বিশ্বামিত্র অমসুং হৈস্নাম তোম্বদা হৱাইবম নিলমণি এৱার্দ লান্থোকখ্রে
ইম্ফাল, জুলাই ১৩: রুপমহল থিয়েতরনা পীবা হৱাইবম নিলমনি মেমোরিয়েল এৱার্দ শক্নায়রবা থিয়েতর দিরেক্তর অনী মথংশীৎনা খ্বায়রাকপম বিশ্বামিত্র সিংহ অমসুং হৈস্নাম তোম্বা অনীদা ঙসি লান্থোকখ্রে।
রুপমহল থিয়েতর ইম্ফালনা শীন্দুনা বি তি রোদতা লৈবা থিয়েতর গ্রুপ অসিগী ওদিতোরিয়ামদা পাঙথোকখিবা থৌরম অদুদা মণিপুর গবর্নমেন্তগী কমিস্নার (আর্ত এন্দ কলচর) মোংজম জয় সিংহনা চীফ গেস্ত, রুপমহল থিয়েতর, ইম্ফালগী ভাইস চেয়ারমেন লোইতোংবম ব্রজমোহন্না প্রেসিদেন্ত অমসুং মণিপুর স্তেত কলা একোদেমীগী সেক্রেতরী সুনন্দা থোকচোমনা গেস্ত ওব ওনর ওইনা শরুক যঅখি।
থৌরম অদুদা থিয়েতারগী দিরেক্তর খ্বাইরাকপম বিশ্বামিত্র সিংহদা হৱাইবম নিলমনি মেমোরিয়ে এৱার্দ-২০২৩ অদুগা কলাক্ষেত্র মণিপুরগী দিরেক্তর হৈস্নাম তোম্বদা হৱাইবম নিলমনি মেমোরিয়েল এৱার্দ-২০২৪ খূৎশিন্নদুনা মখোয়না মণিপুরী থিয়েতরগী লমদা তৌরিবা খূদোল কয়া অদুগীদমক ইকায়খুম্নবা ঊৎখি। এৱার্দ অসিদা শেল ওইনা লুপা লীশীং ১০, সাইতেসন অমদি লেংয়ান ফি অমা য়াওরি।
থৌরম অদুদা চীফ গেস্তকী ৱারোল পীরদুনা এম জয় সিংহনা হায়, প্রোফেসন খুদীংমক্তা কত্থোকপা য়াওদ্রবদি মায় পাক্লোই। অনীশুবা লাঞ্জাও ইং ১৯৩৯ -১৯৪৫ ফাওবগী মতম অসি মণিপুরী থিয়েতরগী খোঙচৎতা য়াম্না শীংনবা তাঞ্জা অমা ওইখি। অদুগুম্বা তাল্লক অদুদা রুপমহল থিয়েতর অসি মরু হুম্লকখিবনি। মতম অদুগী অহল-লমনশিং অদুনা রুপমহল থিয়েতর অসি লিংনবা য়াম্না ৱানা হোৎনরকখিবা অমসুং মখোয়গী কত্থোকপগী ৱারী কয়াদু নীংশিংলদুনা হৌজিক লৈরিবা আর্তিস্ত অমসুং হৌরক্লিবশিংনা অহলশিং অদুগী কত্থোকপগী থৌনা অদু লৈনবা হোৎনবা চঙই হায়নসু মহাক্না ফোঙদোকখি।
মণিপুর স্তেত কলা একাদেমীগী সেক্রেতরী সুনন্দা থোকচম্না হায়, খুন্নাই অসিগী অরানবশিং চুমথোক্তুনা অচুম্বা মায়কৈদা পুনবা হোৎনবদিা থিয়েতারনা অচৌবা থৌদাং কয়া লৌদুনা লাক্লি। থিয়েতর হায়বসি খুন্নাই অমগী মিংশেলগুম্বনি। অদুবু হৌজিক মণিপুরী থিয়েতরগী খোঙজেল অসি তপথরকপগী মমি অমা উরিবা অসি য়াম্না লাইবক থীবনি। থিয়েতরগী খোঙজেল অসি কনখৎহন্নবা ঐখোয় পূন্না হোৎনমিন্নসি। করি করম্বা খোঙথাং লৌখৎলগা থিয়েতরগী খোঙজেল অসি হেন্না য়াঙশিল্লক্কনি হায়বদু লমসিগী অখঙ-অহৈ, অহল-লমনশিং য়াওনা ৱার্কশোপ, সেমিনা পাঙথোক্তুনা খন্নবদা একাদেমিগী মায়কৈদগীসু অঙম্বা থৌদাং অদু লৌনবা হোৎনজগে হায়না ফোঙদোকখি।
পনবা য়াবদি, হৱাইবম নিলমনি মেমোরিয়েল এৱার্দ-২০২৩ অসি মমাঙ চহীগী জুলাই ৭ তা লান্থোক্কদবনি। অদুবু লৈবাক্কী ওইবা ফীবম্না মরম ওইরগা য়ৈথোরক্তুনা ঙসি লান্থোকখিবনি।
ইং ২০২৩ গী ওইনা মনা অসি ফংলবা থিয়েতর দিরেক্তর খ্বাইরাকপম বিশ্বামিত্র সিংহ ইং ১৯৬৪গী সেপ্তেম্বর ১২ দা ইম্ফালগী ব্রহ্মপুর অরিবম লৈকায়দা লৈবা খ্বাইরাকপম চিত্তরঞ্জন সিংহ অমসুং গুরু অরিবম ব্রোজেশ্বরী দেবী অনীগী অহানবা ফংজবা মচানুপানি।
বিশ্বামিত্র আর্তস গ্রেজুয়েত খক নত্তনা ইলেক্ট্রোনিক্স এন্দ তেলিকোম ইঞ্জিনিয়ারনি। মায়থোং য়াম্বা আর্তিস্ত অসি থিয়েতরগী লমসিদা তোঙান-তোঙানবা মনা-মথুং কয়াসু ফংখ্রে। লোয়ননা মহাক ফিল্ম মেকর অমসুনি, এক্তরনি, প্রদ্যুসরনি, স্কৃনপ্লে রাইতর অমসুনি। ফিল্মগী দিরেক্তর অমা ওইনা মণিপুরী ফিল্ম ৫৪ রোম হেনবদা দিরেক্সন পীদুনা স্তেত, নেসনেল অমসুং ইন্তারনেস্নেল থাক্তা মনা কয়াসু ফংবা ঙমখ্রে। লোয়ননা মহাক ওল ইন্দিয়া রেদিও ইম্ফালগী ‘এ গ্রেদ’ আর্তিস্ত অমসুনি।
ইং ২০২৪ গী হৱাইবম নিলমনি মেমোরিয়েল এৱার্দ ফংখ্রবা হৈস্নাম তোম্বা ইং ১৯৬৬ কী ফেব্রুয়ারী ১ দা কৈশামথোং থাংজম লৈরক্তা পোকই। মণিপুরগী শক্নায়রবা থিয়েতর দিরেক্তর হৈস্নাম কহ্নাইলাল, পদ্মশ্রী অমসুং শক্নায়রবী এক্ট্রেস হৈস্নাম সাবিত্রিগী মচানুপা অহলনি। থিয়েতারদা কত্থোক্লবা পলেম-পন্থৌ অনীগী মপারী ওইবনা ইং ১৯৮২ দা মেত্রিক পাস তৌরবা মতুং মহৈ মখা তানা তমথবগী মহুত্তা থিয়েতরগী লমদা খোঙ থাংজিনবা হৌরকখি। অপোকপনা লিংখৎলম্বা থিয়েতর গ্রুপ কলাক্ষেত্র মণিপুরনা পুথোকপা লীলা কয়াদা এক্তর অমা ওইনা তোঙান-তোঙানবা রোল কয়াদা শক্তম লাংখ্রৈ। হৌজিক্না কলাক্ষেত্র মণিপুরগী দিরেক্তর ওইবদা নৎতনা প্লেরাইত, কোরিওগ্রাফার অমসুং ম্যুজিক দিরেক্তরগী অচৌবা থৌদাং সু লৌরি।
মহাক্কী গ্রুপ অসিনা পুথোকপা প্লে কয়া জাপান, মালেসিয়া, স্পেননচিংবা য়াওনা মালেমগী তোঙান-তোঙানবা লৈবাক কয়াদগী ইনভাইত তৌরক্তুনা উৎলুবদা নৎতনা থিয়েতরগী ৱার্কশোপ অমদি ত্রেনিং কয়াসু পীরুরে। থোইদোক্না ইন্দিয়াগী মমিং লৈরবা থিয়েতর দিরেক্তর রুস্তম বরুচানচিংবা দিরেক্তর কয়ানা দিরেক্সন পীবা প্লেশিংদা মালেমগী মমীং লৈরবা আর্তিস্ত আলোকনন্দ সলরথননচিংবগা কো-এক্তসু তৌমিন্নখে। হৈস্নাম তোম্বা এক্তর, প্লে দিজাইনর, ম্যুজিক দিরেক্তর, প্লেরাইত, দিরেক্তর অমা ওইনা ইন্দিয়ান থিয়েতরদা অমসুং মণিপুরী সিনেমাদা শকখঙনবা মীশক অমা ওইরি।
সোর্স: পোক্নফম
0 কমেন্ট:
কমেন্ট তৌবিয়ু