সিএমনা বাংলাদেশকী কালচারেল টিমগী কাংবুশিংগা উন্নখ্রে
ইম্ফাল, নভেম্বর ২৩ : মণিপুর সঙাই ফেষ্টিভেলদা শরুক য়াবা লাক্লিবা বাংলাদেশকী মণিপুরী কালচারেল কমপ্লেক্সকী কালচারেল টিমনা ঙসি অয়ুক পুং ১০.৩০ রোম তাবদা চিফ মিনিষ্টার এন বিরেনগা মহাক্কী ওফিস বাঙ্গলোদা উন্নখ্রে। উন্নবা অদুদা চিফ মিনিষ্টার এন বিরেনগী মায়কৈদগী বাংলাদেশকী কালচারেল টিম অদুবু তরাম্না ওক্লদুনা বাংলাদেশতা লৈরিবা মণিপুরীশিংগী য়াইফনবা ষ্টেট সরকারগী মায়কৈদগী পাংবা য়াবা মতেং পাংগনি হায়না থাজবা পীখ্রে হায়রি।
চিফ মিনিষ্টারগা উন্নখিবা অদুদা বাংলাদেশকী কালচারেল টিমগী মীহুৎশিং অদুনা মখোয়না থেংনরিবা অৱা নুংঙাই কয়াগী মতাংদা পাউদমখি। কালচারেল টিমগী মীহুৎশিংগী মায়কৈদগী ফোংদোকখিবা ৱাফমশিং অদুবু তারবা তুংদা চিফ মিনিষ্টারনা হায়খিবদা, বাংলাদেশতা লৈরিবা মণিপুরীশিং পুং-জগোই, নৎ সঙ্কীর্ত্তন তাকপি তম্বিনবা ওজা থারগনি। অরাংফম, দেব কর্ম্ম, লাইরিক থিবা-হায়বগী মরমদা নিংথিনা তাকপি তম্বীনবা ওজা থারক্লগনি। ফিশা-লোন্সাদা চংবা মেশিনারি কয়া অমসু ষ্টেট সরকারগী মায়কৈদগী মতেং পীগনি। মণিপুরগী কালচার বাংলাদেশতা দিভলপমেন্টকীদমক ষ্টেট সরকারগী মায়কৈদগী পাংবা য়াবা মতেংশিং পাংনবা হোৎনগনি।
বাংলাদেশ, আসাম অমসুং ত্রিপুরাগী মণিপুরীশিংনা মরমদম মণিপুরদা লাকপদা নিংথিনা লেকফম চাফম পীনবগীদমক্তা মণিপুরী গেষ্ট হাউস অমা শাগৎলি হায়না ফোংদোক্লদুনা সঙাই ফেষ্টিভেলদা বাংলাদেশকী মণিপুরীশিংনা শরুক য়াবা লাকখিবগীদমক থাগৎপা ফোংদোকখি। লোয়ননা মথং চহিদা সঙাই ফেষ্টিভেলদা বাংলাদেশকী কালচারেল টিম অসি মীওই ৫০-৬০ দগী তাদনা শরুক য়াবা লাক্নবা খংহনখি।
পনবা য়াবদি ঙসি চিফ মিনিষ্টারগা উন্নখিবা অদুদা বাংলাদেশকী কালচারেল টিমগী মায়কৈদগী সুরচন্দ্র সিংহ (রিটেয়ার্দ) সিনিয়র এডভোকেট সুপ্রিম কোর্ট ওফ বাংলাদেশ, শশী কুমার সিংহ (রিটেয়ার্দ) এদিস্নেল সেক্রেটারি মিনিষ্ট্রি ওব রেলওয়ে বাংলাদেশ, কোংখাম নিলমনি সিংহ (রিটেয়ার্দ) এদিশনেল সেক্রেটারি মিনিষ্ট্রি ওফ পাব্লিক এদমিনিস্ট্রেশন বাংলাদেশ, ডাঃ অরুনকুমার শর্ম্মা, কার্দিওলোজিষ্ট স্পিসিয়েলিষ্ট, জয়ন্ত সিংহ, প্রেসিদেন্ট মণিপুরী কালচারেল কমপ্লেক্স বাংলাদেশ য়াওনা দেলিগেট অমসুং আর্টিষ্ট পুন্না ৪০ না শরুক য়াখি।
চিফ মিনিষ্টারনা বাংলাদেশকী কালচারেল ট্রুপশিংগা উন্নখিবা অদুগা মরী লৈননা মহাক্কী ফেসবুক একাউন্টতা থাগৎলকখিবা ৱারোল অমদা হায়রিবনা, বাংলাদেশকী ইচিল ইনাও অমসুং ইচে ইচলশিংনা মখোয়গী মপা-মপুগী লমদা লাক্তুনা মণিপুর সঙাই ফেষ্টিভেলদা শরুক য়ারিবশিংগা ঙসি মহাক্কা উন্নখিবা অদু য়াম্না পেন্নিংঙাই ওই। মখোয়গী নোল্লুকপা অমসুং নুংশিবগী মতৌ অদু উবদা য়াম্না পুক্নিং নুংশিনিঙাইনি হায়রি।
সোর্স: থৌদাং
0 কমেন্ট:
কমেন্ট তৌবিয়ু