নবকুমার নোংমৈকাপ্পমনা ইবা থাজমানবী ফোঙখ্রে
ইম্ফাল, আগস্ট ০৭ : ওল্ড এসেমব্লী রোদতা লৈবা হিন্দী পরিষদকী হোলদা ঙসি নুংথিল পুং ২ তাবা মতমদা নবকুমার নোংমৈকাপ্পমনা ইবা থাজমানবী কৌবা নোভেল অমা ফোঙখ্রে হায়না ময়াই লম্বী খোর্জৈ লূপকী সেক্রেটারি আর কে জীতেন্দ্র উচিৱানা থাদোরকপা চেরোল অমনা ফোঙদোরক্লি। লাইরিক ফোঙবগী থৌরম অদুদা এম য়ুগী প্রো. নহাকপম অরুনা, মলাখোলগী প্রেসিদেন্ট থৌনাওজম খম্বা মৈতৈ, নোভেলিষ্ট ক্ষেত্রিবীর, মণিপুর য়ুনিভার্সিটি ওফ কালচারগী দেপ্যুটি রেজিষ্ট্রার অমসুং দিরেক্টর সী দি সী ডা. এল সুর্জিৎ অমদি ডা. দব্লিয়ু কুমারীনা মথংশিৎনা অথোইবা লেঙবীরকপী, থৌরম মপু, অখন্ননা লেঙবীরকপশিং অমদি ৱাঙাংলোয় ওইনা শরুক য়াখি।
ফিক্সন ইবদা মালেমগী ওইনা হোংলক্লিবা ফীভম্বু য়াম্না কুপ্না চহী কয়া চঙনা থিজিল্লগা, অনৌবা মফোঙদোক, খুৎই, ষ্টাইল, নেরেটিভ দিভাইস কয়া শীজিন্নদুনা নবকুমার নোংমৈকাপ্পমনা থাজমানবী হায়না মিংথোনবা নোভেল অমা মপূং ফানা পুথোক্লকপসি উবদা তশেংনা নুংঙাইবা ফাওই। নোভেল অসিদগী অপাবশিংনা নোভেলগী হাউরবা মহাও অমা ফংবদা নত্তনা ফিক্সন ইবগী অনৌবা ৱাখল্লোন কয়াসু খঙবা ঙম্লগনি হায়না শক্নাইরবা নোভেলিষ্ট, ক্ষেত্রিবীরনা ফোঙদোকখি।
ৱাখলদা থোক্লকপা ৱারী অমা শৎ হেক্তা ইশিনবগী মহুৎতা কুপ্না থিজিল্লগা সাহিত্যগী কাঙলোন মশক খঙনা ফজনা শেমদোক নান্থোক্তুনা নবকুমারনা তৌরিবা অসিগুম্না অনৌবা মফোঙদোক চঙই হায়নসু ৱাঙাংলোয়না ফোঙদোক্নখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু