মণিপুর ষ্টেট কলা একাদেমিগী সনা ফুদোংবা নুমিৎকী থৌরম পাঙথোকখ্রে
ইম্ফাল, আগস্ট ০৮ : মণিপুর মহৌশানা নাৎ, চৎনবী অমদি শান্ন-খোৎনবগী লমদা লৈবাক অসিগী মীয়াম্না থোইদোক হেন্দোক্না মশক খঙলিবা ষ্টেট অমনি। লমদম অসিগী ফজখ্রবা নাৎ অমদি চৎনবী অসিবু মীয়ামদা অমুক্কা হেন্না মশক খঙহন্নবা হোৎনবদা কালচারেল এক্সেঞ্জ গ্রোগ্রামশিং য়াম্না তোইনা পাঙথোকপা মথৌ তাই হায়না গভর্নর লা গনেসননা ঙসি ফোঙদোকখ্রে।
মণিপুর ষ্টেট কলা একাদেমি (এম এস কে এ ) না শিন্দুনা ঙসি জৱাহরলাল নেহেরু মণিপুর দান্স একাদিমগী ওদিটোরিয়ামদা পাঙথোকখিবা একাদেমি অসি লিংখৎখিবা চহী ৫০ মপুঙ ফারকপগী গোল্ডেন জুবিলি থৌরমদা অথোইবা মীথুংলেনগী ৱারোল পীরদুনা গভর্নর লা গানেসননা ৱাফম অসি ফোঙদোকখিবগা লোয়ননা মখা তানা হায়, লমদম অসিগী কালচার য়োকখৎনবা হোৎনবদা মণিপুর ষ্টেট কলা একাদেমিনা অচৌবা থৌদাং লৌদুনা লাক্লি।
একাদেমি অসিনা লমদম অসিগী কালচার য়োকখৎনবা হোৎনরিবা অসি থাগৎনিঙাইনি। একাদেমি অসিনা শফোংলকপদগী ঙসি ফাওবদা চহী খুদিংগী মিউজিক, দান্স, ট্রাইবেল কালচার, শুমাং লীলা, লিটরেচর, ফাইন আর্ট অমদি তোঙান তোঙানবা হিরমশিংদা থবক তৌরিবা আর্টিষ্টশিং অমদি স্কোলারশিংদা ফেলোশিপ অমদি এৱার্দশিং পীদুনা লাক্লি। হৌজিক ফাওবদা পুন্না মীওই ৬৩৬ তা মণিপুর ষ্টেট কলা একাদেমি এৱার্দ খুৎশিন্নখ্রে।
অদুগা ইহান হানবা লাইফ টাইম এচিভমেন্ট এৱার্দনা লমদম অসিগী হেন্না শকখঙলবী মহারাজ কুমারী বিনোদিনিদা খুৎশিন্নখি হায়রি। একাদেমি অসিনা হৌগৎলক্লিবা লমদম অসিগী তুংগী মীরোল লৈহৌগদৌরিবশিংনা লমদম অসিগী লৈজরিবা নাৎ অমদি চৎনবী অসি মপুঙ ফানা খঙহৌনবগীদমক ৱার্কশোপ অমদি সেমিনারশিংসু মতম মতমগী ওইনা শিন্দুনা লাক্লি হায়না ফোঙদোকখিবগা লোয়ননা মণিপুর লৈঙাক্না মণিপুর ষ্টেট কলা একাদেমি হেন্না চাওখৎহন্নবা করি তৌবা য়াবগে হায়বগী মতাংদা য়েংশিনহন্নিংবগী অপাম্বসু মখা তানা ফোঙদোকখি।
ঙসিগী থৌরম অদুদা থৌরম মপু ওইনা শরুক য়াখিবা এদ্যুকেসন মিনিষ্টার টি ঐচ বসন্তকুমারনা ফোঙদোকখিবদা, মণিপুর ষ্টেট কলা একাদেমিনা শাফোংলকপদগী হৌজিক ফাওবদা কালচারগা মরী লৈননা শিংথানিঙাই ওইবা থবক কয়া পায়খৎখ্রে। মখা তানসু পায়খৎলক্কনি হায়বগী থাজবা চাওনা লৈ। ষ্টেট গভর্নমেন্টকী মায়কৈদগীসু একাদিম অসিনা পায়খৎলকপা থবক থৌরমশিংদা অঙম্বা মতেং পাংগনি। চীফ মিনিষ্টার এন বিরেনসু লমদম অসিগী কালচারবু অৱাংবা থাক্তা পুখৎনবা হোৎনরিবা মীয়ামগী লুচিংবা অমনি। মহাক্কী মীৎয়েং মখাদা একাদেমি অসিগীদমক করি তৌবা য়াবগে হায়বদু শোয়দনা য়েংশিনগনি হায়খি।
ঙসিগী থৌরম অদুগা মরী লৈননা পুখ্রম্বম গন্ধ অমসুং প্রোপেসার নোংমাইথেম তোম্বীদা একাদেমি ফেলো লান্থোকখি। অতোপ্পা একাদেমি এৱার্দ ফংখ্রবশিং অদুদি দান্সতা এম গুনেশ্বরি, এন জি রঞ্জিৎ, জি কুঞ্জলতা, মিউজিক্তা এম. সৈতবান, সী ঐচ কমলা, এস অচৌবা, থিয়েটারদা কে ঐচ রনবির, শুমাং লীলাদা লাইশ্রম তোম্বা, ট্রেদিস্নেল থিয়েটারদা এস ঐচ সিংহজিৎ, থাঙ তাদা এ ওজেন্দ্র মীতৈ, ট্রেদিস্নেল কোষ্ট্যুম দিজাইনিংদা এল সরতকুমার, ৱারী লীবদা কে জিতেন মৈতৈ, ট্রাইবেল কালচারদা কেন্তালিয়ু ন্যুমৈ, ডা. পুনি লোসি, লিটরেচারদা আই বসন্ত, ডা. এল গোজেন্দ্রা, এন খগেন্দ্রা, ফাইন আর্টসতা দিনেস কে ঐচ অমসুং দব্লিয়ু নেলোপালনি। অদুগা একাদেমি য়ং টেলেন্ট এৱার্দ ফংখ্রবশিং অদুনা দান্তা পি রিপা, ম্যুজিক্তা টি ঐচ সোভাসচন্দ্রা, থিয়েটারদ চনম লিলাবতি, থাঙ তাদা এন রাজেন মঙাঙ, মোইবুংদা সী ঐচ নরেন্দ্র অমসুং ট্রাইবেল কালচারদা কামসোন পৌখিলুং কবুইনি। ঙসিগী থৌরম অদুদা কমিশনার (আর্ট এন্দ কালচার) এম জয় অমদি সেক্রেটারি এল কিশোরজিৎ, এম এস কে এ অমদি স্কোলারশিং অমসুং আর্টিষ্ট কয়াসু শরুক য়াখি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু