কানাদাগী মন্ত্রিয়লদা 'নাকেন্থানা লাকপদা' শৈরেং লাইরিক মখুম হাংদোকপগী থৌরম পাংথোকখ্রে
মন্ত্রিয়ল, ওক্টোবর ৩০ : বাংলাদেশতা মণিপুরী মশিং য়ামজদ্রগসু মখোয়না মশাগী নাৎ, মমালোন, চৎনা কাংলোন ঙাক্না চৎলি, কানাদা-আমেরিকাদা লৈজরগসু মদুবু য়োকখৎচদুনা থম্লি, অদুতসু নত্তনা মপান লমদা লৈজরবসু মমালোনগী সাহিত্যদা খুদোল তমদুনা বাংলাদেশকী বাংলা নত্তবা অতোপ্পা লোনগী সাহিত্যগী ইহৌদাসু ঈনোৎ অমা হাপ্পা ঙম্মিবনি। ঐখোয় পুম্নমক্না অসিগুম্বা থৌরম অসি থাগৎফম থোকই, শৌগৎপা তঙাইফদে হায়না বাংলা একাডেমী এৱার্দি, রিসার্চার অমসুং রাইটার তাজুল মোহাম্মদনা ফোংদোকখি। ৱাফম অসি বাংলাদেশকী মমিং লৈরবা অইবা, হন্দোকলোয় অমসুং কবি হামোম প্রমোদকী অনিসুবা শৈরেং লাইরিক `নাকেন্থানা লাকপদা' ফোঙবগী থৌরমদা ফোঙদোকখিবনি।
মিনিট অমা তুমিন্না লেপখৎতুনা ইকায়খুম্নবা উৎখিবাগী তাংফম অমা
ওক্টোবর ২৯, নোংমাইজিং নুমিৎতা মণিপুরী মিররনা শীন্দুনা কানাদাগী মন্ত্রিয়ল সিটিদা লৈবা কোট-ডে-নেজ কম্যুনিটি হোলদা মণিপুরী লিটরেচর এন্ড কালচারেল ইভেন্টকা লোয়ননা 'নাকেন্থানা লাকপদা' শৈরেং লাইরিক মখুম হাংদোকপাগী থৌরম পাংথোকখি। মণিপুরী এসোসিয়েশন ওব কানাদাগী এক্স-প্রেসিদেন্ট অনন্ত কুমার সিংহ (নিশি) না থৌরম মপু অদুগা মীথুংলেন ওইনা মণিপুরী জগোইগী গুরু পেবম শান্তিবালা, বাংলা একাডেমী এৱার্দি, রিসার্চার, অইবা তাজুল মোহাম্মদ, সাইন্টিস্ট অমদি মমিং লৈরবা অইবা ড. শোয়েব সাঈদ অমসুং অইবা হামোম প্রমোদ শরুক য়াখি।
থৌরমদা শরুক য়ারিবাশিংগী শরুক অমা
থৌরমগী অহৌবদা মণিপুরদা মে তাং অহুমদগী হিংসাগী থৌদোকতা মরমদমগী দমক্তা থৌৱায়না পোন্থা পিখ্রবা লৈখিদ্রবা মীতৈগী অথৌবাশিংগী মফমদা মিনিট অমা তুমিন্না লেপখৎতুনা ইকায়খুম্নবা উৎখি অমসুং অৱাবা ফোঙদোকখি।
মথংদা হামোম প্রমোদকী ‘নাকেন্থানা লাকপদা’ শৈরেং লাইরিককী মখুম মীথুংলেন ময়ামনা হাংদোকখি। লোয়ননা কবি মশামক্না শৈরেং লাইরিক অদুদগী শৈরেং খরা পাথোকতুনা তাহনখি।
মন্ত্রিয়ল অমদি ন্যুয়র্কতা লৈবা আর্টিষ্টশিংনা শরুক য়াবা ঈশৈ জগোয়গী থৌরম
মণিপুরি মিরর'গী এদিটর শেরাম রিপননা লোন অনিদা (মীতৈলোন অমসুং বাংলা) কন্ডাক্ট তৌখিবা থৌরম অদুদা লৌরেম্বম বিদ্যুৎপর্ণানা শৈরেং অমা পাথোকখি অমদি ফোংলিবা লাইরিক অসিগী মতাংদা নৈনখি অমসুং বাংলাদেশতা খু্ন্দারিবা মণিপুরীশিংগী কালচার এন্ড রিচ্যুয়েলগী মতাংদা রিসার্চ তৌরিবি ইয়াং স্কোলার নাতাশা শেরনা বাংলাদা ``লাই হরাউবা উৎসব; প্রেক্ষাপট বাংলাদেশ'' ( 'বাংলাদেশতা লাই হরাউবা') হিরম অসিদা অয়ি-চে অমা পাথোকখি। থৌরম অদুদা ৱাঙাংলোয় ওইনা শরুক য়াখি কালচারাল এক্টিভিষ্ট শামসাদ রানা, মন্ত্রিয়লদা লৈবা সরগম মিউজিক একাডেমিগী ডিরেক্তর রনজিত মজুমদার, ঢাকা য়ুনিভার্সিটিগী প্রফেসর, লিঙ্গুয়িষ্ট ড. শিশির ভট্টাচার্য অমসুং ইকোনোমিষ্ট ড. এন এন তরুণ, ইউনিভার্সিটি অব বাথ, ইংল্যান্ড, সাউথ এশিয়া জার্নালগী এডিটর অ্যাট লার্জ।
মথংদা বাংলাদা হন্দোকপা হামোম প্রমোদকী শৈরেং অমদি মণিপুরী কবিশিংগি শৈরেং কয়ামসু মন্ত্রিয়লগী মমিং লৈরবা আর্টিষ্ট তোতন আফাজ, মুফতি ফারুক, রাবেয়া হেসেন অমসুং শামীমা কালাম'না ময়ামদা পাথোকতুনা তাহনখি।
আল্পনা দেবী ( ন্যুয়র্ক সিটি )
অদুগা অনীশুবা সেসন্দা মণিপুরী জগোয়-ঈশৈগী থৌরম অমসু পাংথোকখি। মন্ত্রিয়ল অমদি ন্যুয়র্কতা লৈবা আর্টিষ্টশিংনা ঈশৈ জগোয়গী থৌরম অদুদা শরুক য়াখি। অহানবদা বাংলাদেশতগী লাকপা অপর্ণা রানী সিনহানা কবি এ কে শেরাম না হন্দোকপা নজরুল গীতি অমা মীতৌলোনদা শকখি। জগোয়-ঈশৈগী থৌরম অদুদা আল্পনা দেবী অমসুং অথোইবী মুতুম (ন্যুয়র্ক সিটি) অমদি মন্ত্রিয়দগী অথোকপম মেনকা, লিলিয়া, বেমতন, অনামিকা কেনীসু শরুক য়াখি।
0 কমেন্ট:
কমেন্ট তৌবিয়ু