আপডেট:
image

খুন্দোংবম ব্রোজেন্দ্রো থিয়েটার ফেষ্টিবেল ২০২৩ হৌখ্রে

অহৌবা নুমিৎতা রুপমহলগী ‘ইচাশা ইপা লম্বোইরগে’ উৎখ্রে

ইম্ফাল, জানুয়ারি ১৮ : ৱাংখৈ নিংথেম পুখ্রি মপালগী খুন্দোংবম ব্রোজেন্দ্রো কালচারেল ট্রাষ্টনা ‘রিকন্সত্রাক্সন ওফ কালচারেল মেমোরি’ হায়বা থিমদা নুমিৎ ৬নি চূপ্না চত্থগদবা তরুকশুবা খুন্দোংবম ব্রোজেন্দ্রা থিয়েটার ফেষ্টিবেল হৌদোকখিবগা লোয়ননা অহানবা নুমিৎতা রুপমহল থিয়েটার, ইম্ফালগী ‘ইচাশা ইপা লম্বোইরগে’ উৎখ্রে।

ফেষ্টিবেল অসি মণিপুর সাহিত্য পরিষদ, ইম্ফালগী হান্নগী প্রেসিদেন্ট আই এস কাংজমনা অথোইবা মীথুংলেন ওইনা হৌদোকখিবগা লোয়ননা ডা. আর কে নিমাইনা ময়ায় তাংবল লৌরগা খুন্দোংবম ব্রোজেন্দ্রানিীংশিং মনা ২০২৩গী এৱারদি মোইরাংথেম ইনাওনা অখন্নবা মীথুংলেন ওইখি।

অথোইবা মীথুংলেননা ফোঙদোকখিবদা ফাগি ওইরবুস ৱাহৈ- ৱাতানা ওইরবসু খুন্নাই অসিগী চৎনরিবা অমদি লৈরিবশিংবু খুন্দোংবম ব্রোজেন্দ্রোগী প্লেশিংগী খূত্থাংদা মীয়ামদা উৎলক্লি হায়না শীংথাখি। 

জে এন মণিপুর দান্স একাদেমিগী ওদিটোরিয়ামদা পাঙথোকখিবা হৌদোকপগী থৌরমদা চহী ৩/৩ খুদিংগী পাঙথোরকখিবা ফেষ্টিবেল অসিগী ঙসি অহৌবা নুমিৎতসু লাইহুইগী পেনা ফমশক্না হৌদোকখিবগা লোয়ননা খুন্দোংবম ব্রোজেন্দ্রোনা উৎলম্বশিং থিয়েটারগী দিরেক্টর অমদি এক্টরশিংনা থৱায় হাপ্তুনা মীয়ামদা উহনবা ঙম্লে হায়খি। মহাক্কী লীলাদা থিজিনবা য়াবা কয়া য়াওরি অমসুং মহাক্কী মরমদা রিসার্স তৌবা হৌনরক্লগনি হায়খি। মহাক্না রেদিও লীলা, ষ্টেজ লীলা অমসুং দ্রামা কয়া পুথোক্লম্বদা নত্তনা লাইরিক কয়াসু ইরম্মী। মহাক্না ইরম্বা লাইরিক পারুবদা মহাক কনানো হায়বা খঙই হায়খি।

ষ্টেট অসিদা দ্রামাগী ফেষ্টিবেল কয়া লূপ কয়ানা শীন্দুনা পাঙথোক্নরি অদুবু অইবা অমখক্কী প্লেশিংদা য়ূম্ফম ওইদুনা ফেষ্টিবেল পাঙথোকপদি খুন্দোংবম ব্রোজেন্দ্রোগী ফেষ্টিবেল অসিখক্তনি হায়খি। ঙসি অহানবা উৎখিবা রুপমহল থিয়েটারগী ‘ইচাশা ইপা লম্বোইরগে’ হায়বা দ্রামা অসি লোইতোংবম ব্রজ মোহন্না দিরেক্সন পীবনি।

লীলাগী ৱারীদা চয়াম পোকপা মমা মপানা মচাশিংবু মনীং থুংহনবা ঙমদে। তোলোপ মচা চারগা মচা য়োক্লকপা, থবক্তগী পোত্থারগা থিকা মচা মচা তৌদুনা তাঞ্জরগা মচাশিং য়োক্নবা হোৎনরকপা উৎলি। মচানুপা অহল খক্তনা থবক তৌদুনা ইমুং পুরক্লগসু মচা ৮ পোকপগী মনুঙদা মচা ৬তি শেল থোক্তে। জগোয়-ঈশৈ, দ্রামা, পোলিটিক্সতা খোঙদাবগা লোয়ননা রেগ্যুলর তাদবা ওজা ওইনরকপা য়াওখি। চয়াম পোকপগী হৌনবা মচাশিংনা তৌরকপা ৱাকৎশিং লৈঙাক পায়বগা পাঙ্খক্নহন্দুনা মীয়ামদা উৎথোকপা প্লেনি। মীরোল খরদা মায় পাক্না উৎলক্লিবা রুপমহলগী দ্রামাশিংগী মনুংদা মসিসু অমদি।

দ্রামা অসিদা শক্তম লাংলিবশিংগী মনুঙদগী মমা মপাগী শক্তম লাংবা এক্টরশিং য়াওনা মখোয়গী ৱাঙাঙদা নোকহন্নবগী মফম অমা কন্দুনা থম্বগা চপ মান্ননা অয়েংবশিংদা উহনখি। পূম্নমক মায়োক্নবা ঙম্লক্তবদগী লম্বোইবগী ফিজোল শেৎতুনা লাইমীং লৌরগা শোক্ন-শম্নবা য়াদ্রে হায়রক্লবা মপাবু মচাশিংনা মখোয়গী অয়াবা য়াওদনা লম্বোইখিবনি হায়দুনা অথিংবা পীখিবা দ্রামানি।

সোর্স: হুইয়েন লানপাউ 
 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু