আপডেট:
image

ঐখোয়গী কালচার য়োকখৎপদা লৈরিবা আর্ত ফোর্মশিং অসি কন্দবা য়ারোইঃ সিবদত্তা লুৱাং

ইম্ফাল, ওক্টোবর ১৮ : ঐখোয়গী মমল নাইদ্রবা কালচারগী পূক্কৈলনগৈশিং অসি য়োকখৎনবা হোৎনবদা লৈরিবা আর্ট ফোর্মশিং অসি কন্দবা য়ারোই হায়না এল এস তি বি (লাইনিংথৌ সনামহী তেম্পল বোর্দ) গী মেম্বার সেক্রেটারি সিবদত্তা লুৱাংনা ফোঙদোকখ্রে। সিবদত্তা লুৱাংনা ৱাফম অসি পেলেস কম্পাউন্দা লৈবা থোকচোম ইবোয়াইমা শুমাঙ লীলা শঙলেন্দা হৌজিক-হৌজিক চত্থরিবা ‘ফেস্তিবেল ওব নেরেতিব আর্ত ফোর্মস ওব মণিপুর’ গী মনুং চন্না পাঙথোকপা থৌরম অমদা ফোঙদোকখিবনি।

মণিপুর স্তেত শুমাঙ লীলা কাউন্সিল অমসুং থিয়েতার মিরর, ইম্ফাল অনী খূৎশম্নরগা হৌখিবা সেপ্তেম্বর ২৮ দগী হৌদুনা থাকূম অমা চত্থরক্লিবা মোইরাং পর্বদা য়ূম্ফম ওইবা থিয়েতার ত্রেনিং প্রোগ্রামগী মনুং চন্না পাঙথোকপা মণিপুরগী নেরেতিব আর্ত ফোর্ম মখলশিংগী ওইবা নুমিৎ মরীনিগী ফেস্তিবেল অসি হয়েং ইরাই নুমিৎতা লোইশিল্লগনি।

থা অসিগী ১৬ তগী হৌদুনা চত্থরকপা মণিপুরগী নেরেতিব আর্ত ফোর্মশিংগী ফেস্তিবেল অদুগী নীনি চনবা লৈপাকপোকপা নুমিৎতা মীতৈ ঈশৈ অমসুং মীতৈ ৱারী লীবদা য়ূম্ফম ওইবা অখন্নবা থৌরম অমাদা এল এস তি বিগী মেম্বার সেক্রেটারি সিবদত্তা লুৱাং অমসুং মণিপুর স্তেত কলা একাদেবীগী দিপ্যুটিত সেক্রেটারি কে রাজুমণিনা প্রেসিদিয়াম মেম্বার ওইদুনা পাঙথোকখ্রে।

থৌরম অদুদা সিবদত্তা লুৱাংনা হায়, ইপা-ইপুশিংনা থম্বীরম্বা ঐখোয়গী নাৎকী শক্তম অদু ঙসিদি মাঙশিল্লকপগী মমি অমা চাউনা তারকপা উরে। লমদম অসিগী আর্ত ফোর্মশিং অসিদা নাৎ, চৎনবী অমসুং কালচারগী মচাক-মরল পূম্নমক য়াওরিবনি। মরম অসিনা লৈরিবা আর্ত ফোর্মশিং অসিবু য়োকখৎতুনা কনবা হায়বসি তঙায়ফদবা অমনি। মসিদা ঐখোয়গী অচৌবা থৌদাং লৈ।

নেরেতিব আর্ত ফোর্মশিং অসিসু ঐখোয়গী কালচারগী মমল নাইদ্রবা পূক্কৈ লনগৈনি। মসিবু য়োকখৎপা, হেন্না মপাঙ্গল কলহন্দুনা হৌরক্লিবা মীরৈালশিংগীদমক থশ্লম্বা মথৌ তায়। ঐখোয়গী শক্তম অমসুং হৌরকফম থিরকপদা আর্ত ফোর্মশিং অসি নৈনরক্কদৌরিবনি। হায়রিবা কয়া অসি য়েংলকপদা অসিগুম্বা ফেস্তিবেল পাঙথোরক্লিবা অসি য়াম্না অচুম্বা অমদি অফবা খোঙথাং অমনি।

ঐখোয়গী তুংগী মীরোলগীদমক অসিগুম্বা ফেস্তিবেল, ৱার্কশোপ অমা পাঙথোকপা মথৌ তারে হায়দুনা লৈখিদ্রবা থিয়েতার দিরেক্তর নবা ৱারেপ্পা, পদ্মশ্রীনা হৌদোক্লম্বা অসি থাগৎনিংঙাইনি। মহাক্না অশানবা মীৎয়েংগা লোয়ননা হৌদোকপীরম্বা অসি লৈহৌরিবা ঐখোয়না কাওথোকপা চুম্লোই হায়নসু সিবদত্তা লুৱাংনা ফোঙদোকখি।

কে রাজুমণিনা, ফেস্তিবেল অসি মরু ওইনা ঙল্লিঙৈ মতমদগী লৈরক্লবা ঐখৈায়গী আর্ত ফোর্ম মখলশিংবু য়োকখৎপা, অমুক হন্না হিংগৎহন্নবা হায়বা পান্দম অসিদা পাঙথোকপনি। মতম খরা চঙলবসু চঙনা পাঙথোক্লিবা ফেস্তিবেল অসিগী মহৈ শোয়দনা য়াল্লকনি হায়বগী অচেৎপা থাজবা লৈ হায়না ফোঙদোকখিবগা লোয়ননা মীয়াম্নসু অসিগুম্বা ফেস্তিবেল অসি হেন্না মপূং ফাহন্নবগীদমক পূন্না শরুক য়ামিন্নবগা লোয়ননা ঐখোয়গী অরীবা আর্ত ফোর্ম মখলশিংবু মশক খঙমিন্ননবা হোৎনমিন্নসি হায়নুস আপিল তৌখি।

থৌরম অদুদা মণিপুর স্তেত শুমাঙ লীলা কাউন্সিলগী খূত্থাঙদা মণিপুর য়ুথ্স কালচারেল ওর্গানাইজেসন, পোরোম্পাৎ থৱান্থাবা লৈকায়গী মায়কৈদগী শক্নায়রবা থিয়েতার দিরেক্তর লোইতোংবম ব্রজমোহন সিংহদা খুদোলপোৎ পীদুনা ইকায় খুম্নবসু উৎখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: