মণিপুরগী শক্নাইরবা জগোয়গী আর্টিস্ট থিয়াম সুর্য্যমুখিদা পদ্মশ্রী এৱার্দ পীরক্লে
ইম্ফাল, জানুয়ারি ২৫ : হয়েং পাঙথোক্কদৌরিবা লৈবাক অসিগী ৭৬ শুবা রিপব্লিক দে থৌরমগী মাঙওইননা ঙসি মিনিস্ট্রি ওফ হোম এফ্যরসনা চৎলিবা চহী ২০২৫গী ওইনা পদ্ম বিভুষণ, পদ্ম ভুষণ অমসুং পদ্মশ্রী পীদুনা ইকায়খুম্নগদবা লৈবাক অসিগী তোঙান তোঙানবা ষ্টেট অমসুং য়ুনিয়ন টেরিটরিশিংদগী লম্ কয়াদা খনগৎলবা মীওইশিংগী মমিং লাউথোরকপদা মণিপুরগী নাইতোম জগোয়দা থোইদোক হেন্দোক্না শক্নাইরবী আর্টিষ্ট থিয়াম সুর্য্যমুখিসু য়াওরক্লে।
মশাগী চহী ৭০ হেল্লক্লবী শক্নাইরবী আর্টিষ্ট অসি য়াম্না অঙাং ওইরিঙৈদা অরিয়ান থিয়েটরদা য়াওদুনা চাইল্ড আর্টিষ্টসু ওইরকখি। শক্নাইরবা অইবা অরাম্বম দরেন্দ্রজিৎনা ইবা মহারাজ ভাগ্যচন্দ্রগী মচানুপী হায়বা প্লেদা মহাক্না ‘মোধুচন্দ্র’ গী শখ্তম লাংলকখি। রুসিয়া য়াওনা তোঙান তোঙানবা জগোয়গী ফম্বাক কয়াদা শরুক য়ারুরবী আর্টিস্ট অসি মতম অমগী তম্ফাস্না গর্লস হায় স্কুলদগী ক্লাস টেন পাস তৌরবা মতুঙদা এল্লাহাবাদতা লাইরিক মখা তমথখিবীনি। মহাক জে এন মণিপুর দান্স একাদেমিগী প্রদাক্সন য়নিটকী প্রদাক্সন এসিষ্টেন্ট ওইনা থবক তৌরম্লবা মতুং কুমজা ২০০৬তা থবক্তগী পোত্থারকখিবীনি। হৌজিক্না মহাক রিসার্ছ সেন্টর ফোর মণিপুরী আর্ট এন্দ কলচরগী মকোক থোংবা থৌপুবী অমা ওইরক্লি। মহাকপু ইকায়খুম্নবা উৎতুনা পীখিবা মনাশিংগী মনুংদা মণিপুরী সাহিত্য পরিষদকী নৃত্য ভূষণ, সঙ্গীট নাটক একাদেমি এৱার্দ ২০০৩ পনবা য়াই।
মহাক কৈশাম্পাৎ লৈমজম লৈকায়দা চাওরকখিবীনি। লৈখিদ্রবা মহাক্কী অপোকপা থিয়াম ইবোতোন মতম অদুগী মমিং লৈবা পূঙগী ওজানি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু