আসাম গবর্নমেন্তনা মীতৈ ময়েক তমহন্নবা এসেমব্লিদা পাস তৌখিবা ঙমখৈ লৈতনা থাগৎলিঃ মীলাল
ইম্ফাল, জুলাই ১২: মীলাল কংলৈপাকনা লমদম অসিদা নৎতনা মপাল লম য়াওনা চোইনা তাখ্রবা মণিপুরীশিংদা ঐখোয়গী ঈরোল-ঈয়েক চাওখৎহন্নবা চৎঙশিল্লকপা খোঙজংগী মনুং চন্না, আসামদা তারিবা মণিপুরীশিংনা মফমদুদা মনিপুরী লোন অমদি ময়েক অসি পাক-শন্না অমদি মপূং ফানা শীজিন্নবা মরম ওইরগা চহী কায়দগী লোন অসি আসামগী স্কুলশিংদা তম্বা য়াহন্নবা আসাম লৈঙাক্তা তক্নদুনা লাকখিবগী মহৈ ওইনা চহীসিগী ফেব্রুয়ারি থাদা আসাম লৈঙাক্না মখোয়গী এসেমব্লিদা মণিপুরী লোন অমদি ময়েক অসি মফম অদুগী মণিপুরীশিংদা তম্বা য়াবগী পাস তৌখ্রে হায়না মীলাল, কংলৈপাক্কী সেক্রেতরী পাব্লিসিতি সোইবম অরুনগী চেরোল অমনা হায়রি।
চেরোল অসিনা মখা তানা হায়, মমাঙ থাগী জুন ৫দা আসাম লৈঙাক্কী এস সি ই আর তি দিপার্তমেন্তগী দিরেক্তর দাঃ নিরাদা দেবী, আসাম কোহিপারা, গুৱাহাতিনা আসামগী মণিপুরী স্কুলশিংদা মথং চহীদগী ক্লাস ৱান অমসুং তুদা তমগদবা বেঙ্গোলি ময়েক্কী লাইরিক ৬ মীতে ময়েক্তা ওন্থোক্নবা ওর্দর অমা থোকখ্রে। লোয়ননা মণিপুরী সাহিত্য পরিষদকী প্রেসিদেন্ত, সেক্রেতরী অমদি মণিপুর লেঙ্গুয়েজ প্রোতেক্সন কো-ওর্দিনেটিতং কমিতিগী প্রেসিদেন্ত অমসুং সেক্রেতরীদা অইবা চেরোল অমমমসু থাদুনা ওক্তোবর-নভেম্বর থা ফাওবগী মনুংদা মীতৈ ময়েক্কী লাইরি শেম-শানবা খঙহল্লকখ্রে। মসিগী মতুং তারকপা ওইনা, ঙরাং তাং ১১ গী নুংথিল পূং ২ তাবদা মণিপুরী সাহিত্য পরিষদ আসামগী ‘মরুং শঙলেন’ সিলচরদা মীফম অমসু পাঙথোকখ্রে হায়রি।
আসাম লৈঙাক্না মণিপুরী লোন অমদি ময়েক চাওখৎহন্নবা অকনাব থৌশিল-থৌরাং অমা হন্দক লৌখৎপীরকপা অসিগীদমক মিলালগী প্রেসিদেন্ত খাইদেম ইঙোচানা ময়ায় তাংবল লৌদুনা ঙসি মীফম অমা মীলাল ময়ায় লোয়শঙদা পাঙথোকখিবগা লোয়ননা আসাম লৈঙাকপু ঙমখৈ লৈতনা থাগৎপা ফোঙদোকখ্রে হায়নসু চেরোল অসিনা মখা তারি।
সোর্স: পোক্নফম
0 কমেন্ট:
কমেন্ট তৌবিয়ু