আপডেট:
image

মণিপুরগী বম্বম্না ৱার্ল্ড চেম্পিয়ন তাইতল বেল্ট লৌবা ইন্দিয়াগী অহানবা প্রো এম এম এ ফাইতর ওইরে

ইম্ফাল, ফেব্রুয়ারি ১২ : মশাগী চহী ২১ খক্তা ঙাইরিবা মণিপুরগী বম্বম থৌনাওজম্না রাসিয়াদা পাঙথোকপা ১৫ শুবা ৱার্ল্ড কাপ এম এম এ চেম্পিয়নশিপ্তা ৱার্ল্ড চেম্পিয়ন তাইতল লৌদুনা ইন্দিয়াগী ওইনা ৱার্ল্ড চেম্পিয়ন তাইতল বেল্ট লৌবা অহানবা প্রো মিক্সদ মার্সিএল আর্তস ফাইতর ওইখ্রে। শীংথানিংঙাই ওইরবা এচিভমেন্ত অদু ফংনবগী মহাক্কী খোঙচৎ অদু মহাক্কী পূক্নিং চপ য়ূংনা ফীরেপ লৌদুনা হোৎনখিবগী মহৈনা ফংবা ঙমখিবনি।

ইমুং মনুংগী শেন-থুমগী খুদোংচাদবা ফিভম্না মরম ওইদুনা মহৈ-মশিং তম্বা তোক্তুনা মহাক্না উ শূদুনা মহাক মশা অমসুং মহাক্কী ইমুং মনুং পুরি। শেন-থুমগী খুদোংচাদবা ফিবম অদুনা মহাক্না ৱার্ল্ড কপ অদুদা শরুক য়াননবা হোৎনবদা অরুবা তাঞ্জা অমা মায়োক্নখি। মহাক্কী অপোকপী মমা থৌনাওজম ওংবী ইবেমচানা মহাক্কী মচানুপানা রাশিয়াদা চৎনবগীদমক য়ূমথোঙ-য়ূমথোঙ চঙদুনা শেন খাইখি।

নিউজ চেনেল নোর্থইস্ত লাইভকা অখন্ননা উনখিবা অমদা বম্বমগী অপোকপী মমানা মহাক্কী মচানুপানা শরুক য়ানবগী শেল খোম্বা হায়বসিনা মহাক্কী অহানবা পোৎলূম অমা ওইখি অমসুং রাসিয়াগী ৱার্ল্ড চেম্পিয়নশিপ অদুদা শরুক য়ানবগীদমক লুপা ৩০,০০ ফাওবা পীবা ঙমখিদে হায়না ফোঙদোকখি।

মহাক্কী মচানুপাদা শেনফম অদু পীনবগী উপায় লৈখিদবনা মহাক্না অদুক্কী মতীক থম্মোয় শোকখি অমসুং উপায় লৈতনা কপখি। মমৈথংদা মহাক্না মরী মতা অমদগী মথৌ তাবা শেনফম অদু পুরুখি। ত্রেনিংগীদমক মতীক চাবা ইক্কিপমেন্ত ৱাৎপা য়াওনা শীংনবা কয়া মায়োক্নখ্রবসু বম্বম্না মহাক্কী থবক্তা পূক্নিং চঙখি অমসুং নোংমদা পূং অহুমদগী তরুক ফাওবা ত্রেনিং লেপ্তনা তৌখি। মহাক্না ত্রেনিংগীদমক মথৌ তারকপা মতমদা উককশিং অমসুং স্পিয়ার তায়রশিংগুম্বা শীজিন্নদুনা অকনবা মওংদা পূক্নিং চঙনা হোৎনখি।

মহাক্কী ফাইতর অমা ওইবগী খোঙচৎ অদুগী মতাঙদা ৱারী শারদুনা বম্বম্না হায়, ইমুং মনুংগী মীওইশিংনা ফাওবা য়াওনা কনাগুম্বা অমত্তনা এম এম এদা ঙাক্লৌ পীবিদে। মীওই অয়াম্বনা গভর্নমেন্ত থবক অমা ফংনবগী খুদোংচাবা লৈরিবা নেসনেল স্পোর্তসতা অহেনাব পূক্নিং চঙনরি। শেন-থুমগী ওইবা খুদোং চাদবনা তিকেতশিং ককপা ঙমদবনা মহাক্না মমাঙদা অচৌবা তুর্নামেন্ত খরা শরুক য়াবা ঙমহৌখিদে। মহাক্না মশান্না অসিদা ঙাওজবনা মহাক্না লেপ্তনা ত্রেন তৌখি।

বম্বম্না এম এম এদা ঙাওজবদা নত্তনা মহাক্না মহাক্না মহাক্কী মরুপ মপাংশিংগা লোয়ননা ময়াই কাবা চিঞ্জাকশিংগী মায়োক্তা হকথেংননা থবক তৌরি অমসুং চিঞ্জাকশিং অসিদগী নাথৈনবা হোৎনদুনা রিহেবিলিতেসন চত্থরিবা মীওইশিংবুসু মতেঙ পাংলি।

মহাক্কী অপোকপা মপা য়ু কা হেন্না থকপদগী লৈখিদবনা ময়াই কাবা চিঞ্জাক্তা লাইচুম্বগী চৈথেং অসি মশামক হকথেংননা থেংনরকখিবনা মসিগী চৈনা অসি মহাক্কী লোয়ন-তিন্নরিবশিংদা ফংদনবা কত্থোক্না থবক তৌরি।

ফ্লাইওয়েট কাংলূপ্তা কম্পিত তৌদুনা বম্বম্না মহাক্কী রাসিয়ান লম্বা মরত গুসিনোভপু সেকেন্দ ২৭ খক্তা মায়োক্নরবা মতুং মায়থীবা পীদুনা মহাক্কী ৱার্ল্ড তাইতল বেল্ট অদু লৌবা ঙম্লকখিবনি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: