আসাম এসেমব্লিনা মণিপুরী লোল এসোসিয়েত ওফিসিএল লেংগ্বেজ ওইহনখ্রে
গুৱাহাতি, আগস্ত ২৯ : আসাম লেজিসলেতিব এসেমব্লিনা ঙসি আসাম ওফিসিএল লেংগ্বেজ (এমেন্দমেন্ত) বিল, ২০২৪ পাস তৌখিবগা লোয়ননা মণিপুরী লোল অসি আসামগী দিস্ত্রিক্ত মরিদা আসামগী এসোসিএত ওফিসিএল লেংগ্বেজ ওইহনখ্রে।
আসাম ওফিসিএল লেংগ্বেজ (এমেন্দমেন্ত) বিল, ২০২৪ ঙসি আসাম লেজিসলেতিব এসেমব্লিদা পুথোক্তুনা খন্নবগা লোয়ননা হাউসনা য়েৎনবা লৈতনা পাস তৌখি। হায়রিবা বিল অসিদা মণিপুরী লোল অসি আসামগী বারাক ভেলি দিস্ত্রিক্ত মরি কাছার, হাইলাকান্দি, হোজাই অশদি করিমগঞ্জদা এসোসিয়েত ওফিসিয়েল লেংগ্বেজ ওইরগনি।
আসাম এসেমব্লিগী ঙসি চত্থখিবা নোংজু মীফমগী মরিনি চনবা নুমিত্তা আসামগী চীফ মিনিস্তর হিমন্ত বিস্ব শর্ম্মানা বিল অসিগী মতাঙদা, ‘মণিপুরী লোলবু আসামগী দিস্ত্রক্ত মরিদা এসোসিএত ওফিসিএল লেংগ্বেজ ওইনা য়াওহনবা অসিনা লোল অসিবু ঙাঙলিবা মীয়ামদা চাউনা কান্নবা পীরগনি’ হায়বা ৱাফম থমখি।
মহাক্না মখা তানা হায়খি, আসাম গবর্নমেন্তনা পাঙথোকপা রিক্রুতমেন্ত একজামশিংদা মণিপুরী লোল খনবা য়াবগী ওপসন পীরগনি। মসিমক মণিপুরগী নহাশিংদা অচৌবা থৌজাল অমা পীরবনি। ইন্দিয়ানা নীংতম্বা চহী ৭৭ শুরবা মতম অসিদা মতম শাংনা মণিপুরী লোলবু আসামগী এসোসিএত ওফিসিএল লেংগ্বেজ ওইহনবীয়ু হায়বা ৱাফম অদু মপূং ফাহনবা ঙম্লে’ হায়নসু চীফ মিনিস্তর হিমন্ত বিস্ব শর্ম্মানা মখা তাখি।
চীফ মিনিস্তর হিমন্ত বিস্ব শর্ম্মানা মহাক্কী এক্সতা থাগৎলকপা ৱাফম অমদা হায়, আসাম গবর্নমেন্তনা স্তেত অসিদা লৈরিবা ইন্দিজিনস লেংগ্বেজশিংবু য়োকখৎপা অমদি ঙাক-শেন্দুনা থম্বা হায়বা ৱাফম অদু মপূং ফানা মায় পাক্নবগীদমক খোঙথাং কয়া লৌখৎতুনা লাক্লি। মসিগী মনুং দা লোল খরবু মেদিয়ম ওইনা স্কুলশিং দা তমহন্নবগীদমক নোতিফিকেসনসু থোকখ্রে। হায়রিবা হীরম অসিদা ঐখোয়না মখা তানা চঙশিন্দুনা অতৈ লোলশিঙবুস য়োকখৎনবা খোঙথাংজিনগনি।
আসাম ওফিসিএল লেংগ্বেজ (এমেন্দমেন্ত) বিল, ২০২৪ অসি আসামগী পার্লিয়ামেন্তরি এফিয়ার্স মিনিস্তর পিযুশ হাজারিকানা চীফ মিনিস্তর হিমন্ত বিস্ব শর্ম্মাগী মহুৎ শিন্দুনা আগস্ত ২২ দা হাউসতা ইন্ত্রদ্যু তৌখিবনি। বিল অসি আসাম ওফিসিএল লেংগ্বেজ এক্ত, ১৯৬০ দা অনৌবা সেক্সন ৫ বি হাপচিন্দুনা শেমদোকপনি।
অমরোমদা, আসাম লেজিসলেতিব এসেমব্রিনা ঙসি আসাম ওফিসিএল লেংগ্বেজ (এমেন্দমেন্ত) বিল, ২০২৪ পাস তৌখিবগা লোয়ননা মণিপুরী লোল অসি আসামগী দিস্ত্রিক্ত মরিদা এসোসিএত ওফিসিএল লেংগ্বেজ ওইহনখিবদা এস এম সি সি এ (সোসাইতি ফোর মীতৈজ চেম্বর ওব কম্মর্স, আসাম) না স্তেত অসিগী চীফ মিনিস্তর হিম্নত বিস্ব শর্ম্মা অমসুং আসাম গবর্নমেন্তকী কেবিনেত মিনিস্তরশিংবু থাগৎপা ফোঙদোকখ্রে।
এস এম সি সি এগী প্রেসিদেন্ত কেএসঐচ উমানন্দ সিংহা, ৱার্কিং প্রেসিদেন্ত বিস্বজিৎ শর্ম্মা অমসুং জেনরেল সেক্রেতরি ওক্রম লক্ষিকান্ত সিংহা অহুমনা আসাম ওফিসিএল লেংগ্বেজ (এমেন্দমেন্ত) বিল, ২০২৪ পাস তৌখিবদা চীফ মিনিস্তর হিমন্ত বিস্ব শর্ম্মাদা থাগৎ ৱারোল অমা অমসু পীশিনখ্রে হায়রি।
আসামদা লৈরিবা মীতৈশিংগী মতম শাংলবা দিমান্দ অসিবু শৌগৎলিবা লক্ষিপুরগী এম এল এ কৌশিক রায়, সিলচরগী এম এল এ দিপায়ন অমসুং সিলচরগী এম পি পরিমল শুক্লা বৈদ্য বুসু এস এম সি সি এনা থাগৎপা ফোঙদোরক্লি।
সোর্স: পোক্নফম
0 কমেন্ট:
কমেন্ট তৌবিয়ু