image

সাহিত্যনা শমজিনবিরবা কাউঙম্লরোইদবা বাংলাদেশ খোঙচৎ -সোবিতা সৌবাম


ফাইরেলগী অঙাওবা লৈচিল, ফাইরেলগী মঙাও থিবা নুংশিৎ ইচাদা চান্নখি ফাইরেলগী অঙাওবা থম্মোয়সু, চৎত্রিঙৈদগী খনখ্রবনি, হেক থোক্লকপগা নিংশিং মমিশিংসে অমতা চিত্থদনা তাবুনুংগী মখুম হাইদোক্তুনা থেল্লগে লৈচল কোর্ব্বাকথকসিদা। ইসু ইরবনি অদুবু লোইশিন্দুনা মতম চান পরেংসে লান্থোকচবদি ঙমজখিদে, চহী চাম্মা থবক চাম্মা হায়বদুনা খুরৌ ওই, মতম খরদি খোঙলৌ থিন্থখরে, নুংশি মপাউ তমজবসে।

নুমিৎ খরনিগী মমাং বাংলাদেশ চৎত্রিঙৈগী মাংওইননা পুক্নিংসে নিংকোক নিংকোক লাওখি, কদোমদগী ফাওজিল্লকখিবা ৱাখলনোসু খঙদে, অদুবু কনামত্তদদি পন্থোকখিদে, চিন্দুংগা ইনখ্রিদা খন্দুনা, থম্মোয়সে ইনৌ নৌদুনা য়েংউ য়েংউ খুদিং পংনুংদা নুংশিখি ঐনা চৎতৌরিবসে ইরমদম ৱাংমনি খল্লুবদা।

নুমিৎতো দিসেম্বর ২৩, ২০২২ ইরাই নুমিৎনি। ফ্লাইটতা চৎতৌফাও চৎতগৈ ঐখোয়গী মণিপুরদা ত্রেন য়ৌরক্লদবু হায়দুনা খোঙশাং তান্না এম এস টি বাসতা চৎতুনা ত্রেন তোং লুরিবনি। ওজা অমনা অয়ুক্কি পুং ৫.৩০ দা মোইরাংখোমদা য়ৌবিরকউ, পুং ৬.০০ তাখ্রগনা ৱাহেংবম লৈকায় বাস পার্কিংদা য়ৌবিরকউ হায়বদগী ময়াম চৎমিন্নগদবা থবক্নি অদুনা য়াহৌ থেংদুনা নংহৌদ্রদি কায়না খন্দুনা অয়ুক্কি পুং ৩.০০ দা এলার্ম থমদুনা হৌগৎলি। অয়ুক্কি ধুপ থাউমৈ মফম খূদিংকৎপা লোইরে, অশোয় অঙাম য়াওদনা হঞ্জরক্কে হায়দুনা লৈমরেল লাইনিঙথৌদা তরেৎকী শেঞ্জাসু লেপচদুনা চৎননবা থৌরাং লোইদুনা মোইরাংখোমগী এমএসটি দা চৎলে।

ঐখোয় ইম্ফালদগী চৎমিন্নবসে মী ২০নি, নুপী ১৫ অমদি নুপা ৫ অদুবু পুন্না আ য়ৌরগা খঙই, ইম্ফালদগী পুন্না মী ২৪, মখোয় অতৈদুদি জিরিবামদগী চংলকপনি। ঐখোয়না নোনেদা পুং ১০.৩০ দা চাক চায়, অদুগা অমুক য়ৌরকপদুনা খোঙশাংদা পুং ১.৩০ অদুৱাইদা থুংঙি, ষ্টেশন হেক য়ৌবদু খোঙনা চৎলদি ৱানি অদুনা গাড়ী পার্কিংদা খাম্বিয়ু হায়রুবদগী আ: লাপ্না খামদুনা মী অমমমদা লুপা ৫০/৫০ পীদুনা অমুক গাড়ী অমদা তোংদুনা চৎলি, মহা কুম্মৈ অমনি, ত্রেন তোংবা নংহৌদদনা হায়না পাখৎনরুরবনি। নুংথিলগী পুং ২.২০ দা ঐখোয়না তোংগদৌবা ত্রেন শতাব্দি এক্সপ্রেস থুংলরে, পুং ২.৪০ দা থাগদবনি।

য়াম্না নুংঙাইরি তোংবদা টানেল ফাও ফাওদুনা চৎপদা য়েংনা য়েংনা য়ৌখিবা খঙহৌদে। নুমিদাংগী পুং ৬.৪৫ দা বদরপুর রেলওয়ে ষ্টেশনদা ঐখোয় থুংলে অমদি অটো খরা ফাদুনা ঐখোয় করিমগঞ্জগী গৌরি হোটেলদা নুমিদাং লেক্নবগীদমক পুং ৮.১০ দা থুংলে, ইচেম্মা হাওবম নলিনী, চোংথাম ইনেবেম্মা সুবদনি অমদি ঐ, ঐখোয় অহুম রুম নম্বর ২০৪ দা লৈরে। ৱাখলনা পাককা তুমথবা য়াদে, নিংশিংলকই মথং মথং ঐনা য়ুমদগী থোক্লকপদা ইচাশিং ইশুশিং বোবোক্না হল্লকত্রিফাও নকোক ফাও চিকঅমগনু নান্থদুনা থম্বিরম্বা, মখোয় তুম্না হিপ্নরম্মদ্রা পঙপাদা পাখৎচৈ, ঐনা মনাক্তা লৈরিখৈ মখোয় কৈসু তৌরোইদবোইদা খল্লি। অমুকসু নিংশিংলকই চীংয়াগী লম্বীশিং ফাও ফাওদুনা বাসতা লাকপদা লৈশা পাখং ফানরক্লবা পাম্বীশিংনা নেমতক নেমতক ফানা পুন্নবা ঙমদবমখৈ উফুলনা মশা পুম্বা পাউদার থারদুনা কেনা কেনা লৈনা জগোয় শারদুনা ঐখোয়বু য়েংলদুনা অশোয়-অঙাম য়াওদনা হল্লকউ হায়না মখুৎ-মশা হাইর হাইরদুনা নুংশিনা য়েংদুনা লৈহৌবদো।


ডিসেম্বর ২৪, থাংজ নুমিৎ অয়ুক ঙন্না হৌগৎনদুনা ইরু মায়থজনদুনা ইথৌ লোইশিন্নদুনা গাড়ী খরা কৌদুনা বোর্দার লানশিন্নবগীদমক ঐখোয় ইন্দিয়াগী বোর্দারদা অয়ুক্কি পুং ৭.১৫ দা করিমগঞ্জদগী খোঙশানলক্লে। অয়ুক্কি পুং ৯.০০ তাবদা হাংনি হায়দুনা ইন্দিয়াগী অহানবা চেক পোষ্টকি ময়াদুদা ঙাইরে। পুং ৯.০০ তাবগীদি ঐখোয়গী পাসপোর্টতু য়েংদুনা অহানবা চেক তৌদুনা চংলে। অদুদগী কাষ্টম ওফিস তান্না চংগদবশিং গাড়ী থারক্তুনা ঐখোয় চৎলে, য়াম্না কুপ্না চেক তৌবগা লোয়ননা অরোই অরোইবা ফোটো নম্মী অদুগা অমুকসু থংনবা কাদা চংদুনা পাসপোর্ট ভিসা অমুক পিশিনলি অমদি ঐখোয়গী সুইট কেস লগেজনচিংবদু এক্সরে লৌরগা য়ারে হায়দুনা থাদোরক্লে, মফমদুগী চৎথোক চৎশিন তৌনবা মখোয়গী ফ্রি সার্ভিস তৌই অদুগা লোয়ননা ইন্দিয়াগী অরোইবা চেক তৌফমদুদা অমুক চংলে, মদু ইন্দিয়াগী অরোইবা চেক তৌফম্নি মদুদনা পোৎ চৈ লোয়ননা বোডি সার্চসু তৌই অদুগা অমুক থংনবদা পাসপোর্ট অমদি ভিসাদু অমুক হন্না য়েংবগা লোয়ননা ফোন নম্বর লৌহৌদুনা ইন্দিয়া মনুংগী চেক তৌবা পুম্লোই লোইদুনা ঐখোয় বাংলাদেশ বোর্ডার লানশিল্লে। অদুবু চেক ময়ামসি তৌবদা কুইনা চঙখিবদুনা ৱাবসি করি হংঙুনি, সি ওইরেকো ফোরেন খোঙচৎ খনখি।

হেক চংবগা থাংজম চাউরেন্না ঐখোয়না থাজিনগদবা ফোর্ম অদু মানা মেনবা য়াবখৈ মেনশিনবিরম্লে, মদুদা ৱাৎলিবসে ইশা ইশাগী মীংগা, শোয়গা অমদি মোবাইল নম্বরগদা ঙাইরে। মদুদদি কুইদ্রে, অমুক থংনবদা বাংলাদেশকী কাষ্টম ওফিসনা অমুক চেক তৌরে, য়াম্না থুনা লোইরে অমদি থোক্লক্লগা হান্না ঙাইদুনা লৈরম্লবা অশিন অরাংগী মায়কৈদগী ইপ্বা খুন্দ্রাকপম সোমোরেন্দোনা লুচিংবা খরনা গাড়ী বাস অনী পুরক্তুনা খামদুনা হান্না লৈরম্লে, অদুবা ৱানরনি অয়ুক্কি চাক খরদং অফংবা হোটেল অমদা চারসি হায়দুনা চারে। মতমদু নুংথিলগী পুং ২.০০ তারবনি। নে হেক তায় অসুক ৱাব্রা খনখিবদু বাংলাদেশকী লৈমায়গা হেক থেংনবদগীদি নুংশিরবা ঈগী মরি ইচিন ইনাওশিং থেংনরুরুগনি খনবগী নুংঙাইবদুনা অৱাবা পুম্বা কাউথোকখ্রে।
নুংথিল পুং ৩.৪১ অদুৱাইদা বাস থাদুনা ঐখোয় চংশিনলে সিলেট তম্না, নুমিদাংগী পুং ৬.২০দা গুলশান হোটেল, সিলেটতা থুংলে। ঐখোয়বু বাংলাদেশতা হেক থুংবদগী থোক্লকপা ফাওবা করিদা শোয়খিদগদে খন্দুনা শেন্নবিরকখিবা ইকায়খুম্নজরবা পুকচেল চাওরবা শক্নাইরবা ওজা কবি এ কে সেরাম অমদি মহাক্কী খোঙবুরোইশিংবু অৱাংবা থাক্তা ইকায়খুম্নবা ফোঙদোকচরি।

তাং ২৫, ২৬ অমসুং ২৭ দিসেম্বর ২০২২, সোর্ট ষ্টোরি সোসাইটি, ইন্দিয়া অমসুং বাংলাদেশ মণিপুরী সাহিত্য সংসদ অনিনা খুৎশম্নদুনা নুমিৎ হুম্নি চত্থবা প্রোগ্রাম জিলা পরিষদ হোল সিলেটতা ২৯ শুবা লৈপাক্কী ওইবা ৱারীমচা পাবগী থৌরম দিসেম্বর ২৫, ২০২২ ইং কুমজা, নোংমাংজিং নুমিৎ অয়ুক্কি পুং ১০.৩০ অদুৱাইদা লুপকি অমদি বাংলাদেশকী ফিরাল চিংখৎতুনা পিক্লিবা অঙাংশিংনা লৈপাক নিংবা ঈশৈ শক্তুনা থৌরম হৌদোক্লে। পুঙ চোলোম অমদি মোইবুং খোংদুনা থৌরম অদু হৌদোকপগা লোয়ননা সিনাম তনুবাবু মেমোরিয়েল এৱার্দ মুতুম রমনিদা লান্থোক্লে অমদি লুপকি খোমজিনবা ৱারী মচাগী লাইরিক ‘পন্থুং তম্না’ মায়খুম হাংদোক্তুনা মীয়ামদা শীন্নরে। অদুগা অয়ুক্কি লাঞ্চ লৌমিন্নরবা মতুংদা সেকেন্দ সেসন্দা ৱারীমচাগী মতাংদা সিম্পোজিয়াম অমা পাংথোক্লে, মদুদা শরুক য়াখিবসি ডা: কুমারী চনু, ডা: মুতুম অনুরাধা অমুসং সেরাম নিরঞ্জন্নি, অদুগা মোদারেটরনা প্রোফেসর নহাকপম অরুনানা ওইখি। নুমিৎসিদা ৱারীমচা মিনিট ৫/৬কী ওইবা মীওই ২৫ রোমনা পাথোকখি। নুমিৎসিদা য়াম্না নুংঙাইখিবদি বাংলাদেশকি ইনাও ইবেম্মা কৈনাহন অমদি মিনতি দেবীনি, হান্না খঙনজরগসু শক্কা শক্কা উনদুনা শখখঙনবদি নুমিৎসিদনি।

তাং ২৬ থৌরমগী নিনি চনবা নুমিৎ অসিনা ভানুগাছকী মণিপুরী কালাচারেল কমপ্লেক্স তা পাঙথোক্কদবনি, অয়ুক্কি পুং ৮.৩০ অদুৱাইদা খোংশানবা হৌরে। পুং ১১.৫০ দা ইনিংথৌ মারজিৎনা বাংলাদেশকী সিলেটতা তাংজদুনা লৈখি অমসুং মণিপুরদা অমুক হনখিদরে মসিদা ইনিংথৌনা থোল্লম্বা খামেনচৎপা ফৈজোম, ফুরিৎ অমা, খুরুমগী খোংঙুপ অমসুং থাঙশাং অমা চেকশিন্না মহাক্কী তরেৎশুবা শুরোল রাজকুমার সুরজিৎনা থমহৌরি। মফমসি রানীবাজার রাজবাড়ী হায়নসু খংনৈ হায়না তম্বিরকই। অদুগী অমুক ভানুবিলদা চৎেলে, লময়ানবা ইরাবতকী মুর্ত্তি খিল্লিবা অদুদা চংদুনা লৈ কৎলবা মতুংদা থম্মোয় শেংনা ইকায়খুম্নবা উৎলবা মতুং চা অমদি বিস্কিট চাদুনা ঙহাক পোত্থনরবা মতুংদা পুং ১.৪৫ দা মণিপুরী কালচারাল কমপ্লেক্স, তেতইগাঁও, কমলগঞ্জদা থুংদুনা চাক্লেন চারবা মতুংদা অমুক প্রোগ্রাম চৎথরে, মদুদা নুপী ইচিল ইনাওশিংনা থোংলম্বা চাক ইন্সাংশিংদু অমুক হন্না চানিংলি। মদুদা ঐনা হান্না খংনজবা ইপ্বা ইবুংঙো অৱাংতাবম সোমোরেন্দ্র অমদি মনি অবুজম থেংনজবা লোইননা রৌশনআরা বাঁশী ইনাওনুপী থেংনজবা অসুক্কি মতিক নুংঙাইজখি।

মফমদুদা অমুক হৌনবী মতুং ইন্না মালেমগী থাক্তা ৱারী মচা পাবগী থৌরম মখা চৎথরে, মতমগা থেংজিনলকপনা অইবা অইবী খরগী ৱারীমচা পাথোক্লগা নংহৌদবশিংদু অরোইবা তাং ২৭ সি পাথোক্নবা হায়বিরক্লে। ঐদি পাবু পাখৎলুরবনি মরমদি ফজবা-ফজদবা, হৈবা-হৈতবা ৱারীমচা পাবগী থৌরম য়াওজনিংবদগী নুংশিরবী বাংলাদেশ তম্না ঈগী মরী ইচিল উনাওশিং উন্নজবগা লোইননা বাংলাদেশকী লৈমায়দা মমী অমমতং তাহনজদুনা খোঞ্জেল অমতংদি থোকচরমগে খন্না চৎচরিবনি, অদুবু অরোইবা নুমিৎসিদা ফংদি ফংজখি, ঐনা নুংঙাইবসিদি করি অমুক হায়রুনি অরাম খৌরাংবনা চরি তৎলবদা অহাউবা চাক ইন্সাং পুক থন্না চাজবগা লোয়ননা ঈশিং থকচবমুক নুংঙাইজখি। নুমিদাংগী পুং ৭.১৫ দা মফমদু থাদোক্লমদুনা সিলেটকীদমক খোংশাল্লক্লে, হল্লকপগী লম্বীদা নুমিদাংগী চাকসু চারক্লে।

মতাংসিদা পঞ্জরমদ্রদি নুংঙাইজদবা অমতংদি বাংলাদেশকি জিলা কয়াদা শন্দোক্না মৈতৈ খুঞ্জা কয়া খুন্দারম্মী হায়, মতমগী শাফুনা মফম কয়াদা মৈতৈ নাৎ খুনতাক্নখ্রবসু হৌজিক সিলেট দিভিজনগী জিলা মরিদদি চোয়জায়ননা মৈতৈশিং খুন্দাদুনা লৈ। মসিগী মনুংদা মৌলভীবাজার জিলাগী উপজিলা মঙাদা মৈতৈ খুন্দারি। মঙাসিগী মনুংদা কমলগঞ্জ উপজেলাগী য়ুনিয়ন মঙাদা মৈতৈ খুঞ্জা তরামরি খুন্দারি। মখোয়না মৈতৈবু অসুক্কি মতিক, মতিক মগুণ লৈবা ফুরুপ্নি হায়না শক্তাকচদুনা হিংলি, খুল তরামরিদুগী মমিং পঞ্জরমগে।

১) ভান্ডারীগাঁও (মৈতৈ মাধবপুর) ২) হুমেরজান (নগর, নীলকুঠি), ৩) মঙ্গলপুর ৪) চিতলিয়া (চিত্রি) ৫) ভানুবিল ৬) নয়াপত্তন (মঙ্গেমখোঙ মমাং লৈকাই) ৭) তেতইগাঁও (মঙ্গেমখোঙ মনিং লৈকাই) ৮) ছনগাঁও (হামোমখুল) ৯) কোনাগাঁও ১০) শ্রীপুর ১১) গঙ্গনগর ১২) হক্তিয়ারখোলা ১৩) কাটাবিল ১৪) ছয়চিরি (নন্দ লৈকাই) সিলেট মেট্রোপলিটন সিটিগী মনুং চন্না খুন্দারিবা মৈতৈ খুঞ্জাশিংগী মিংদি মখাদা মথংশিৎনা থমজরি। ১) শিবগঞ্জ ২) নয়াবাজার/কুশিঘাট ৩) বড়বাজার (নোংমাইথেম লৈকাই) ৪) সুবিদবাজার (খুনৌ) ৫) আম্বরখানা (থৌদাম লৈকাই) ৬) সাগরদিঘীরপাড় (পুখ্রিমপান) ৭) বাঘবাড়ী (নরসিং টিলা) ৮) লালাদিঘীর পাড় (সাপম লৈকাই) ৯) লামাবাজার (লৈচমলৈকাই)  ১০) মির্জাজাঙ্গাল/মণিপুরী রাজবাড়ী (কোনুং) ১১) কেওয়াপাড়া ১২) খাদিম বহর মণিপুরী পাড়া (দক্ষিণকাছ) ঐনা মথক্তা পঞ্জরিবশিং অসি অৱাংতাবম সোমোরেন্দ্রদগী লৌজবনি, মানদি খুলশিংসিগী মরমদা খরা খরা পনবিরকই অদুবু শাংমনখ্রনি হায়দুনা তেনশনজরে। মৈতৈশিংনা মতিং লৈনা মীথোয় মীহৈন্না মীতৈগী চৎন লোনচৎ য়ারিবমখৈ ঙাক্তুনা হিংননবা হোৎনবদুবু হন্না হন্না থাগৎচবগা লোয়ননা চাউথোকচৈ।

অরোইবা নুমিৎ দিসেম্বর ২৭ সিনা মণিপুরী রাজবাড়ী মন্ডপ, সিলেটনি। মসিদা অৱাৎপা ৱারী মচা পাবিবগদবশিং পাবগা লোয়ননা চহীগী শেনবা থুম্বা মীফম পাঙথোক্তুনা ২৯ শুবা চহীগী মীফম লোইশিনখি। মন্দিরদুদা লাৎলিবা শ্রীকৃষ্ণ রাধাগী মুর্ত্তি, জগবন্ধুগী মুর্ত্তি অমদি গৌরাঙ্গনচিংবা মুর্ত্তি মচা মচা কয়াগা লৈরিবা মফমদুদা ধুপ আরতি হাইদুনা পূজা লোইরবা মতুংদা চারকপা মহাওদু পুন্সিগী কাওনি থাজদে। পূম্নমক অসি মরু ওইনা ওজা এ কে সেরামনা লুচিংদুনা হোৎনবিবনি অমদি ঐখোয়গী অৱাৎ অপা তোয়না হংবিদুনা পাউ ফাওনজবা খুন্দাকপম সোমোরেন্দ্রো অমসুং সেরাম নিরঞ্জনগী চাওরবা মতেংবুস পুন্সিসিদা নিংশিংদুনা লৈরনি।

অসুম্না তম্বতনা চিত্থহৌরবা নুংঙাইরবা সাহিত্যগী খোঙচৎ অমগী অরোইবা বাংলাদেশকী থোঙজিন্দা ফাওবা ওজা এ কে সেরামনা করিদা শোয়খিগদগে হায়না ঐখোয়বু তাং ২৮/১২/২০২২ গী অয়ুক পুং ৭.৩৮ দা সিলেটকী গুলশান হোটেল থাদোক্লমদুনা ঐখোয় ইম্ফালদগী চৎচবা মীওই ২০দু বাস অমদা তোংদুনা আখাউড়া তান্না থীন্দোকপীরক্লে, লম্বীদা অয়ুক্কি পুং ১১.০০ দা ব্রেক ফাষ্ট লৌরে, নুংথিলগী পুং ২.০ খরা হেনলকপদা ইন্দিয়াগী বোর্ডারদা থুংলে অমদি চেক নুং খরা তৌরবা মতুংদা ইন্দিয়া বোর্ডার লানশিল্লক্লবদা অমুক ত্রিপুরাগী সাহিত্য পরিষদকী ওজা বিপ্লব শর্ম্মানা লুচিংদুনা ঐখোয়বু ওকপিরম্লে অমদি ভি আই পি ইন্টারনেসনেল হোটেলদা পুশিনবিদুনা য়াম্না নুংঙাইনা অহিংদুমা লেক্লে।

নুমিদাংদা ওজা লাংগোনজম বিরমঙ্গোল, থৌদাম নিল্লকুমার অমদি ওজাশিং খরগা লোয়ননা লাকপিদুনা নুংশিনা পুকমেন পাওমেন্নজরকখি, মীওইবগী মীনুংশি হায়বসিদগী হেন্না চাউবা ধর্ম্ম অমা লৈতে হায়বদু চুম্মি, পুন্সিগী কাউররোই। তাং ২৯ দিসেম্বর নুমিৎসিদা নুংথিলগী পুং ২.০০ গী ফ্লাইট নি অদুবু খরা থেংথরগা মহারাজ বীর বীক্রম এয়ারপোর্ট আগরতলাদগী পাইরক্তুনা ইম্ফাল এয়ারপোর্টতা নুংথিলগী পুং ২.৫০ দা প্লেন্দগী কুমথরক্লে।

মতম্না খুয়ৌনখিবনা খঙন চান্নবা ইচিল ইনাওশিংগী য়ুমদা চংবগী খুদোংচাবা ফংজরক্ত্রবসু নুংশিবা অমদি নুংঙাইবা খোঙচৎ অনিনা পুল্লগা হল্লকখিবা কাউঙম্লরোইদবা থৌদোকশিংদুনা লাইবক ফরদি অমুকসু চৎনিংবগী ইখৌ লাংবগা লোয়ননা সাহিত্যনা নুংশিরবা ঈগী মরী ইচিল ইনাওশিংদুবু পুনশিনবগী নুংঙাইবদু ঙসিসু কাউঙমদ্রি। মসিদা ঐনা অরোইবদা সোর্ট ষ্টোরি সোসাইটি ইন্দিয়াগী থৌপুরোইশিংবু থম্মোয় শেংনা থাগৎপা ফোঙদোকচরি। চহী খুদিংগী মফম হোং-হোংদুনা পাঙথোকপিরিবা থৌরম অসি অশোই অঙাম য়াওদনা পাঙথোকপা ঙমহনবিয়ু হায়নসু মপুগী মফমদগী নিজরী।

 

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু