ফিফা ৱার্ল্ড কাপ ক্বালিফায়ার্স আফগানিস্তানগা শান্নগদবা ইন্দিয়া তিমদা মণিপুরগী জিক্সন, সুরেশ, মহেশ ইমরান খান য়াওরে
নিউ দিল্লী, মার্চ ১৫ : ফিফা ৱার্ল্ড কাপ ২০২৬ অমসুং এ এফ সি এসিয়ান কাপ ২০২৭ প্রিলিমিনরি জোইন্ত ক্বালিফিকেসন রাউন্দ তুগী আফগানিস্তানগা শান্নগদবা ওয়ে গেমগীদমক ইন্দিয়াগী মেম্বর ২৫ না শাবা সেনিয়র নুপা তিমদা মণিপুরগী থৌনাওজম জিক্সন সিংহ, ৱাংজম সুরেশ সিংহ, নাওরেম মহেশ সিংহ অমসুং ইমরান খান য়াওখ্রে। ইন্দিয়াগী তিম অদু ঙসি ইরাই নুমিৎতা সাউদি অরাবিয়াগী অভাগীদমক ইন্দিয়া থাদোকখ্রে।
মণিপুরগী জিক্সন, সুরেশ, নরেশ অমসুং ইমরান খান্না ইন্দিয়াগী তিম অদুগী মিদফিল্ডরশিংগী মরক্তা মমিং চনবা ঙমখি। ইমরান খান্না ইন্দিয়াগী তিমদা অহানবা ওইনা শক ঊৎনবগী তাঞ্জা ফংলি। জিক্সন, নরেশ অমসুং সুরেশকী ওইনদি ইন্দিয়াগী সেনিয়র তিমদা শক উৎতুনা মশক থোক্লবা ইন্তরনেসনেল কেরিয়ার লৈরবা শান্নরোয়শিং ওইরি।
ইন্দিয়ানা মার্চ ২১ দা (ইন্দিয়াগী পূং ফম নোংয়াই মতুং পূং ১২.৩০) অভাদা আফগানিস্তানগা ওয়ে গেম অদু শান্নগনি। ইন্দিয়াগী হোম মেতচনা মার্চ ২৬ তা গুৱাহাতিগী ইন্দিরা গান্ধী এথলেতিক স্তেদিয়ামদা আফগানিস্তানগা শান্নগনি।
ইন্দিয়ানা হৌজিক ক্বালিফায়ার্স অদুগী গ্রুফ এ দা পোইন্ত অহুম পায়রি। কুয়েতনা ইন্দিয়াগা পোইন্ত মান্ননা ফংলবসু মখোয়না গোল দিফরেন্সতা মাঙজিন থানা চৎলি। ইন্দিয়ানা মখোয়গী ওপেনিং মেতচ ওইনা কুয়েত সিতিদা শান্নখিবা মেতচতা কুয়েতপু ১-০ দা মায়থীবা পীখি। মদুগী মতুংদা ভুবনেশ্বরদা শান্নখিবা মেতচতা কতারগী মখূত্তা ০-৩ দা মায়থীবা নংখি। হৌজিক কতারনা পোইন্ত তরুক ফংদুনা গ্রুপ অদু লুচিংলি।
ইন্দিয়াগী তিম: গোলকিপরশিং: গুরপ্রিৎ সিংহ সন্ধু, অম্রিন্দর সিংহ, ভিশাল কেইথ।
দিফেন্দরশিং: অকাশ মিশ্রা, মেহতাব সিংহ, রাহুল ভেকে, নিখিল পুজারি, সুভাসিশ বোস, অনৱার অলি, অমে রনাৱাদে, জয় গুপ্তা।
মিদফিল্ডরশিং: অনিরুধ থাপা, ব্রেন্দন ফর্নান্দেস, লিস্তন কোলাসো, নাওরেম মহেশ সিংহ, সহল অবদুল সমদ, ৱাংজম সুরেশ সিংহ, থৌনাওজম জিক্সন সিংহ, দিপক তংগ্রি, লালেংমাউইয়া রাল্টে, ইমরান খান।
ফোরৱার্দশিং: সুনিল ছেত্রি, লাল্লিয়ানজ্বালা ছাংতে, মনভির সিংহ, ভিক্রম পরতাপ সিংহ।
সোর্স: পোক্নফম
0 কমেন্ট:
কমেন্ট তৌবিয়ু