আপডেট:
image

মণিপুরগী মপান্দা অহানবা ওইনা পুনেদা বির টিকেন্দ্রজিৎকী দ্রামা ‘মরৈবাক নীংবা কোইরেংসনা’ উৎলুগদৌরি

ইম্ফাল, জুলাই ২৩ঃ অদুঙৈ কুমজা ১৮৯১ গী এপ্রিল ২৩দা মণিপুরগী নীংতম্বা কন্নবগীদমক মায়থীরগনি খঙলবা ফাওবদা মায় লৈদুনা চেনবগী মহুত্তা য়েক্নবগা পুন্সিগী অরোইবা মীকুপ ফাওবা লান্থেংনখিবা ‘এঙলো মণিপুরী ৱার’দা মায়থীরবা মতুং বৃটিশনা ফৈদাবুংদা ফাঁসি তৌদুনা হাৎখিবা বির টিকেন্দ্রজিৎনা লৌখিবা মরৈবাক্কী থৌদাংদা য়ূম্ফম ওইবা প্লে ‘মরৈবাক নীংবা কোইরেংসনা’ মহারাষ্ট্রগী পুনেগী ভিমান নগরগী ক্লোভর পাকর্টা লৈবা সিম্বাইওসিস অদিটোরিয়ামদা মথং থাগী ১৩ (অথৌবশিংগী নীংশিং নুমিৎ) তা উৎলগদৌরি।

 

অথৌবশিংগী নীংশিং নুমিৎকী থৌরম মণিপুর লৈঙাক্না ষ্টেটকী থাক্তা পাঙথোরকপগা ইরোয়ননা মণিপুরগী মফমশিং য়াওনা মণিপুরী ফুরুপশিং তাবা মালেমগী মফম অতৈদসু মহৌশাদগী পাঙথোক্নদুনা লাকখ্রবসু বির টিকেন্দ্রজিৎকী মরমদা পুথোকপা প্লেবু ইহান হান্না মণিপুরগী মপান্দা নুমিৎ অসিমক্তদা উৎপদি হন্দক্কী অসিনা অহানবা ওইগদৌরি। প্লে অসি শাংলবা চহী ৪৫ রোম থিয়েটারদা খোঙদাদুনা লাক্লবা মণিপুরগী শক্নাইরবা থিয়েটার পার্সোনেলিটি শরুবম বীরেননা দিজাইন তৌরগা দিরেক্সন পীগদবনি।

 

মহারাষ্ট্রগী পুনেদা লৈবা এসোসিয়েসেন অব মণিপুরী দাইস্পোরা (অম্মন্দ) পুনেনা ওর্গানাইজ তৌদুনা উৎকদবা দ্রামা অসি মণিপুর থিয়েটার একাদেমিনা পুথোকপনি। মথং থাগী ১৩দা পাঙথোক্কদৌরিবা ১৩১ রক শুরকপা মণিপুরগী অথৌবশিংগী নীঙশিং নুমিৎতা মণিপুর থিয়েটার একাদেমিনা পুনেদা অম্মন্দগা খুৎশম্নদুনা ‘মরৈবাক নীংবা কোইরেংসনা’ হায়রিবা দ্রামা অসি উৎলুনবগীদমক থৌরাং তৌরক্লিবা দ্রামা অসিগী দিজাইনার অমসুং দিরেক্টর শরুংবম বীরেনগা শানখিবা ৱারীদা মহাক্না হায়, হৌজিক ফাওবগী ওইনা মণিপুরগী নীংতম্বা কন্নবগীদমক থৱায়না পোন্থা পীখিবশিংগী মনুংদগী খ্বাইদগী মশক নাইবা মীওই অমা ওইখিবা বির টিকেন্দ্রজিৎকী দ্রামা অমা চহী খরগী মমাঙদগী মণিপুরগী দ্রামা হোলশিংদা উৎতুনা লাক্লগসু অহানবা ওইনা মণিপুরগী মপান্দা অমুক্তং উৎতুনা মপানগী মীওইশিংদসু দ্রামা অসিগী মতিক ময়াই খঙহল্লসি। লোয়ননা মহারাষ্ট্রগী পুনে য়াওনা ষ্টেট অদুদা তোঙান তোঙানবা শিনফমদা মণিপুরী মচা লিশীং ৩৪/৩৫ রোম লৈরিবনা অথৌবশিংগী নীংশিং নুমিৎ লাকপসিদা মরৈবাক নীংবা কোইরেংসনাবু নীংশিংবা অমসুং অথৌবশিংদা হৈকৎ-লৈকৎ তম্বগী থৌরম পাঙথোকপা খক্তা নত্তনা খোংজোম লানদগী হৌরগা মহাকপু ফাঁসি তৌদুনা হাৎখিবা ফাওবগী ৱারী মীপূম তিংনা খঙহনবদা মতেং পাংনবা দ্রামা অমা উৎলসি হায়রকপদগী থৌরাং তৌরকপনি। দ্রামা অসি মণিপুর শুমাং লীলা ত্রেডিশনগী স্কোলার অমা ওইবদা নত্তনা ষ্টেট একাদেমি এৱার্দি অমসু ওইরিবা ব্রহ্মপুর অরিবম লৈকায়দগী ফুরাইলাৎপম গুনচন্দ্রনা ইবনি হায়রি।

 

অইবা অসিনা খোংজোম লান মতুংদা মণিপুরগী মনীংতম্বা মাঙখিদুনা বৃটিশনা লৈঙাক পায়রকপগা মমা লৈবাক মণিপুরগী নীংতম্ববু কন্নবগীদমক অচৌবা থৌদাং লৌদুনা হোৎনখিবা মৈতৈ অথৌবশিংগী মনুংদা অমা ওইরিবা বির টিকেন্দ্রজিৎনা হোৎনজরম্বশিং ময়েক শেংনা উৎলি হায়রি। ইম্ফালদগী পুনে তম্না দ্রামা অসি মণিপুর থিয়েটার একাদেমিগী আর্টিষ্টশিংনা উৎলুবনা হোৎনরিবা অসিদা পূন্না আর্টিষ্ট ২৬না শরুক য়াগনি। অইবগী দ্রামা অসিদদি আর্টিষ্ট ৩৪ দগীনা ৩৫ রোমগী মথৌ তারি। অদুবু ইম্ফালদগী পুনে তম্না চৎপদা আর্টিষ্টশিং অসিগীদমক চঙগদবা শেলগী য়েংলুরবা শুপ্নতগী আর্টিষ্ট ২৬ না শরুক য়াদুনা উৎলুনবা হোৎনরি। আর্টিষ্টশিং অসি আগষ্ট ১১দা ইম্ফাল থাদোক্লগা আগস্ট ১৩দা দ্রামা অসি উৎলুগনি। অহানবদা ইম্ফালদগী কোলকাটা ফাওবা এরোপ্লেনদা চৎলগা মফমদুদগী পুনে তম্না ত্রেনদা চৎননবা থৌরাং তৌরম্মী। অদুবু হৌজিক কোভিদকী ফীভম ফৎচিল্লক্তবগা লোয়ননা কোলকাটাদগী ত্রেননা পুনে তম্না চৎপদা চঙগদবা নুমিৎশিংগী চাক-ঈশিংগী শেনফম হাপচিল্লগা ইখেন খেন্নদবদগী ইম্ফালদগী পুনে তম্না এরোপ্লেননা চৎননবা থৌরাং তৌরে। মসিগীদমক প্লেন টিকেটকী শেনফম লুপা লাখ ৩গা লিশীং ৮০ রোম চঙগনি পান্নরি। মসিসু চৎখিবা খক্তগীনি, হল্লকপগী য়াওদ্রি হায়রি।

 

মণিপুরগী পুৱারীগা শাগোন্নরক্লিবা অথৌবশিংগী নুমিৎতা উৎলুগদবা দ্রামা অসিগীদমক মণিপুর লৈঙাক্কী আর্ট এন্দ দ্রামা অসিগীদমক মণিপুর লৈঙাক্কী আর্ট এন্দ কালচার লোয়শঙদা শেলগী তেংবাঙ পীবিনবা মমাঙ থাগী ৭ তা এসোসিয়েসন ওব মণিপুরী দাইস্পোরা, পুনেগী মায়কৈদগী অইবা চে পীদুনা হায়জখিবা লৈখি। অদুবু অসিগুম্বা প্রোগ্রাম অসিদদি লোয়শঙ অসিগী মায়কৈদগী শেলগী মতেং পাংবগী প্রেভিজন লৈতে হায়দুনা খঙহনবীরকখি হায়রি। তঙাইফদবদগী অকক্নবা নুমিৎ অসিদা দ্রামা অসিমক পুনেগী মীয়ামদা উৎনীংবদগী মতেং নীজরুবদা মণিপুর লেজিসলেটিভ এসেমব্লিগী স্পিকার টিঐচ সৈত্যব্রতনা লুপা লিশীং ৩০গী মতেং পীবিরকখি অদুগা মাহুদ মিনিষ্টার ৱাই খেমচান্দনসু লুপা লিশীং ১০গী মতেং পীবিরকখি হায়রি।

 

অদুবু দ্রামা অসিদা মরু ওইবা শক্তম লাংলিবা মীওই ৫গী মনুংদা থাঙ্গাল জেনারেল, কোইরেংসনা, মিষ্টার গ্রিম উড অমসুং মহাক্কী লোয়নবী মিষ্ট্রেস গ্রিমউদনচিংবা য়াওনা কেরেক্টর পূম্নমক্না শেৎ চাগদবা ফি-রোলশিং তুবদা অচৌবা শেনফম অমা মথৌ তারে হায়রি। দ্রামা অসিদা য়াওদবা য়াদবদগী মতম অদুদা শীজিন্নখিবা পয়েন্ট ৩০৩ রাইফেলস ১০ উনা শাবদা ফাওবা শেল চঙই হায়রকখি। অদুগা দ্রামা অসি মায় পাকপা দ্রামা অমা ওইনবগীদমক চত্থরক্লিবা তম্বগী থবক অমসুং রিহার্সেলনচিংবদসু শেল অদুক্কী মতিক চঙলে হায়রকখি। মসিদগী পাম্বৈ থিরকপদা চীফ মিনিষ্টার এন বিরেনগা হকথেংননা উন্নদুনা শেলগী তেংবাঙ খজিক্তং পীবিয়ু হায়দুনা তক্নরি। চীফ মিনিষ্টারনা এদভাইস তৌরকপগী মতুংইন্না প্রোসেস তৌরকউ হায়বদগী হৌজিক ফাইল অদু সেক্রেটরিএটতা লৈরি হায়নসু ফোঙদোরকখি।

 

দিজাইনার অমসুং দিরেক্টর ওইরিবা মহাক মশামকসু দ্রামা অসিদা মীনাই/লেবারগী রোল লৌবগা লোয়ননা মেজর মেক্স্যুয়েলগী রোলসু লৌগনি অদুগা দ্রামা অসিগী সাউন্দ অমসুং লাইটকী থৌদাং পূম্নমক মহাক্কী দিজাইনিং অমসুং দিরেক্সনগী মথক্তা লৌগনি হায়রি। অথাপ্পা মফম ওইবনিনা মথৌ তাবা আর্টিষ্ট শুনা চৎপা ঙমদবদগী চৎলিবা আর্টিষ্টশিংনা দ্রামাগী সিক্কেন্স মতুংইন্না মখল কয়াগী রোলশিং লৌনগনি হায়রি।

 

কৈশামথোং লাইশোম লৈরক অমসুং ৱাঙ্গোই ৱাহেংবম লৈকায়দা য়ুম লৈরিবা দ্রামা অসিগী দিরেক্টর শরুংবম বীরেননা মখা তানা ফোঙদোরকপদা লীলা অসিদা শক্তম লাংগদবা আর্টিষ্টশিংগী মনুংদা এল সরত মৈতৈ (কোইরেংসনা), আর কে মনিসনা (জিলাঙম্বা), এস মাঙ্গোলজাও (থাঙ্গাল জেনারেল), এস সোভাসচন্দ্র (সুরচন্দ্র), টি ঐচ নবা (কুল্লচন্দ্র), এন জি খোম্বা (সুবেদার খেলেন্দ্র), ৱা পোলোই মৈতৈ (পকাসনা), এন জি খোম্বা (সাহেব), মিষ্টার গ্রিমউড (সী ঐচ প্রেমজিৎ) মিষ্ট্রেস গোর্দন (আর কে মনিসনা), মিষ্টার কোসসিন (এ অঙৌসনা), কর্নেল সিমসন (এন অজিৎ), কর্নেল স্কেন (ঈ শান্ত) নচিংবা য়াওরি। অদুগা দ্রামা অসিগী কোষ্ট্যুমনা চনম লিলাবতি অমসুং এল সুমিতা চনুনা থৌদাং লৌরগা কোরিওগ্রাফারনা এ সনধ্যারানি অমসুং ৱাই বিনারানিনা থৌদাং লৌগনি হায়রি।

 

নিংথৌগী মনাই অমদি সিফাইশিংদা খম্বা, টেন্দেন, প্রসুরাম, সঞ্জিৎ, শান্ত অমসুং অজিৎনি। মিউজিকতা এল সঞ্জিৎ অমসুং টি ঐচ টেন্দেন, মেক-অপতা এন জি পোইজন, এস জয়েন্ড অমসুং ঈ শান্তনচিংবনি হায়রি। লোয়ননা দিরেক্টর অসিনা মখা তানা ফোঙদোরকপদা দ্রামা অসি মণিপুরগী পুৱারী খক নত্তনা নীংতম্বা ঙাক্নবগী লানগা মরী লৈনবা অমা ওইবনা যারিবমখৈ অচুম্বা অশেংবা অইবগী স্ক্রিপ্টতা য়াওবশিং ময়েক শেংনা মীয়ামদা উৎননবা হোৎনগনি হায়রি। চৈরকসিদা দ্রামা অসি আগস্ট ১৩ দা পুনেদা উৎলবা মতুং মহারাষ্ট্রগী কেপিটেল সিটি মুম্বাইদসু মফমদুদা লৈবা মণিপুরীশিংনা উৎহন্নীংবগী অপাম্বসু ফোঙদোরক্লে হায়রি।

 

সোর্সঃ হুইয়েন লানপাউ।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: