লাইশ্রম সোমোরেন্দ্রোনা ইবা লাইরিক্তা সাহিত্য একাদেমিগী মনা পীরগনি
ইম্ফাল, মার্চ ১১ :লমদম অসিগী শক্নাইরবা হন্দোক্লোই লাইশ্রম সোমোরেন্দ্রদা সাহিত্য একাদেমীগী প্রাইজ ফোর ট্রান্সলেসন, ২০২৩গী মনা পীনবা লাউথোকপদা য়াওরে।
মনা অসিগীদমক সাহিত্য একাদেমীগী এগজিক্যুটিভ বোর্দনা তোঙান তোঙানবা লোলদা হন্দোক্তুনা ফোঙবা লাইরিক ২৪ এপ্রুভ তৌবদা মণিপুরগী ওইনা লাইশ্রম সোমোরেন্দ্রোনা হন্দোকপা মীৎতাংবা শগোলগী মিংদা অঙম্বা কৎপীয়ু হায়না মিংথোনবা লাইরিক অসি য়াওরকপনি।
লাইরিক অসি পাঞ্জাবী অইবা গুরদিয়ালনা ইবা ‘অনহে গোরে দা দান’ হায়বা মিংথোনবা নোবেলদগী লাইশ্রম সোমোরেন্দ্রোনা হন্দোকপনি। এৱার্দ অসিগীদমক তোঙান তোঙানবা লোলগী জুরি মেম্বার ৩/৩ শাবা সেলেক্সন কমিতিনা থাগৎলকপা রিকমেন্দেসনগী মতুং ইন্না লাইরিক ২৪ দা সাহিত্য একাদেমি প্রাইজ ফোর ত্রান্সলেসন-২০২৩ অসি পীনবা একাদেমি অসিগী এগজিক্যুতিব বোর্দনা লাউথোরকখিবনি। দাঃ ইরুংবম দেবেন সিংহ, দাঃ ঙাঙোম একাশিনী দেবী অমসুং ফুরাইলাৎপম ইবোয়াইমা শর্ম্মা অহুম্না মণিপুরী লোলগী জুরি মেম্বারশিং ওইখি।
লাইরিক অসি চহী ৫গী মমাঙ হায়বদি কুমজা ২০১৭ গী জানুয়ারি ১দগী ২০২১ গী দিসেম্বর ২১ ফাওবগী মনুংদা ফোঙখিবা লাইরিক ওইগদবনি। মনা অসিনা শেল ওইনা লুপা লীশিং ৫০ অমসুং কোপর প্লেক য়াওরি। মনা অসি চহী অসিদা পাঙথোক্কদবা অখন্নবা থৌরম অমদা হন্দোক্লোইশিং দা লান্থোক্কনি হায়রি।
সাহিত্য একাদেমি প্রাইজ ফোর ট্রান্সলেসন ২০২৩ গী মনা ফংলগদবা লাইশ্রম সোমোরেন্দ্রো কুমজা ১৯৬৪ গী এপ্রিল ১৯দা ইম্ফালদা পোকখি। মহৈগী থাক্না কেমিষ্ট্রিদা পোষ্ট গ্রেজুয়েটনি। মহাক হৌজিক মণিপুর গবর্নমেন্তকী ত্রেদ এন্দ কম্মার্স এন্দ ইন্দাস্ত্রিজ দিপার্তমেন্ততা থবক তৌরি। মহাক রাইতার্স ফোরাম ইম্ফালনা ফোঙবা ‘সাহিত্যগী পাউ’ হায়রিবা চেফোঙ অসিগী এদিতর ওইরম্মী। ইং ২০১৫ দা ফোঙখিবা মহাক্কী ‘অরোইবা মৈরী’ হায়রিবা লাইরিক অসিগীদমক মণিপুরী সাহিত্য পরিষদনা পীবা লবুকতোংবম রঘুমণি শর্ম্মা ত্রান্সলেসন এৱার্দ -২০১৮ গী মনা ফংখ্রবনি।
সোর্স: পোক্নফম
0 কমেন্ট:
কমেন্ট তৌবিয়ু