ফেমিনা মিস ইন্দিয়া ২০২৩ গী কন্টেষ্টেন্টশিং থুংলরে
ইম্ফাল, এপ্রিল ০৭ : লৈবাক অসিগী অৱাং নোংপোক ষ্টেটশিংগী মনুংদগী মণিপুরনা ইহান হান্না য়ূম্বু ওইমিন্নদুনা থা অসিগী ১৫দা খুমন লম্পাক্কী ইন্দোর ষ্টেদিয়ামদা পাঙথোক্কদৌরিবা ৫৯ শুবা ফেমিনা মিস ইন্দিয়া ২০২৩ গী গ্রান্দ ফিনালিদা শরুক য়াগদবা মণিপুরদগী থৌনাওজম ষ্ট্রেলা লুৱাং য়াওনা কন্টেষ্টেন্ট ৩০ মক ঙসি ইম্ফাল এয়ারপোর্টতা থুংলখিবদা মীতৈগী নাৎকী ওইবা চৎনবীদা তরাম্না ওকখিবদা কন্টেষ্টেন্ট পুম্নমক্না খম থেংনা হরাওবা ফোঙদোকখ্রে।
কন্টেষ্টেন্টশিংনা অয়ুক পুং ১১.৩০ তারকপদা এয়ারপোর্টতা থুংলখিবদা মখোয়বু থৌরম অসিগী ওয়েলউইশারশিংনা ধোন থিন্দুনা মোইবুং খোংলগা তরাম্না ওকখি। লোয়ননা মীতৈগী লেংয়ান ফি য়ানবীবগা লোয়ননা কজেংলৈ অমমমসু উপ্পীখি। মফম অদুদা মখোয়বু ঙাইরম্বা পাউমীশিংগা মখোয়না লাকখিবা খোঙচৎ অমসুং পাঙথোক্কদৌরিবা গ্রান্দ ফিনালিগী মতাংদা তেন্তক্না ৱারী-ৱাতাই শানরবা মতুঙদা মখোয়বু সিক্যুরিটিনা চেকশিন্না ঙাক শেল্লগা হোটেল ক্লাসিক গ্রান্দে তম্না অখন্ননা থৌরাং তৌরবা বাস অমদা তোংহন্দুনা পুখি।
গ্রান্দ ফিনালি অসিদা মণিপুরগী মহুৎ শিন্দুনা শরুক য়াগদৌরিবা থৌনাওজম ষ্ট্রেলা লুৱাংনা ফোঙদোকখিবদা পাঙথোক্কদৌরিবা গ্রান্দ ফিনালি অসি মতৌ করম্না তোপ মোদেলশিং ওইগদগে খঞ্জবা অমসুং মসিবু পামজবা মণিপুরগী নুপীমচাশিংদা মখোয়না খঙনীংবশিং খঙহন্নবগী অচৌবা খুদোংচাবা অমনি অমুসং তোপ মোদেলশিং ওইহন্নবগী ইথিলসু পীরগনি হায়খি।
পাঙথোক্কদৌরিবা ফেমিনা মিস ইন্দিয়া ২০২৩ দগী খনগৎলবা উইনার অদুনা লৈবাক অসিগী মহুৎ শিন্দুনা মিস ৱার্ল্ড পিজেন্টদা শরুক য়ারুগদৌরিবনি। থৌরম অসিগী মরু ওইবশিং য়েংলদুনা মসিবু শিল্লিবা টাইমস ওফ ইন্দিয়াগী মেনেজিং দিরেক্টর বিনিত জ্যেনগা টুরিজম মিনিষ্ট্রিদগী মহুৎ শিনবা ওফিসেলশিংগনা চীফ মিনিষ্টার এন বিরেনগী মমাঙদা ব্যুটি পেজেন্ট অসি ইম্ফালদা পাঙথোকপদা শরুক য়ামিন্ননবগী য়ান-চে খূৎয়েক পীনখিবনি।
থৌরম অসি ইম্ফালদা পাঙথোকপনা মণিপুরগী পূক্নিং হুনা ফজরবা মফমশিংবু শরুক য়াবা লাক্লিবী কন্টেষ্টেন্টশিংদা নত্তনা ওর্গানাইজরশিংদসু য়েংহনবগী খুদোংচাবা ফংগদৌরিবনি। মসিগী মথক্তা মণিপুরগী ফজবা মীওক মীচানগী চৎনবীশিংসু উৎথোকপগী খুদোংচাবা লৌহৌগদৌরিবনি। গ্রান্দ ফিনালি অসিগী মনুং চন্না লৈবাক অসিগী এন্টারটেনমেন্ট ইন্দাষ্ট্রিগী খ্বাইদগী চাউনা মমিং পন্নরিবা অনানিয়া পান্দে অমসুং কার্তিক আর্য়ানগী পার্ফোর্মেন্সসু উৎপগা লোয়ননা মনিষপাল অমসুং ভুমি পেরনেকারনা এনকরশিং ওইগনি হায়রি।
কন্টেষ্টেন্টশিংনা শক্নাইরবা দিজাইনার রোকি এস, নমরতা জোসিপুরানা দিজাইনা তৌবা ফিজোলশিং শীজিন্নবগা লোয়ননা মণিপুরগী নাৎকী ওইবা চৎনবীশিংগী মতাংদা রোবার্ট নাওরেমগী অখন্নবা শোকেজ অমসুং য়াওগনি হায়রি। থৌরম অসিগী পান্দমশিংগী মনুঙদা মণিপুরগী টেক্সটাইল, আর্ট এন্দ কালচারবু শকখঙহনবা য়াওরি। অদুগা পেনেল ওফ জজশিংদা ফেমিনা মিসা ইন্দিয়া য়ুনিভার্স ২০০২ ফংখ্রবী নেহা ধুপিয়া, মণিপুরগী শক্নাইরবা বোক্সিং শান্নরোয় লাইশ্রম সরিতা অমসুং দিজাইনারশিংদা রোকি এস অমদি নমরতা জোসিপুরাসু শরুক য়াগনি হায়রি।
পুম্নমকসিগী মথক্তা হান্না মিস ইন্দিয়াগী লুহুপ উপখ্রবী অমসুং হৌজিক্কী মিস ইন্দিয়া ওইরিবীনা ফেসন সেগমেন্টশিংসু পাঙথোক্কনি হায়রি। লোয়ননা থৌরম অসি চীফ মিনিষ্টার এন বিরেননা অথোইবা মীথুংলেন ওইদুনা পাঙথোক্কনি হায়রি। পনবা য়াবদি, কন্টেষ্টেন্টশিংবু ঙসি মীতৈগী নাৎকী চৎনবীদা তরাম্না ওকখিবদা কন্টেষ্টেন্ট পূম্নমক্না খম থেংনা হরাওখিবগা লোয়ননা মখোয়গী মরক্তগী খরনা ‘খুরুমজরি মণিপুর’ হায়না ফাওবা ফোঙদোকপা য়াওখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু