বিরেন্দ্রজিৎকী অনৌবা শৈরেং লাইরিক তুরেলদি খক মোৎতে -- কোরৌবী
তরু-তরুবা নোংলিকশিংনা অতিয়াদগী শিন্থরক্লগা তরু তরুবা চীংনুংগী লোক্তগী চেন্থরক্লি বা তুরেলনা মাগী হৌরকফমদগী তরু-তরুনা চেঞ্জরকই অদুবু তাইবং মীওইবনা মাগী ঈচেলসি মোৎহল্লকই। মতৌ অসুম্না মীওইবা কৌবা থৱায় পানবশিং অসি পোক্লকপদা মরাল লৈজদবা ওইনা পোক্লকই অদুবু চাউরক-শাংলক্লগা মরালতনা য়োম্লবা তাইবং মী হায়বদু ওইরকই। মসিবু কনানা ওইহল্লিবনো হায়বসি অশৈবা অসিগী ৱাহংনি। অশৈবা অসিগী পেন্দবা ৱাকৎ কয়া লাইরিক অসিদগী থোরকই ৱাহৈগী লৈরোং ফজ-ফজনা শেমদুনা পুথোকই, হাৎন-শুনবগী শৈরেং কয়া য়াওবা উই, লৈখিদ্রবা অমদি হিংলিবা মীওই খরগী মরমদা ইবা শৈরৈং খরসু য়াওবা থেংনৈ।
`তুরেলদি খক মোৎতে' হায়না মিংথোনবা শৈরেংগী লাইরিক অসিবু ইবা বিরেন্দ্রজিৎ নাওরেম শিংজমৈ মখা নাওরেম লৈকাইদা পোকই। মহাক মণিপুরী সাহিত্য পরিষদ ইম্ফাল, দি কালচারেল ফোরাম মণিপুর, নহারোল সাহিত্য প্রেমি সমিতি রাইটার্স ফোরাম, ইম্ফালগী লাইফ মেম্বারনি। মণিপুরী লিটরেরি সোসাইটি, ইম্ফাল অমসুং অসৈলুপ, মণিপুর অনীগী ফাউন্দর মেম্বারনি। রাইটার্স ফোরাম ইম্ফালগী সেক্রেটারি, দি কালচারেল ফোরাম মণিপুরগী চেফোঙ ঋতু-গী জোইন্ট এডিটর ওইরম্মী।
মণিপুরী লিটরেরি সোসাইটি, ইম্ফালগী টার্ম অনীরক প্রেসিদেন্ট অমসুং লূপ অসিগী চেফোঙ সাহিত্য লৈচলগী এডিটর ওইরম্মী। মশানা ইবা শৈরেংগী লাইরিক তরেৎ, ৱারীমচাগী লাইরিক অনী অদুগা এদিট তৌখিবা এন্থোলোজি (ৱারীমচাগী লাইরিক অমা, শৈরেংগী অনী) গী লাইরিক অহুম য়াওনা পুন্না লাইরিক ১২ ফোঙখ্রে। সাহিত্য একাদেমি অমসুং মণিপুর ষ্টেট এৱার্দ ফোর লিটরেচর য়াওনা পূন্না এৱার্দ মাপলসু ফংখ্রে।
লাইরিক অসি পিএস পাব্লিকেসন শগোলবন্দ মোইরাং লৈরক, ইম্ফালনা ইং ২০২৩ দা ফোঙবনি। লামায় ১০০ পাল্লি, মমল লুপা ৩০০গী। লাইরিক্কী মখুম অসি শামিম আরেফিন, বাংলাদেশনা য়েকপনি।
তরু-তরুবা নোংলিকশিংনা অতিয়াদগী শিন্থরক্লগা তরু তরুবা চীংনুংগী লোক্তগী চেন্থরক্লিবা তুরেলনা মাগী হৌরকফমদগী তরু-তরুনা চেঞ্জরকই অদুবু তাইবং মীওইবনা মাগী ঈচেলসি মোৎহল্লকই। মতৌ অসুম্না মীওইবা কৌবা থৱায় পানবশিং অসি পোক্লকপদা মরাল লৈজদবা ওইনা পোক্লকই অদুবু চাউরক-শাংলক্লগা মরালতনা য়োম্লবা তাইবং মী হায়বদু ওইরকই। মসিবু কনানা ওইহল্লিবনো হায়বসি অশৈবা অসিগী ৱাহংনি। অশৈবা অসিগী পেন্দবা ৱাকৎ কয়া লাইরিক অসিদগী থোরকই ৱাহৈগী লৈরোং ফজ-ফজনা শেমদুনা পুথোকই, হাৎন-শুনবগী শৈরেং কয়া য়াওবা উই, লৈখিদ্রবা অমদি হিংলিবা মীওই খরগী মরমদা ইবা শৈরৈং খরসু য়াওবা থেংনৈ।
লানগী শৈরেং:
হৌজিক ঐখোয়গী লৈবাক মণিপুর অসিদা থোক্লিবা কম্ম্যুনেল ভাইওলেন্স অসিনা মীপূম খূদিংমক্কী থম্মোয় লৈতাহন্দ্রি, ইং তপ্পগী ফীভম অমত্তা উদ্রি। খোইরাং খোইশওনবতনা থল্লবা অশৈবশিংগী থম্মোয়দগী থোক্লকপা লানগী শৈরেং কয়া মশীং খঙদনা থোরক্লি। হৌজিক থোক্লিবা ইরাং অসি মে ২০২৩ দগী থোক্লকপনি, ইরাং অসি থোক্ত্রিঙৈ মার্চ ২০২৩ দা লাইরিক অসি ফোঙবনি। অদুম ওইনমক ইরাং অসিগা চাশিন চুশিন্নবা য়ারবা শৈরেং কয়া য়াওবা থেংনরি।
‘অসুম্না নোংমা’ কৌবা শৈরেংদা অশৈবনা ইরি,
অমম্বা;
অমম্বসিদা করিনো উরিবসে,
লান্নি লান,
লান চংলি, লান্দারি
লান করিনো খঙদবশিংগী মথক্তা,
হাৎলি খূৎলায় পায়জদবশিং।
‘অতোপ্পা হি অমা’ কৌবা শৈরেংদসু ইরি,
লাইনিংগী, লমগী, শক্তিগী লন-থুমগী
ঈ-নাই তানবগী লোইনাইদ্রবা লীচৎ
করি মরালনো নৌজরিবী মাগীনা
মরাল লৈজদবা পুন্সি কয়ানো
অসুম্না চৈনা পীদুনা লাক্লিবা
ময়ূম লৈনা লৈনা মূয় লৈহন্দ্রবা
লাইনিং লৈন লৈনা লাইনিং লৈহন্দ্রবা
পোক্নফমদা লৈন লৈনা মরৈবাক লৈহন্দ্রবা
পুন্সিগী নুংঙাইবা হায়দুবু লানখক্তনা পীবরা।
ময়ূম-মকৈ মৈনা তুম্না চাকহৌরবা মীওই অমনা নীংশিংলকপগী মতাং অমা শৈরেং অসিদা ইরি,
তাঙ্গোই তাহৌরবা য়ূম
মশক লাকশিনবা ৱারবা
মৈনা চাকথেক্নবা মমাগী হকচাং
নুমীৎ কয়া য়ূমদা হল্লকখিদ্রবা মবুং
লম্বীদা তাহৌরবা হকচাং মচেৎ-মচেৎ
নোংমৈগী, বোমগী অকিবা ফংলবা মখোল
খুৎলাই পায়বশিংগী মিনুংশি য়াওদ্রবা শাজৎ।
‘লেঙদবদি মহাক্তনি’, ‘য়েলহৌমীনি ঐ’ অমদি অতৈ শৈরেং কয়াদসু হৌজিক মতমগী কম্ম্যুনেল ভাইওলেন্স অসিগা চাশিন চুশিন্নবা শৈরেং কয়া য়াওরি।
পেন্দবা:
পেনদবগী ৱাকৎ পুবা শৈরৈং কয়া লাইরিক অসিদা য়াওরিবা শৈরেং কয়াদা উবা ফংই। মরা তাখ্রবা শেঞ্জা থুমজাগী চৎনবিনা অশৈবগী থম্মোয়বু পেলহন্দে। পেন্দবদু ফোঙদোক্নবা হোৎনবদা করিগুম্বা মতমদা মকা ফোঙনা, করিগুম্বা মতমদনা ইঙ্গিৎনা উৎলি। মকা ফোঙনা লাউরুরবদি অপাবশিংনা শৈরেং মান্দ্রে, প্রোপেগন্দানি হায়নরক্কনি। অদুনা অশৈবা অমনা মাগী শৈরেংগী মতীক ময়াই লৈহনগে হায়রবদি মকা ফোঙদনা তুমিন্না লাউবা তাই, ৱাহৈগী ইঙ্গিৎনা ফোঙদোকপা তাই। লোননবু ফোঙদোকপা ওইগেরা, অফোঙবনিবু হায়সিরা পেন্দবা খরদি হায়রে‘ফোংনা হংসিরা’ কৌবা শৈরেংদা। শৈরেংগী অহৌবা পরেংশিং য়েংশি,
ইঞ্জিন অনীগী গাড়ি
ঐবু চিংলিবরা, ইল্লিবরা
নৎত্রগা মথক্তা তোংহল্লিবরা?
অরোইবা ষ্টেঞ্জাদা অমুক ইরি,
ইঞ্জিন অনীগী গাড়িসিবু
থৌরিবরা থাউ হাপ্তনা
পাইরিবরা মশা পান্দনা
তাউরিবরা হিনি খঞ্জদুনা।
হৌজিক পাল্লিবা লৈঙাক অসি দববল ইঞ্জিনগী লৈঙাক্নি হায়বসি অঙাংসু অহলসু খঙনদবা অমত্তা য়াওদ্রবনি। অদুননি অশৈবনা ইঞ্জিন অনীগী গাড়ি হায়বা ৱাহৈশিং অসি শীজিন্নরক্নিবা।
মচুনা সিম্বল ওইনা শীজিন্নদুনা ইবা শৈরেংনি ‘হংসিগে কনাদা’। মতাংসিদদি মকা ফোঙদ্রে, শৈরেংগী মতীক ময়াই লৈরে হায়বা য়ারে,
লৈকোলসিদা কুইরে শাৎখিদবা
অঙৌবা লৈ
পোমলক্তবদি নত্তে
লৈখোক অমা নৎত্রগা অমদা
থাদৎপিরি অতম্ননা পোম্লকপগা।
---- --- ---
শাৎহল্লি অমুবা লৈশিংবুদি মনীং তম্না
অমুবা লৈ
অমুবা লৈগী লৈকোল
অকিবা নত্তনা করিবু পীরিবগে পুক্নীংদা।
‘সনা লৈবাকসিদা’ কৌবা শৈরৈং অসিমদি ফোঙনা লাউবা খোল্লাওনি। পোক্নফমগী ‘কনানা হায়জিল্লিবনো’ নৎত্রগা সঙাই এক্সপ্রেসকী ‘শুক্তানি’ গুম্বদা লাউবগুম্বনি। অতৈ মকা ফোঙদনা লাউবা কয়াসু মরাং কায়না থেঙনরি।
ৱাহৈগী লৈরোং:
লৈকোলদগী লৈ কয়া হেল্লক্লগা পঙথমদা থমজিল্লবদি ফজদে। মতাং চানা চানা লৈরোং শেমদুনা লাইদা কৎলম্লবদি মদুবু উরুবা মীওইশিংগী পূক্নিং শুহ্মৎতবা ঙম্লোই। বিরেন্দ্রজিৎনা ৱাহৈগী লৈরোং কয়া ফজ-ফজনা শেমদুনা থম্লম্বা থেঙনৈ। লৈচন ফজবা ৱাহৈগী লৈরোং শেমগে হায়রবদি সিম্বল, মেতাফর, সিমিলি অমদি ইমেজরিশিং শীজিন্নদবা য়ারক্তে। বিরেন্দ্রজিৎনা শীজিন্নরক্লিবা ইমেজরি অমদি সিম্বল অসি য়েংসি,
লুপাগী চরৈ থোল্লবা অহিংদা
মোমোন নোক্লদুনা অঙৌবা লৈনা
শিন্নরকই ঐঙোন্দা ইংনা নুংশিরবা লৈনম
তিনশিঞ্জৈ লৈনমদু ঐগী খোর্জৈগী মুক্তা
লৈনম চেল্লবা মুকখক্তনা ইজনিংই ঐগী শৈরেং।
(অঙৌবা লৈ, লাঃ ১১)
ফজরবা ইমেজরি অমসু য়েংবিয়ু,
খোঞ্জেল অমা তারকই লুম্লবা
য়েংজহৌরো, য়েংজহৌরো ঙসিদি কোয়না য়েংলুই কনাগী খোঞ্জেলনো
নাবিমনা চৎলম্মি কেল্লবা উনাশিং পুরদুনা
নুমিৎনা কুমথখ্রি চীংদোন্দগী তপ্না তপ্না
লৈপলদগী অমুক পাইখৎ অমুক পাইথ
ইপোম নাইনা শান্নরম্বা উরিৎশিং
হন্নখ্রি মায়কৈ ফাংনা লৈ চাইর-চাইরদুনা
(হংলম্লবদি, লা: ৯৬)
‘অতোপ্পা হি অমা’ কৌবা শৈরৈংদা সমুদ্র মপানগী শক্তম অমা শাগৎতুনা ইরি,
সমুদ্র মপান্দগী রিফ্যুজি কেম্প,
রিফ্যুজি কেম্পতগী সমুদ্র মপান
মথৌ চিল্লম্বা একশিং ঙম্না পোত্থানখ্রে
অহিংগী নুংশিৎনা অৱাবা ঈশৈ লেপ্তনা শক্নি
থৱান্মিচাকশিংনা মপি তপ-তপ তারি
ঈথক্না লাউরি শক্লগনি ঈশৈ শক্লগনু
অমম্বনা কুপখ্রে সমুদ্র ঈমায় শীন্না
ঙাইরি মহাক্তি হৌজিকসু।
(লা: ৮৪-৮৫)
ৱাহৈ খরগী মরুমদা ৱাহন্থোক অমা ফুম্লদুনা থম্বগী ফজবদুনি শৈরেংগী ফজবা ওইরিবসি।
‘পাউখুম পীখিদ্রবসু নঙনা’ কৌবা শৈরেংগী অহৌবা পরেংশিংনা ফোঙদোক্লিবসি য়েংসি,
কোরৌগী মঙালদা
চৎমিন্নরি খঙলবসু নঙ ঐ
উরমদে ঐনা নঙগী শক্তমবুদি
অদুবু থামম্বা অহিংদা
অচীকপগা ফম্মিন্নরগা মতম
উরকই নঙগী তশেং তশেংবা শক্তম
লৈতেম মান্নরবা তনান তনানবা লম্বীদা
নঙগা লোয়ননা চৎলি খঙলবসু
খঙলমদে নুংঙাইবা হায়বদুদি
অদুবু চৎলুরবদা শুক্নবা উমং-ৱামং ফাওদুনা
তিংখং-তুম্বৌ, নুঙ্গায় চেগায় মরক্তা
খঙলকই নঙগা চৎমিন্নবগী নুংঙাইবা।
কোর্টেসি - সঙাই এক্সপ্রেস
0 কমেন্ট:
কমেন্ট তৌবিয়ু