টাইক্কোন্দোদা মণিপুরগী নাওরোইবম জিনা অমসুং উমেলি মংশাতাবমনা ব্রোঞ্জ লৌবা ঙমখ্রে
ইম্ফাল, ওক্টোবর ৩১ : গোৱাদা পাঙথোক্লিবা ৩৭ শুবা নেসনেল গেমসকী ঙসি শান্নখিবা তোঙানবা-তোঙানবা দিসিপ্লিনশিংগী ওইনা মণিপুরগী শান্নরোয়শিংনা টাইক্বোন্দোদা মেদেল অনী লৌবা ঙমখ্রে। অদুগা নুপীগী আর্চারি টিমনা ফাইনেল রাউন্দ চঙবা ঙমখ্রে। টাইক্বোন্দো ক্যোরুগী ইভেন্টকী ওইনা কেজি ৪৬ কেটগোরিদা নাওরোইবম জিনানা ব্রোঞ্জ মেদল লৌবা ঙমখিবনি। অদুগা নুপীগী ইন্দিভিজ্যুয়েল পুমসেদা উমেলি মংশাতবমনা অতোপ্পা ব্রোঞ্জ মেদল অমগা লৌবা ঙমখিবনি।
অমরোমদা, গোৱাগী ইঞ্জিনীয়ারিং কোলেজদা পাঙথোকখিবা আর্চরি ইন্দিয়ন রাউন্দদা মণিপুরগী নুপী টিম ফাইনেল চঙবা ঙমখ্রে। টিম অসিদা য়অওরিবা নুপী আর্চরশিংদি দব্লিয়ু মালেশ্বরী, আই রোজিনা অমসুং কে সন্ধ্যানি। অদুগা মিক্স টিমগী ওইনসু মণিফুরগী দব্লিয়ু মালেশ্বরী অমসুং টি ঐচ হোলারগী পুংবা ফাইনেল রাউন্দ চঙবা ঙমখ্রে।
ঙসি টিলক ফুটবোল ময়দান গ্রাউন্দদা উইমেন্স ফুটবোলগী ওইনা মণিপুর অমসুং টামিল নাদুগী মরক্তা শঅন্নখিবা মেটচ অমদা মণিপুরনা টামিল নাদুবু পাঞ্জল ২-০দা মায়থীবা পীদুনা সেমীফাইনেল চঙবা ঙমখ্রে। পাঞ্জলশিং অদু মেটচ অদুগী ৯০ শুবা মিনিটতা শিবানি অমদি অনীশুবা হাফকী ইঞ্জ্যুরি বাবিনানা অমমম চনবা ঙমখিবনি। নুপগী ওইনসু ঙসি পন্দিট জৱাহরলাল নেহেরু ষ্টেদিয়ামদা শান্নখিবা মেটচ অমদা মণিপুরনা মেঘালয়াবু পাঞ্জল ২-১ দা থোইবা ঙমখ্রে।
অমরোমদা, সেপাক টাক্রো দিসিপ্লিনগী ওইনা মণিপুরগী টিমনা হৌজিক ফাওবগী ওইনা মায়থীবা য়াওদনা মাংজিল থানা চঙশিনবা ঙম্লি। উইমেন্স রেগু ইভেন্টতা মণিপুরনা নাগালেন্দবু সেট ২-০ (২১-১১, ২২-১২) দা থোইখ্রে। উইমেন্স টিম ইভেন্টতা মণিপুরনা বিহার অদুগা মেন্স টিম ইভেন্টতনা মণিপুরনা অন্ধ্র প্রদেশপু ২-১ দা থোইবা ঙমখ্রে। অদুগা মেন্স রেগুদনা মণিপুরনা মহারাষ্ট্রবু ২-০ দা থোইবা ঙমখিবনি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু