এৱার্দ পীনবা অইবা অহুমগী মিং লাউথোকখ্রে
ইম্ফাল, জানুয়ারি ৩১ : লমদম অসিগী শক্নায়রবা অইবা অহুমদা মণিপুর স্তেত লাইফতাইম এচিবমেন্ত এৱার্দ ফোর লিতরেচর-২০২৪, মণিপুর স্তেত এৱার্দ ফোর লিতরেচর, ২০২৪ অমুসং মণিপুর স্তেত য়ঙ রাইতর এৱার্দ-২০২৪ পীরগনি হায়না দিরেক্তোরেত ওব লেংগ্বেজ প্লান্নিং এন্দ ইমপ্লিমেন্তেসন, মণিপুরগী দিরেক্তর লাইশ্রম রাধাকান্তনা ফোঙদোরক্লি।
দিরেক্তরগী চেরোল অমনা হায়, ইকায়খুম্ননিংঙাই ওইরবা মণিপুর স্তেত লাইফতাইম এচিবমেন্ত এৱার্দ ফোর লিতরেচর, ২০২৪ গী মনা অসি ইবোহল সিংহ কাংজম (আই এস কাংজম) না মণিপুরী খোরিরোলদা লেপ্পা লৈতনা তৌরক্লিবা শীংথানিংঙাই ওইরবা খূদোলশিংবু শকখঙবা ওইনা অইবা অসিদা পীরগনি। মনা অসিদা প্লেক অমা, সাইতেসন অমা, শাল অমা অমদি শেল ওইনা লূপা লাখ ৪ য়াওরি।
আই এস কাংজমনা লৈঙাক্না পীবা মনা অসি ফংবা অহানবা অইবা ওইরগনি। মণিপুরী লোল অমদি খোরিরোল চাওখৎহন্নবা পান্দমদা লৌখৎলকপা খোঙথাং গী শরুক অমা ওইনা লৈঙাক্না অইবশিংগী থোইদোক-হেন্দোকপা থৌদাংশিংবু শকখঙদুনা মনা অসি লান্থোকপনি। লৈঙাক্না শেম্বা মণিপুর স্তেত লাইফতাই এচিবমেন্ত এৱার্দ ফোর লিতরেচর, ২০২৪ গী মেম্বরশিং অমদি এদভাইজরি বোর্দনা মনা অসিগীদমক অইবা অসিবু খনগৎপনি।
মণিপুর স্তেত এৱার্দ ফোর লিতরেচর, ২০২৪ মনা অসি অরাম্বম ওংবী মেমচৌবীনা ইবা ‘থামম্বা অহিং’ হায়না মিংথোনবা মণিপুরী শৈরেং লাইরিক অসিদা পীরগনি। মনা অসিদা প্লেক অমা, সাইতেসন অমা, শাল অমা অমদি শেল ওইনা লূপা লাখ ৩ য়াওরি।
অরাম্বম ওংবী মেমচৌবীনা লৈঙাক্না পীবা লেমজনীংঙাই ওইরবা মনা অসি ফংবা ১৭ শুবা অইবা ওইরগনি। মণিপুরী লোল অমদি খোরিরোল চাওখৎহন্নবা পান্দমদা লৌখৎলকপা খোঙথাঙগী শরুক অমা ওইনা লৈঙাক্না অইবশিংগী থোইদোক হেন্দোকপা থৌদাংশিংবু শকখঙবীদুনা মনা অসি লান্থোকপনি। লৈঙাক্না শেম্বা মণিপুর স্তেত এৱার্দ ফোর লিতরেচর, ২০২৪ গী জুরি মেম্বরশিং অমদি এদভাইজরি বোর্দনা মনা অসিগীদমক অইবী অসিবু খনগৎপনি।
মণিপুরী খোরিরোলগী নহা অইবশিংগী মরক্তগী খনগৎলগা পীবা মণিপুর স্তেত য়ঙ রাইতর এৱার্দ, ২০২৪ অসিনা এ কে জিতেন্না ইবা ‘খোয়ুম নোংদম কাও’ হায়না মিংথোনবা মণিপুরী শৈরেং লাইরিক অসিদা পীরগনি। মনা অসিদা প্লেক অমা, সাইতেসন অমা, শাল অমা অমদি শেল ওইনা লুপা লাখ ১ য়াওরি।
এ কে জিতেন্না লৈঙাক্না পীবা মনা অসি ফংবা অহানবা অইবা ওইরগনি। মণিপুরী লোল অমদি খোরিরোল চাওখৎহন্নবা পান্দমদা লৌখৎলকপা খোঙথাং গী শরুক অমা ওইনা লৈঙাক্না নহা ওইরিবা অইবশিংগী থোইদোক হেন্দোকপা থৌদাংশিংবু শকখঙবীদুনা মনা অসি লান্থোকপনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু