• 240
• ১১ই ফেব্ররুয়ারি ২০২৩ ইং
• Share on:

ত্রিপুরাগী মণিপুরীশিং কনানসু লাকচবা য়ারোই: এন. বীরেন

ইম্ফাল, ফেব্রুয়ারি ১০: আগরতলাগী বেসিক ত্রেনিং কলেজ গ্রাউন্দ (কুমারী তিল্লা) দা পাঙথোকখিবা ওল ত্রিপুরা মণিপুরী কনভেন্সন, ২০২৩ দা মণিপুরগী চীফ মিনিষ্টার এন বীরেন সিংহনা শরুক য়ারদুনা ত্রিপুরাদা লৈরিবা মণিপুরীশিংদা কনানসু লাকচবা, উশিৎতবা য়ারোই হায়না ফোঙদোকখ্রে।

ঙসি পাঙথোকখিবা ওল ত্রিপুরা মণিপুরী কনভেন্সন, ২০২৩ অদুদা ত্রিপুরাগী চীফ মিনিষ্টার মানিক সাহা, বিজেপিগী নোর্থ ইষ্টকী ইন-চার্জসু ওইরিবা পার্টি অসিগী স্পোক্সপার্সন সাম্বিত পাত্রা, মণিপুরগী মিনিষ্টারশিং থোঙাম বিশ্বজিৎ সিংহ (এগ্রিকালচার), গোবিন্দাস কোন্থৌজম (ৱার্ক্স), এল সুসিন্দ্রো (য়াইমা) মৈতৈ (কেফ এন্দ পি দি), এম এল এ আর কে ইমো সিংহ, ভারতিয় জনতা পার্টি মণিপুর প্রদেশকী প্রেসিদেন্ট এ শারদা দেবী অমসুং ভাইস প্রেসিদেন্ট ও লুখোইসু শরুক য়াখি।

কনভেন্সন অদুদা চীফ মিনিষ্টার এন বীরেন সিংহনা হায়, ‘ত্রিপুরাদা লৈরিবা মণিপুরগী ঈ মরী ওইরিবা ইচিল-ইনাও, ইমা ইচা ময়াম উবদা থম্মোয়দা নুংঙাইবা, নুংশিবা ফাওই। অতোপ্পা স্তেততা লৈজরগসু মণিপুরগী ঈ ওইরিবা ইচিল-ইনাওশিংনা করি করম্বা ফীবমদা লৈরি হায়বসি য়েংলগা লৈরিবনি’।

বীরেননা হায়খি, ত্রিপুরাদা লৈরিবা মণিপুরীশিংদা কনাগুম্বা অমত্তনা উশিৎতবা অমসুং লাকচবা য়ারোই। করিগুম্বা ইসু অমা হেক লৈবদা ফোন তৌবীরকউ, ফ্লাইতসু দাইরেক্ট লৈরবনিনা মহাক মশা নৎত্রগা খুদক্তা মিনিষ্টার নৎত্রগা এম এল এ ত্রিপুরাদা থারক্কনি। মহাক্না হায়খি, ত্রিপুরা অমসুং মণিপুর অনী অসি কৈদৌনুংদা থানবা য়ারোই। ঙল্লিঙৈ মতমদগী হৌনা ত্রিপুরা অমসুং মণিপুর অনীগী মরক্তা পুৱারীগী ওইবা ৱারী অমদি চারৌ-মৌরৌনদুনা নক্নবা মরী লৈ। মরম অদুনা হায়রিবা মরী অসি কৈদৌনুংদা তৎন-থানবা য়ারোই। হায়রিবা মরী অসি মথং মথং লাক্লিবা গবর্নমেন্ত অমসুং মীরৈালদা খঙহনবা চঙই।

বীরেননা হায়, লৈবাক অসিগী কনস্তিত্যুসনগী মখাদা তোঙানবা স্তেত অমদা লৈখিবনা মণিপুর গবর্ণমেন্তনা ত্রিপুরাদা লৈরিবা মণিপুরীশিংগীদমক্তা তৌনিংবা কয়া লৈরগসু তৌবা ঙমদবা কয়া অমা লৈরি। মরম অদুনা ৱাখল মান্নবা পার্টি ওইহন্দুনা ত্রিপুরাদসু বিজেপিগী গর্ভনমেন্ত অমা থম্নবগী পান্দমদা ত্রিপুরদা লাকপনি।

মহাক্না হায়খি, আসামদসু মৈতৈ কয়া অমা খুন্দারগা লৈরি। আসামদা লৈরিবা মৈতৈশিং মাইনোরিতি ওইনা লৈবনা খুদোংচাবশিং ফংদনা য়াম্না ৱানা লৈরম্মী। অদুবু হৌজিক্তি আসামদা লৈরিবা মৈতৈশিংগীদমক্তা বিজেপিগী চীফ মিনিষ্টার ওইনা লৈরিবা হিমন্ত বিশ্বদা হায়দুনা মখোয়গী স্তেত্তা লৈরিবা মৈতৈশিংগী ফীবম ৱাংনা লৈননবা ৱারী শানরে। হৌজিক্তি হান্না ফংলম্বা খুদোংচাবা অদুদগী শরুক অনী হেনগৎনা মৈতৈশিংনা ফংবা ঙম্লে।

আসামগী স্তেত সার্ভিসতা মণিপুরী লোলনা একজাম থাবা য়াবগী অয়াবা পীগদৌরে। আসামদা লৈরিবা মৈতৈশিং স্পিসিয়েল স্তেতস পীহন্দুনা মখোয়গী স্তেতস অদু ৱাংখৎনা লৈনবা থবক পীবদা, এদজুকেসন্দা অমসুং দিবেলপমেন্ততা অহেনবা কয়া অমা পীবগী ৱাফম আসামগী চীফ মিনিষ্টারগা য়ানরে।

নুমিৎ খরনিগী মমাঙদা ত্রিপুরাদা লাক্লম্বা অদুদা ইবুধৌ পুথিবাগী শঙলেন অদু ফীবম চাদনা লৈরম্বদগী অথুবদা শেমজিনগনি হায়রম্বদু হৌজিক অথুবদা শেমজিনবা হৌরে। বিজেপিগি চীন্না ঙাঙবা খক্তা নত্তে, থবক ওইনা তৌব পার্টিনি। অদুগা লৈবাক অসিগী প্রাইম মিনিষ্টার অমদি অতৈ লুচিংবশিংনা মণিপুরবু কয়াগী মতীক ইকায়খুম্নবগে হায়ববু আন্দামান্দা লৈবা মাউন্ট মণিপুর হায়না মমিং ওনবীখ্রে হায়নসু চীফ মিনিষ্টার এন বীরেন সিংহনা ফোঙদোকখি।

সোর্স: পোক্নফম