থাবুম অমা চূপ্না লময়ানব হিজম ইরাবত নিংশিং থৌরম পাঙথোক্কদৌরি
ইম্ফাল, ৩০ আগস্ট : লময়ানবা ইরাবতনা মণিপুর মীয়ামগীদমক্তা কত্থোকপগা লোয়ননা পাঙথোকপীরম্বা থবক থৌরমশিংবু ইকায়খুম্নবা ঊৎপা ওইনা পি পি সি এম অমসুং লিন্তোকনা থাবুম অমা চূপ্না তোঙান তোঙানবা থৌরমশিং পাঙথোক্তুনা লময়ানবা ইরাবত নীংশিং থৌরম পাঙথোক্লগনি হায়না পি পি সি এম (প্রোতেক্সন এন্দ প্রিজার্বেসন কমিতি.মণিপুর) গী কনভেনর পিঐচ নন্দো লুৱাংনা ফোঙদোকখ্রে।
ঙসি ৱাহেংবম লৈকায়দা লৈবা পি পি সি এমগী ওফিসতা পাঙথোকখিবা পাউগী মীফম অমদা নন্দো লুৱাংনা হায়, পি পি সি এমগী শরুক অমা ওইরিবা লিন্তোক (লময়ানবা ইরাবত নীংশিং থৌরম ওবজার্বেসন কমিতি) অমদি পি পি সি এম অনীনা খূৎশম্নদুনা লময়ানবা হিজম ইরাবতকী মফমদা ইকায়খুম্নবা ঊৎপা ওইনা সেপ্তেম্বর থাবুম অমা চূপ্না লময়ানবা ইরাবত নীংশিং থৌরম পাঙথোক্নবা শেম-শারে।
মহাক্না হায়, লময়ানবা ইরাবতনা মণিপুর মীয়ামগীদমক্তা পাঙথোক্লম্বা ঙমখৈ লৈতবা থবক থৌরমশিং অসি ঙসিগী মীরোলনা খুদুং ইনবগা লোয়ননা মহাক্না পামজরম্বা ৱাখল্লোন অমদি চৎলম্বা লম্বী অদু তুংইন্দুনা অফবা মণিপুর, মান্নবা খুন্নাই অমা শেম্বা হায়বসি য়াম্নমক তঙাই ফদে।
ঙসি ঙসিমক মণিপুরগী ওইরিবা ফীবম, পামদবা থৌদোক কয়া থোক্তুনা চাওখৎপা থীন্থরিবা, অমগা য়েংথিনরিবা, মণিপুরগী অপূনবগী শক্তমদা অকিবা থৌদোক কয়া মায়োক্নরিবা অসি লময়ানবা ইরাবতকুম্বা লমদম অসিগী অশেংবা লুচিংবা লৈতবগীনি অমদি মহাক্না পাজরম্লিবা লম্বী অদুদা ঐখোয়না খুদুং ইনবা ৱাৎপননি হায়না নন্দো লুৱাংনা ফোঙদোকখি।
মহাক্না মখা তানা হায়, সেপ্তেম্বর থাবুম অমা চূপ্না পাঙথোক্কদৌরিবা থৌরম অসিগী মনুং চন্না সেপ্তেম্বর ১দা ঊহৈ পানবা পাম্বীশিং মোইরাং এ সিগী মনুং চন্না লৈবা মমাঙ চীং হায়নসু খঙনবা য়োশুলাকপা খুদেংচীংদা পাক শন্না থাগনি। সেপ্তেম্বর ৬ তগী ১৯ ফাওবা লমদম অসিগী মহৈরোয়শিং লোইশঙশিং দা পি পি সি এম অমসুং লিন্তোক্কী থৌমীশিংনা এক্সপার্তশিংগা লোয়ননা চত্তুনা শরিৎ-শারা তাকপগী তম্বীববগা লোয়ননা ফার্স্ত এদকী এৱার্নেস পীগনি।
মসিগী মতুং তারকপদা মণিপুরী মীয়ামগী তুংলমচৎকীদমক্তা ইরাবতনা য়ু জি তাখিবা নুমিৎ সেপ্তেম্বর ২১ দা ‘ইরাবতকী পুন্সি অমদি মহাক্কী থবক” হায়বা হীরম অসিগী মতাঙদা মীয়ামগী ওইনা খন্ন-নৈনবা মীফম অমা পাঙথোক্কনি। লুচিংবা অসিগী অরোইবা য়াহিপ তানখিবা নুমিৎ সেপ্তেম্বর ২৬ তসু পাব্লিক ফঙ্কসন পাঙথোক্তুনা লুচিংবা অসিগী মফমদা হৈকৎ-লৈকৎ তমগনি।
সেপ্তেম্বর ৩০, ইরাবতনা তাইবং খোঙদারকখিবা নুমিৎ অসিদা স্তেতকী থাক্তা ওপন ওইনা লৈবাক নিংবদা য়ূম্ফম ওইবা ঈশৈ চাংদম্নবা পাঙথোক্তুনা থাবুম অমা চূপ্না চত্থগদৌরিবা থৌরম অসি লোইশিনগনি। থাবুম অমা চূপ্না পাঙথোক্কদৌরিবা থৌরম অসিগা মরী লৈননা মতেঙ নীরকপা মতমদা মীয়াম্না অঙম্বা মতেঙ পাংবীয়ু হায়না নন্দো লুৱাংনা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু