প্রেসিদেন্টনা নোংমাইথেম গৌতমদা নেসনেল টিচার্স এৱার্দ-২০২২ খূৎশিন্নখ্রে
ইম্ফাল, সেপ্টেম্বর ০৫ : মহৌশাগুম্না ঙসি পাঙথোকখিবা লৈবাক অসিগী ওজাশিংগী নুমিৎতা থৌরম অসিগা মরী লৈননা লৈবাক অসিগী মফম পূম্নমক্তগী খনগৎলক্লবা খ্বাইদগী ফবা ওজাশিংদা প্রেসিদেন্ট দ্রৌপদি মুরমুনা ইকায়খুম্নবা উৎলদুনা নেসনেল টিচার্স এৱার্দ-২০২২ য়েন্থোকপদা মণিপুরদগী নোংমাইথেম গৌতমদসু মনা অসি খূৎশিন্নখ্রে।
লৈবাক অসিগী লেমজনীংঙাই ওইরবা ওজাশিংগী মনা ফংলবা নোংমাইথেম গৌতম ইষ্টার্ন আইদএল স্কুলগী প্রাইমারি টিচারনি। এৱার্দ অসি মহাক্না আই সী টি, ব্লোগস অমসুং ওয়েবসাইটশিং য়াওনা ইউটিউব চেনেলনচিংবগী মতাংদা অনৌবা ৱাখল্লোন পীগদবা এক্সপরিমেন্টশিং পাঙথোকখিবগীদমক মহাকপু খনগৎতুনা নেসনেল টিচার্স এৱার্দ পীরকখিবনি হায়না এদ্যুকেসনগী থবকসু খূৎপায়নরিবা এক্সটার্নেল এফ্যেরসকী য়ুনিয়ন ষ্টেট মিনিষ্টার আর কে রঞ্জননা সোসল মীদিয়াদা ফোঙদোরকখ্রে।
ঙসি নিউ দিল্লীগী বিজ্ঞান ভবনদা পাঙথোকখিবা লৈবাক অসিগী ওইনা চহী অসিগী খনগতলবা খ্বাইদগী ফবা ওজা ৪৫দা মনা অসি প্রেসিদেন্টনা হকথেংননা লান্থোকখিবনি। থৌরম অসিদা শরুক য়ারদুনা প্রেসিদেন্ট দ্রৌপদি মুরমুনা ফোঙদোকখিবদা মহাক মশামকসু মহাক্কী ইমুংগী লমজিং মতুংইন্না অমসুং ওজাশিংগী তেংবাঙদগী মহাক্কী খুঙ্গংদা ইহান হান্না মহৈ মশীন তম্বা নুপী মহৈরোয় অমা ওইরকখি হায়রি। থৌরমগা মরী লৈননা প্রেসিদেন্টনা মহাকপু তাকপী তম্বীরকখিবা ওজাশিং নীংশিংবদা নত্তনা ওজাশিং অদুগী মফমদা মীনুংশি উৎখি। লোয়ননা মহাক্না হৌজিক ফাওবদা মায় পাক্না পাঙথোরকখিবা থবকশিং অসিগী তৌবীমল ওজাশিংদা মতম চূপ্পদা উৎতুনা লাক্লি হায়খি। লোয়ননা শেম্মীৎলোনগী মতাংদা মথৌ তাবা লৌশিং ফংনবগীদমক সাইন্স, রিসর্স অমসুং ইনোভেসনগী থবক থৌরমশিং অসিদা য়ূম্ফম ওইগদবনি হায়খি। মসিমক্না স্কুল এদ্যুকেসনগী খূত্থাংদা লৈবাক অসিগী ফীভম হেন্না ফগৎহন্নবগীদমক অচেৎপা য়ূম্ফম অমা ওইহনগদবনি হায়খি।
অমরোমদা, চহী খুদিংগী লৈবাক অসিগী প্রেসিদেন্ট ওইরম্বা ডা. এস রাধাকৃষ্ণনগী মপোক নুমিৎতা পাঙথোরক্লিবা ওজাশিংগী নুমিৎকী থৌরম মহৌশাগুম্না ঙসিসু অরুনাচল প্রদেশসু পাঙথোকখিবগা লোয়ননা ষ্টেট অদুগী বেষ্ট টিচার্স এৱার্দ থৌবাল দিষ্ট্রিক্টকী তেন্থা খোংবান্দগী মোইরাংথেম সুরচান্দ অপোকপা লৈখিদ্রবা মোইরাংথেম গৌরমনিদা খূৎশিন্নদুনা ইকায়খুম্নবা উৎখ্রে হায়রি।
অরুনাচল প্রদেশকী বেষ্ট টিচার্স এৱার্দ অদু ষ্টেট অদুগী চীফ মিনিষ্টার পেমা খন্দুনা খূৎশিন্নখিবগা লোয়ননা থৌরম অদুদা অরুনাচল প্র্রদেশকী এদ্যুকেসন মিনিষ্টার টবা টেদিরসু শরুক য়াখি হায়রি। মনা অসিদা শেল ওইনা লুপা লিশীং ২৫, সার্টিফিকেট ১ অমসুং মেমেন্টো ১ য়াওই থৌরম। মণিপুরীশিংগী মনুংদা অরুনাচল প্রদেশকী বেষ্ট টিচার্স এৱা্দ ফংবসি মোইরাংথেম সুরচান্দনা অহানবনি হায়বগা লোয়ননা মঙোন্দা এৱার্দ অসি খূৎশিন্নরকখিবগী মরমনা মহাক্কী পার্ফোমের্ন্স অমসুং কৎথোকপগা লোয়ননা পুকচেল শেংনা ওজাগী শিনফমদা মথৌ পাঙথোকপগীদমক্তনি হায়রি। হৌজিক মহাক অরুনাচল প্রদেশকী নমসাই দিষ্ট্রিক্তা লৈবা লৈঙাক্কী হায়ার সেকেন্দারি স্কুল অমদো পোষ্ট গ্রেজুয়েট ওজা ওইনা থবক তৌরি হায়রি।
সোর্স: হুইয়েন লানপাউ।
0 কমেন্ট:
কমেন্ট তৌবিয়ু