদগী শান্তিগী খোঙচৎ অদু তৌবা ঙমখিদে হায়না ক্লাব অসিগী প্রেসিদেন্ট কে মন্দিপ সিংহনা পেন্দবা ফোঙদোকখি।
সোর্স: মরূপ
0 কমেন্ট:
কমেন্ট তৌবিয়ু