তরেৎ শুবা কছার দিস্ট্রিক্ট থাঙ-তা চেম্পিয়নশিপ ২০২৪ লোইশিন্দুনা মনা-মথুম য়েন্থোকখ্রে
ইম্ফাল, জুন ৩০ : অসামগী কছার দিষ্ট্রিক্টকী সোনাইদা লৈবা থাঙ-তা মার্সিএল আর্টস এন্দ কলচরেল এসোসিয়েসননা শীন্দুনা সোনাইগী কালিবারিদা লৈবা বির টিকেন্দ্রজিৎ ওদিটোরিয়ামদা চত্থরকখিবা তরেৎশুবা কছার দিস্ট্রিক্ট থাঙ-তা চেম্পিয়নশিপ, ২০২৪ ঙসি লোইশিনখিবগা লোয়ননা চেম্পিয়নশিপ অসিদা অথোই অহেন তারবশিংদা মনা-মথুম য়েন্থোকখ্রে।
পাঙথোকখিবা চেম্পিয়নশিপ অসিদা ইষ্টর সোনাই থাঙ-তা একাদেমিনা টিম চেম্পিয়ন ওইখি অদুগা ওল অসাম মীতৈ হুয়েন লাংলোন থাঙ-তা এসোসিয়েসন (কমরঙ্গ) না রান্নর্স-অপ তাখি।
শান্নরোয় ৮০ না শরুক য়াখিবা চেম্পিয়নশিপ অসিদা নুপামচাগী কাঙলূপ্তা ওভরওল বেষ্ট ফাইটরনা লক্ষিপুর থাঙ-তা একাদেমিগী লিসম রনাট সিংহানা ফংলগা নুপীমচাগী ওভরওল বেষ্ট ফাইটরগী মনানা ওল অসাম মীতৈ হুয়েন লাংলোন থাঙ-তা এসোসিয়েসন কমরঙ্গগী মাইবম বিনিতানা ফংখি।
চেম্পিয়নশিপ অসিদা ফুনবা অমা, ফূনবা অনীশুবা অমসুং খোঙলোন-খুৎলোন হায়না মশান্না অহুম থোক্না খাইদোক্তুনা পাঙথোক্তুনা শান্নরোয়বশিংবু শরুক য়াহনখি। তোঙান তোঙানবা কেটেগোরি অহুম অসিদা সিনিয়র, জুনিয়র অমসুং সব জুনিয়র হায়নসু খাইদোক্লগা নুপামচা অমসুং নুপীমচাশিংবু শরুক য়াহনখিবনি।
ঙসি চেম্পিয়নশিপ অসি লোইশিনবগী মনা-মথুম য়েন্থোকপগী থৌরমদা কছার দিষ্ট্রিক্ট থাঙ-তা এসোসিয়েসনগী প্রেসিদেন্ট খোমদ্রাম বুদ্ধচন্দ্র, অসাম থাঙ-তা এসোসিয়েসনগী প্রেসিদেন্ট ৱাহেংবম বিনোয়, এসোসিয়েসন অসিগী ভাইস প্রেসিদেন্ট য়ূম্নাম মনিকান্ত অমসুং জোইন্ট সেক্রেটারি ইঙুদম সুনন, ত্রেজরর শগাপম রুহিটকুমার অমসুং জেনরেল সেক্রেটরি এল রাজুনা মথংশিৎনা মীফম মপূ, অথোইবা মীথুং অমসুং ইকায়খুম্নরবা মীথুংশিং ওইনা মরুক য়াখি।
থৌরম অসিদা শরুক য়াখিবা মীওইশিংনা চেম্পিয়নশিপ অসিগা মরী লৈনবা ৱাফমশিং ফোঙদোক্তুনা শরুক য়াখিবা শান্নরোয়শিংগী পূক্নিং থৌগৎখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু