আপডেট:
image

আন্দামানদা লোই থাখিবা মণিপুরগী অথৌবা ২৩ নীংশিংখ্রে

ইম্ফাল, নভেম্বর ২৩ : অদুঙৈ কুমজা ১৮৯১ দা মণিপুরগী নীংতম্বা ঙাক্নবগীদমক থৌনা ফনা বৃটিশকা শোক্নখিবা লানদা মায়থীরবা মতুং মণিপুরগী লৈঙাকলোন বৃটিশনা পায়শিনখ্রবা মতুংদা মখোয়না পীখিবা চৈরাক ওইনা আন্দামান অমসুং নিকোবরদা লোই থাখিবা মণিপুরগী অথৌবা ২৩গী নীংশিং খুভমদা ঙসি মখোয়বু নীংশিংদুনা হৈকৎ-লৈকৎ তম্বগা লোয়ননা থাঙ-তাগী সেল্যুট পীদুনা ইকায়খুম্নবা উৎখ্রে।

মণিপুরগী পুৱারীগা শাগোন্নরক্লিবা অথৌবা ২৩বু নীংশিংবগী থৌরম অসি উরিপোক চৈরাপ মনিংদা লৈবা ফোরাম ফোর প্রোটেক্সন ওফ হেরিটেজ ওফ ২৩ অন্সং হেরোজ (আন্দামান চেপ্টার) ১৮৯১ না শীন্দুনা পাঙথোকখিবনি। অদুগা থৌরম অসিবুনা লৈঙাক্কী মায়কৈদগী মপাল কাংজৈবুংগী শরুক্তা মখোয়গী মমিং মথাশিং হক্তুনা শঅদুনা থম্লক্লিবা নীংশিং খুভমদা পাঙথোকখিবনি। থৌরমগী মনুং চন্না ককচীংতাবম গুনচন্দ্র ইবা ‘আন্দামানদা লোই থাখিবা অথৌবা ২৩’ হায়না মিংথোনবা লাইরিক অমসু ফোঙদোকখি।

থৌরম অসিদা অথোইবা মীথুংলেন ওইখিবা মাহুদ মিনিষ্টার খেমচান্দনা ফোঙদোকখিবদা হৌজিক্কিী মনিপুর অসি তংদু লৈতাদবা হায়গদ্র পুময়েৎতা য়েৎনদুনা নাকপাক তাদুনা লৈবগী ফীভম অসি নুঙাইতে। মসিগী মহুত্তা য়ান্নগদবা অমদা য়ান্নরগা অদুম চৎলবসু য়াবদা নাকপাক তাবগী ফীভমদা অদুমক লৈরি। মৈতৈ অমুক হায়বা অদুগা মীতৈ অমুক হায়বগী ফীভম অসিমকসু নুঙাইতে।

আন্দামান অমসুং নিকোবরদা মীতৈগী অথৌবশিং লোই থাখিবগী ৱারীসি য়ূম্নাম তোম্বনা ৱারী শাবদগী চহী ১৫ রোম খঙলমদ্রবা মতুংদা খঙলকখিবনি। প্রাইম মিনিষ্টার অমসুং হোম মিনিষ্টারদা মেমোরেন্দামশিং মথং মথং পীশিন্নরকপদগীসু হেন্না খঙনরকপনি। মসিমক্না আন্দামান অমসুং নিকোবর ঈথৎকী মাউন্ট হেরিয়েটপু ‘মাউন্ট মণিপুর’ ওন্থোরকখিবনি। মফম অদুদা মালেমগী মীয়াম্না য়েংদুনা লাকপা য়াবা মফম অমা ওইনা শেমগৎনবগীদমক্তা মিউজিয়াম য়াওবা সুপার ষ্ট্রাকচারশিং লৈহন্নবা লৈঙাক্কী মায়কৈদগী শেম শাবা হৌরে, মখা তানা লাক্কদবা চহীদদি ইকায়খুম্নবা উৎপগী থৌরম অসিমক ষ্টেট ফাঙ্কসন ওইনা পাঙথোরক্কনি হায়বগী থাজবসু লৈ হায়না ফোঙদোকখি।

ঙসিগী আন্দামান অমসুং নিকোবরদা লোই থাখিবা অমসুং নিকোবরদা লোই থাখিবা মীতৈগী অথৌবা ২৩বু নীংশিংদুনা মখোয়গী খুভমদা হৈকৎ লৈকৎ তম্বগী থৌরম অসিগী মপু ওইখিবা রাজ সভাগী এমপিসু ওইরিবা নিংথৌ লৈশেম্বা সনাজাওবনা ফোঙদোকখিবদা মখোয়বু খোঙ্গুল লীনবগী থবক মতম কয়াগী মমাঙদগী চত্থরকখিবনি। অদুগা হৌজিক ফংলক্লবা মখোয়গী পুৱারীশিং অসিসু থাজরুদবা মঙলান অমদগী ওইরকখিবনি। হোম মিনিষ্টার অমিট শাহনা মাউন্ট হেরিয়েটপু মাউন্ট মণিপুর হায়না ওন্থোকপীরকখিবগা লোয়ননা চীফ মিনিষ্টার এন বিরেননা অথৌবা ২৩ গীদমক নীংশিং খুভম অসি শাদুনা থম্বীরকপা অসিমক মণিপুর মীয়ামগী লাইবক ফবনি। অদুবু মণিপুরগী অখঙ অহৈশিং অসি মখোয়না খঙবদুনা লোইরবদৌনা তৌবা মানবা অমা য়াওরি। অৱাৎ অপা য়াওরম্বা অমসুং অশোয়বা লৈরম্লবসু শেমদোক শাদোক্কদবনি। মসিদা ইকায়নীংঙাই লৈতে হায়খি।

নিংথৌ লৈশেম্বা সনাজাওবনা মখা তানা ফোঙদোকখিবদা ঐখোয়গী পুৱারী অসি চুম্না থম্লম্বা অমসুং তুংদা হৌরক্লিবা ইচা-ইশুশিংদা ময়েক শেংনা খঙহনবা  চঙই। ঐনা তৌবা থবক্তি চুমথোকপা য়াদে হায়দুনা লৈবা চুম্লোই। ফুরুপ অসিবু নুংশিবা অমদি অথৌবশিং অদুগী অশেংবা মচা মশু ওইরগদি অশোয়বা অরানবা য়াওরম্লগসু খোঙফম হন্দোক্নদুনা শেমদোক শাদোক্কদবদি। চীফ মিনিষ্টারগা ৱারী শানবদসু অথুবা মতমদা লোই থাখিবা অথৌবা ২৩গী নীংশিং থৌরম অসি ষ্টেট ফাঙ্কসন ওইরগনি হায়না ফোঙদোরকপা লৈরে হায়খি।

মসিগীদমক প্রোসেস তৌবা হৌরবনিনা শোয়দনা ওইরগনি। হৌজিক লৈরিবা লৈঙাকসিগী চীফ মিনিষ্টার য়াওনা এম এল এ, মিনিষ্টারশিংনা লমদম অসিগী করিগুম্বা খরদি তৌরমসি হায়বগী ৱাখল্লোন লৈঙাকলোইশিংদা লৈরি হায়খি। মহাক মশামকসু এম পি ওইরগা মীয়ামগী করিসু তৌরমদ্রগদি কান্নবা ফংলোই। অদুবু মীওই খরগী মরক্তা ঙাঙথোরকপদনা লৈবাকপু য়াম্না নুংশিবা মানবা অদুগা নাকল অমরোমদনা থৌগল্লোন য়াওদবগী মসিসু উই। মসিদি ইপা ইপুশিংগী মফমদা অমোৎ অকায় তৌশিনবগুম থোক্কনি। মরম অসিনা হায়রিবা থবক অসি চুমদে। ঐখোয়নুস ইপা ইপুশিংগীদমক্তা অঙম্বা করিগুম্বা খরদং ওইরবসু হোৎনরমগনি হায়খি।

ঙসিগী থৌরম অদুগী মনুং চন্না হুয়েন লালোং সটজাল একাদেমিগী মায়কৈদগী তা পায়বা শগোল লান্মী ২ য়াওনা থাঙ-তাগী আর্টিষ্টশিংনা অথৌবশিংগী মফমদা সেল্যুট পীখি। থৌরম অসিদা ফোরামগী প্রেসিদেন্ট উসম বিহারিনা অখন্নবা মীথুংলেন ওইখি।

সোর্স: হুইয়েন লানপাউ।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু