বাংলাদেশতা মণিপুরী লোনগী নিংশিং নুমিৎ থৌরম পাঙথোকখ্রে।
সিলেট, ৩০ আগস্ট : ইং কুমজা ১৯৯২ গী আগস্টকী তাং ২০ দা মণিপুরী লোননা ইন্দিয়ান কন্সতিত্যুসনগী ৮ শুবা সেদ্যুলদা চনখিবা অদুবু মণিপুরী লোলগী নুমিৎ হায়না খংনরি, নিংশিংনরি, বাংলাদেশতসু মহৌশাগুম হন্দকসু “ইমালোন ঙাঙসি, ইমালোন ইসি, ইমালোন নুংশিসি” হায়বা পান্দমদা ঈশিং ঈচাওনা মরম ওইদুনা মতমচানা পাঙথোকপা ঙমহৌদবনা ঙশি (৩০ আগস্ট ২০২৪) ইরাই নুমিৎ নুংথিল পুং ৩দা মৌলভীবাজার ডিস্ট্রিক্ট মনুং চনবা কমলগঞ্জ উপজেলাগী নয়াপত্তনদা লৈবা মণিপুরী কালচারাল একাডেমিদা মণিপুরী ভাষা গবেষণা ও উন্নয়ন সংস্থানা শিনলাংদুনা মণিপুরী লোনগী নুমিৎকা মরী লৈনানা খন্ন নৈনবগী থৌরম অমসুং মনিপুরী লোন, ময়েক তম্লিবা মহৈরোয়শিংদা লাইরিক তম্বগী পোৎলমশিং য়েনবগী থৌরম পাঙথোকখ্রে।
ঙসিগী খন্ন নৈনবগী থৌরম অদুদা মণিপুরী ভাষা গবেষণা ও উন্নয়ন সংস্থাগী প্রেসিডেন্ট কবি এ. কে শেরামনা থৌরম মপু অমসুং অখন্নবা মীথুংলেন ওইনা বাংলাদেশ মণিপুরী কাং ফেডারেশনগী এডভাইজর, ফর্মার ইউপি মেম্বার কে মনীন্দ্র কুমার সিংহ, বাংলাদেশ মণিপুরী সাহিত্য সংসদ কমলগঞ্জ ব্রাঞ্চকী প্রেসিডেন্ট মাইবম বীরেন্দ্র, কমলগঞ্জ প্রেস ক্লাবকী কনভেনার এম এ ওয়াহিদ রুলুনা শরুক য়াখি।
কে এইচ সমেন্দ্র সিংহনা কন্ডাক্ট তৌখিবা নৈন মিফম অদুদা তরাম্না ওকপগি ৱারোল থম্বিখি মণিপুরী ভাষা গবেষণা ও উন্নয়ন সংস্থাগী জেনারেল সেক্রেটারী ইবুংহাল শ্যামল অমসুং হিরম অসিগা মরি লৈননা ৱা ঙাংখি বাংলাদেশ মণিপুরী ইয়ূথ ফোরামগী প্রেসিডেন্ট সুশীল সিংহ, জার্নালিস্ট সালাউদ্দিন শুভ, সোসেল এক্টিভিস্ট য়ুম্নাম নৃপেন্দ্র সিংহ, ইমা বাংলাদেশকী জেনারেল সেক্রেটারি অমসুং দি ভানুবিল ড্রামা পার্টিগী ডিরেক্টর লৈচোম্বম রাজকুমার অমসুং ওজা কন্থৌজম শিল্পী।
নৈনবা মীফম মতুংদা শৈরেং শৈদিন্নবগী থৌরম অমসু পাঙথোকখি। মণিপুরী লোনগী নুমীৎকা মরি লৈননা কবি থোকচোম কৈনাহান দেবী, রওশন আরা বাঁশি খূৎহৈবম অনীনা শৈরেং পাথোকখি।। অরোইবদা মনিপুরী লোন অমসুং ময়েক তম্লিবা ৫০ রোম মহৈরোয়শিংদা লাইরিক তম্বগী পোৎলমশিং য়েন্থোকখি হায়রি।
0 কমেন্ট:
কমেন্ট তৌবিয়ু