আর কে সনাতোম্বা জর্নেলিস্ত এৱার্দ লান্থোকখ্রে
ইম্ফাল, জুন ৩০ : আর কে সনাতোম্বা মেমোরিয়েল ত্রাস্তনা চহী খুদীংগী পীদুনা লাকপা আর কে সনাতোম্বা মেমোরিয়েল জর্নেলিস্ত এৱার্দ লান্থোকখিবগা লোয়ননা ‘কংলা লানপুঙ’ ভোল্যুম-১৫ ইসু ১ ফোঙবগী থৌরম ঙসি কোনুং মনুং, হিজাগাং লম্বীদা লৈবা কোম্বীরৈ হাউসতা পাঙথোকখ্রে।
চহী অসিগী ওইনা ২১ শুবা আর কে সনাতোম্বা মেমোরিয়েল এৱার্দ অসি তোম তিভিদা হান্না লৈরম্বা হৌজিক্না সঙাই এক্সপ্রেসকী রিপোর্তর ওইরিবা খারিবম য়াইফবা মীতৈদা খূৎশিন্নখি। মনা অসি হৌখিবা চহী ইং ২০২৩ দা এগ্রিকলচরেল ইনোভেসন্সদা য়ূম্ফম ওইবা মহাক্কী রিপোর্তিংশিংদা পীখিবনি। মনা অসিদা শেল ওইনা লুপা লীশীং ২৫ গা লোয়ননা সাইতেসন অমসু য়াওরি।
থৌরম অসিগী শরুক অমা ওইনা ফোঙখিবা ‘কংলা লানপুঙ’ ভোল্যুম-১৫ ইসু ১ অসিদা এন আই পি জি আরগী রিসার্ছ স্কোলার লোইতোংবম লোরিন্দা দেবী, খোংনাংথাবা য়ুনিভার্সিতিগী রেজিস্ত্রার দাঃ অতোম সুনিল, জে এন য়ুগী রিসার্ছ স্কোলার চবুঙবম ববিনা অমসুং প্রিয়াঙ্কা দেবী ক্ষেত্রিময়ূমগী আর্তিকলশিং য়াওরি।
ঙসিগী থৌরম অদুদা লৈখিদ্রবা আর কে সনাতোম্বগী অপোকপী মঙ্গী সিজ, এ ব্রজকুমার শর্ম্মা অমসুং লৈহাওথাবক সরতচন্দ্র শর্ম্মানা প্রেসিদিয়াম মেম্বরশিং ওইনা শরুক য়াখি।
পনবা য়াবদি, ‘কোনুং সনাতোম্বা’ হায়রগসু খঙনবা আর কে সনাতোম্বা ইং ১৯৬৩ দা এম কে খেদাসনা অমসুং মঙ্গী সিজগী মচা ৯গী মনুংদা খ্বাইগী ইতোন তোনবা মচা ওইনা পোকখি। মহাক পীক্লিঙৈদগী হৌনা শান্না-খোৎনবদা থৱায় য়াওনা হৌরকখি। মণিপুর নেসনেল ফেদরেসনগী জেনারেল সেক্রেতরী ওইনা লৈবাক্কী থৌগায় কয়াসু পুরমখি।
মতম অদুদা মণিপুর নেসনেল ফেদরেসন্না ফোঙলম্বা ‘কংলা লানপুঙ’ হায়রিবা চেফোঙ অসিগী এদিতরসু ওইরমখি। মহাক ইং ১৯৯৩ গী জুন ৩০ দা লাইবক থীবা থৌদোক অমদা তাইবঙপাল থাদোকখি। মহাক্না লৈখিদ্রবা মতুং ইং ২০০৪ দগী মহাক্কী ইমুং-মনুং অমসুং মরূপ-মপাঙশিংনা ত্রস্ত অসি লিংদুনা চহী খুদীংগী লেপ্তনা এৱার্দ অসি লান্থোকপগা লোয়ননা চেফোঙ অসি অমুক নৌহৌননা ফোঙলকখিবনি।
সোর্স: পোক্নফম
0 কমেন্ট:
কমেন্ট তৌবিয়ু