লিসিপ্রিয়ানা ইতালিগী প্রাইম মিনিস্তর জিওর্জিয়া মেলোনি অমসুং পোপ ফ্রান্সিস উনখ্রে
ইম্ফাল, মে ২৭ : মশাগী চহী ১২ খক্তা ঙাইরিবী মালেমগী শক্নাইরবী ক্লাইমেত অমদি এনবাইরোনমেন্তেল এক্তিবিস্ত লিসিপ্রিয়া কাঙুজমনা ইতালিগী প্রাইম মিনিস্তর জিওর্জিয়া মেলোনি অমসুং খৃষ্টান লাইনিং গী মকোক ওইরিবা ফেতিকানগী হেদ পোপ ফ্রান্সিসকা উনখ্রে। হন্দক মণিপুরদা থোক্লিবা ঈরাং অসিদা অৱাবা তারবা মীয়ামগীদমক অখন্নবা শেলগী পেকেজ অমা পীবনবা লিসিপ্রিয়ানা তকশিনখ্রে।
লিসিপ্রিয়ানা কুকিশিংনা মীতৈদা লাল্লে হায়জরবদি ঈরাং অসি অথুবদা লোইশিন্দুনা শান্তি লৈনা নুংশি চান্ননা অমুক অরিবা কুকিশিং গা লৈমিন্নবা য়অগনি হায়না পোক ফ্রান্সিসতা পাউদমখি। ইতালি অমসুং অমেরিকা, অতৈ য়ুরোপ লৈবাকশিংদসু মীতোপ চঙশিল্লকপা থিংবা অদুগুম্বা ঐখোয়গী মণিপুর গবর্নমেন্তসু মীতোপ কয়অ আইন্না য়াদবা মওংদা ইন্দিয়াগী বোর্দর লান্না চঙশিল্লকপশিং থিংনবা হোৎনবনি।
মণিপুরদা মীতোপ কয়া লোগী ৱাংমদা চঙশিল্লক্তুনা উ-ৱা কয়া পাক্তক্ননা য়ান্থৎখিবনা ঙসিদি মহৌশাগী লৈজরম্বা খল কয়া শাথিনা অকায়বা পীরে। চেল্লম্বা তুরেল কয়া চেনখিদ্রে, পাৎ কয়া কংখ্রে, অশংবা চীংশাং কয়া মরু কোকখ্রে অমদি মীওই কয়া থক্নবা ঈশিং ফংদবগী অৱাবা মায়োক্নরে হায়না ফোঙদোকখি।
মসিদসু নত্তনা হন্দক্তসু অকনবা নোংলৈ নুংশিৎ কয়া লাক্তুনা মীওই কয়া লৈফম লৈহন্দ্রে। মতম চাদনা চুরকপা নোংনা মায়কৈ অমরোমদা ঈশিং ঈচাউ কয়া মাযোক্নরি অমসুং মায়কৈ অমদা শাবগী চাং হেনগৎলকপনা হিত ওয়েব শিংদগী ঙাকথোক্নবা স্কুল কলেজ কয়া ছুতি থাদোকখিবনা অঙাংশিং লাইরিক তম্বা ফংদ্রে হায়নসু লিসিপ্রিয়ানা পাউদমখি।
মণিপুরদা হৌজিক থোক্লিবা ঈরাং অসি ধরম্ম্গা মরী লৈনদে। মসিদি অনৌবা কুকি কয়া মণিপুরদা চঙশিল্লক্তুনা মখোয়গী ওইবা অনৌবা লৈঙাক অমা শেমগৎনবা লোন্না হোৎনরকপদগী থোকহল্লকপনি। মসি মাঙজৌননা প্লান তৌবনি হায়না ৱারী শানবা অদুদা লিসিপ্রিয়ানা লুচিংবশিংদা ফোঙদোকখি। ঈরাং অসিনা মীওই ৭০,০০০ হেনবগী ময়ুম মকৈ মৈ থাবিখ্রে, অঙাং ৩০,০০০ হেন্না তুংগী পুন্শি মাংবগী ফীবমদা লৈরে অমসুং অঙাং ৩০০ হেনবনা মমা-মপা কায়নখ্রে।
মরম অদুনা মণিপুরদা কম্ম্যুনিতি রি-বিল্ডিং তৌনবা হ্যুমেনিতরিয়ান সপ্পোর্ত ওইনা য়ু এস দোল্লর মিল্লিয়ন ১০০ গী পেকেজ অমা লিসিপ্রিয়া ফাউন্দেসনগী খূত্থাংদা পীবীনবা ৱাফম হৌদোক্তুনা খন্নখি।
ইতালিগী প্রাইম মিনিস্তর জিওর্জিয়া মেলোনিগী মায়কৈদগী ৱাফম অদু থবক্তা ওন্থোক্নবা হোৎনগে হায়বগী থাজবা পীরকখি। হেন্না লাইবা পাম্বৈদি মতেঙ অসি লৌনবা ইন্দিয়া লৈঙাক্না মখোয়দা চিথি অমা থাবিরগদি হেন্না চাউবা মতেঙ পীবা য়াগনি হায়না ফোঙদোরকখি হায়রি।
ভেতিকানগী পোপ ফ্রান্সিসনসু লিসিপ্রিয়াদা অঙম্বা সপ্পোর্ত পিগনি অমসুং মণিপুরদা শান্তি পুরক্নবা কন্না হোৎনৌ হায়নসু পাউতাক পীরকখি হায়রি। লিসিপ্রিয়ানসু ক্লাইমেত এদজুকেসন, ক্লাইমেন্ত ফাইনান্স অমসুং পেলেস্তাইন্দা থোক্লিবা লান অসি লেপহন্নবা মালেমগী ওইবা ৱাফম কয়াসু খন্নখি হায়রি।
সোর্স: পোক্নফম
0 কমেন্ট:
কমেন্ট তৌবিয়ু