মীতৈদা অতম্ননা লান্দারকখিবা অসি অকনবা মওংদা য়ানিংদেঃ বাংলাদেশকী মীতৈ
ইম্ফাল, জুন ১৩: বাংলাদেশতা খুন্দারিবা মীতৈ ইচীন-ইনাওশিংনা মমাঙ চহী ইং ২০২৩ গী মে ৩ দগী চিন-কুকি-নার্কো তেরোরিস্তশিংনা মণিপুরগী মীতৈ ইচীন-ইনাওশিংদা অতম্ননা লান্দারকখিবা অসি অকনবা মওংদা য়ানিংদবা ফোঙদোকখিবগা লোয়ননা হৌজিক তোঙান-তোঙানবা রিলিফ কেম্পশিংদা লাঞ্জেন্নদুনা লৈরিবা মীতৈ ইচীন-ইনাও অমদি লান অসিদা লৈখিদ্রবা অথৌবশিংগী ইমুং-মনুংগী অৱাবদা শরুক য়াবা লাকচবনি হায়না বাংলাদেশতগী লাকখিবা অপু ঙাংবমনা ফোঙদোকখ্রে।
ঙসি নুংথিল মণিপুর প্রেস ক্লবকী থাংজিং হোলদা পাঙথোকখিবা পাউমীশিংগা উন্নবা অমদা মহাক্না মখা তানা হায়, বাংলাদেশকী মীতৈ ইচীন-ইনাওশিংনা মণিপুরগী অৱাবা তারবশিং অসিগী খজিক্তং ওইরবসু মতেঙ ওইনবা হায়দুনা লানসি হৌরকপা মতমদা পেত্রিওটিক রাইতার্স ফোরাম মণিপুরগী সেক্রেতরী রাকেস নাওরেমগী খুত্থাঙদা লুপা ১,৭৫,০০০ খুৎশিন্নদুনা চীফ মিনিস্তরগী রিলিফ ফান্দদা হাপচিন্দুনা মীতৈ ইচীন-ইনাওশিংগী অৱাবদা থম্মোয় শেংনা শরুক য়ারি হায়বদু উৎচখিবনি।
সাপোর্ত ফোর মণিপুর হায়বা ৱাখল্লোন অসিগী মখাদা মমাঙ থা মে ৩১ দা বাংলাদেশতগী ঐখোয় ৩ মণিপুরদা থুংলকখি। থুংলবা মতুং দা ককচীং, বিষ্ণুপুর, থৌবাল, ইম্ফাল ওয়েস্ট অমদি ইম্ফাল ইস্তকী তোঙান-তোঙানবা রিলিফ কেম্প ১১ রোমদা অঙম্বা পোৎলমশিং মতেঙ পাংখি হায়না ফোঙদোকখি।
মহাক্না মখা তানা, বাংলাদেশতা খুন্দারিবা মীতৈ ইচীন-ইনাওশিংগী মায়কৈদগী মণিপুরগী মীয়ামদা থমজনিংবা ৱাফমদি মণিপুরগী নুংঙাইবা পাউ তাজরগা বাংলাদেশতা খুন্দারিবা মীতৈ ঐখোয়সু অদুক্কী মতীক হরাওজবা অমদি নুংঙাইজবা ফাওই। থোইদোক্না মনিপুরগী শান্নরোয় কয়ানা ৱার্ল্ড চেম্পিয়ন কয়াদা গোল্ড মেদল লৌরক্তুনা ইন্দিয়াগী মিংচৎ পুরকপা মীৎকুপশিংদা ঐগী ঈগী হৌরকফম মণিপুরনা য়াইফরে হায়দুনা ঐখোয়না হরাওনা পোক্নফম লমদম ওইজরিবা বাংলাদেশকী জাতি কয়াগী মমাঙদা ইখৌ পোংনা লাউজরিবনি অমদি চাওথোকচরিবনি।
অদুগা অমরোমদা অমুক, মণিপুরদা অৱা-অনা খুদোংথীবা অমদি লান মায়োক্নরে তাবদা ঐখোয় লৈফম-চাফম খঙদে। বাংলাদেশকী মীতৈ ঐখোয় পূম্বা মফমসিদা লোইনা লাক্তুনা লান অসি হকথেংননা মায়োক্ননিংই। মদুদা থৱায় থাখ্রবসু ইমা লৈবাক্কীদমক থৱায় থাবা ঙমজরে হায়দুনা চাওথোকপসু ঙমগনি। অদুবু লৈবাক অমমমদা লৈনখিবা ওইবনা থম্মোয়গী ওইবা অশেংবা নুংশিবগী মরী, মিনুংশিগী তেংবাঙ খরা পাংজবা অসি নৎতনা ঐখোয়গী থৌনা পাঙ্গল লৈতে। মণিপুরগী শক্তম মীতৈ ঐখোয়না লিংজেল মান্ননা অমত্তা ওইনা ঙাকমিন্নসি।
ঐখোয়গী ফজখ্রবা কলচর, আইদেন্তিতি, লোল, ময়েক, স্পোর্তস, পূম্নমক অসি মালেমগী মীয়াম্না কল্লক্নরিবনি। মণিপুর অমদি সেন্তর গবর্নমেন্ত অনীনা চহী ১ হেল্লক্লবা মণিপুরগী লান অসিগী ৱাইরোশিন অসি অথুবদা পুরক্তুনা মীয়ামগী পুন্সি, লন-থুম অমদি লমদমসিগী ইন্তিগ্রিতি ঙাকপীয়ু হায়নসু মহাক্না মখা তানা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু