• 551
• ১১ই মার্চ ২০২৪ ইং
• Share on:

ফেব্রুৱারি ২১, ইন্টরনেস্নেল মাদর লেঙ্গ্যুএজ দে

থিম- "Multilingual education is a pillar of learning and intergenerational learning"

ইং ১৯৫২গী ফেব্রুৱারি ২১দা ধাকাদা লোলগী মতাংসিদা চাওরবা ইহৌ লাকখি।  ইরাং অসিদা সিফাইশিংনা নোংমৈ কাপ্পদা মমালোলগীদমক শিবা কিদনা থোক্লকখিবা অদুগুম্বা  ঢাকা য়ুনিভর্সিতিগী মহৈরোইশিং অমসুং নহারোলশিংনা থৱায়না পোন্থা পীখি। নুমিৎ অসি মালেমগী পুৱারীদা সনাগী ময়েকণা ইদুনা লৈহৌরি ঙসিসু। বঙ্গলা লোলদা য়ুম্ফম ওইদুনা  ইস্ট পাকিস্তান হায়না খঙনরম্বদগী বঙ্গলাদেশসু পোকখি মনিং তম্বা লৈবাক অমা ওইনা। কুমওন খুদিং বঙ্গলাদেশকি য়াম্লবা মীয়াম্না মখোয়গী লোলগীদমক থৱায় কত্থোকখ্রবা অথৌবশিংদা ইকায়খুম্নবা উৎলি মখোয়গী সাহিদ মিনারদা। নুমিৎ অসি নেস্নেল হোলিদে ওইরি বঙ্গলাদেশতা।

মশাগী মমালোলদা লাইরিক লাইশু তম্বা ফংদবা, মমালোলদা ইবা ফাওবা ফংদবা মীওই ফুরুপ কাংলুপ কয়া মালেমদা লৈরি। ঙসি মালেমদা ঙাংনরিবা লোল কয়াগী মরক্তা অপীকপা ফুরুপ কাংলুপ কয়ানা ঙাংনবা লোল কয়াদি মতমগী অহোংবা অওনবা কয়াদা তপ্না তপ্না মমি শামজিল্লক্তুনা মাংখিবা লোল কয়া য়াওরক্লি। হৌজীক ফাওবদা মালেমদা ঙাংনরম্বা লোল ৫৭৩ রোমদি মাংখ্রে অমসুং মসিবু ঙাংবীনবা তম্বীনবা লৈত্রে হায়না লৌনরি। মাংখ্রিবা লোল অয়াম্বা ইরগা লৈবা নত্তবা অদুগা মশাগী ময়েক লৈতবা অদুগুম্বা লোলনা অয়াম্বা ওইরি। ইন্দিয়াদসু হিমালায়ান বেল্টতা লোল খরদি শিখ্রে হায়না পানরি। অদুবু ইন্দিয়াগী ইনাকখুল্লবা লিঙ্গ্যুস্তিক হেরিতেজ অসিদা হৌজীক ফাওবা লোল ৪৫০ দি মতিং লৈনা হিংলি অদুগা পাক শণ্ণা ঙাংনরি। ইকোনোমীক তাইমস্তা ফোংবা রিপোর্ট অমদা পল্লিবা ৱাফমসিদি অমুক মীপায়নিংঙাই ওইরিবনি। ইন্দিয়াদা ঙাংনরিবা লোল ১০ দি মসিবু ঙাংবীনবা মীওই ১০০ ফাওবা শুদবা য়াওশিল্লকলি হায়রি। ভলনরেবম কেটেগোরিদা য়াওরিবা লোল ৮১দি মণিপুরী, বোডো, গর্হৱালি, লাদাক্কি, মিজো, সেরপা, অমসুং স্পিতিনি হায়না রিপোর্ট তৌরি। মালেমগী ওইনা হৌজীক ফাওবদা ঙাংনরিবা তোঙান তোঙাণবা লোল অসি পুন্না ৭০০০নি। মালেমসিদা খুন্দা লৈতাদুনা লৈরিবা তোঙান তোঙানবা মীওই ফুরুপ কাংলূপশিংনা মশা মশাগী মমালোলবু ইকায়খুম্নবগা লোয়ননা মপুং ফানা শিজিন্নবসু তঙাইফদে। শিজিন্নবা অমসুং ইবা হেক লেপ্পদা মশানা অদুম মাংখিগনি এক্সতিং ওইগনি। মালেমগী লৈবাক কয়াদা থায়না য়াম্না মতিক মঙাল লৈনা শিজীন্নরম্বা লোল ওইরিবা লেটিন, এন্সিয়ান গ্রিক, সুমেরিয়ান, এন্সিয়ান ইজিপ্সিয়ান অমসুং ফোইনিসিয়ান ঙসিদি অশিবা লোল কনানসু ঙাংনদ্রবা লোল হায়বদু ওইরি। অদুবু হায়রিবা লোলশিং অসিদা ইদুনা থম্লম্বা মীওইবা খুনাইগী হৌরকঙৈগী পুৱারীদি ঙসিসু মপাল নাইদ্রবা লৌশিংগী পূক্কৈ হায়বদু ওইদুনা লৈরি। মীওইবা অমনা  লোল অসি য়াম্না খঙবা ঙম্লিবমখৈ হেণ্ণা পুকনিং লৌশিং লৈবা হেল্লি। ঙসিদি লাইরিক লাইশু তম্বদা মমালোলদা য়ারিবমখৈ তাকপী তম্বীনবা ফাওবা হোৎনরক্লি। নেস্নেল ইদুকেসন পোলিসিদা ফাওবা মেন্দটরি ওইনা মমালোলদা অঙাংশিংবু মহৈ তম্বা ফংহন্নবা সিলেবস শেমলক্লি। অদুনা কুমসি ২০২৪গী ওইনসু য়ুনেস্কোনা লাওথোকলকপগী মতুং ইন্না মালেমগী ইমালোলগী নুমিৎ পাঙথোকনবগী থিম অসি “Multilingual education is a pillar of intergenerational learning” হায়বসিদা পাংথোকনগদৌরি।

ঙসি মালেমসে য়াম্না চাওখৎলে হায়রগসু লৈবাক কয়াদা অমসুং মফম কয়াদা লায়রবগী পনখৈ মখাদা লৈবা মীওই কয়া লৈরি। অঙাং মিলিয়ন ২৫০ অমসুং নহা কয়া স্কুলদা লাইরিক লাইশু তম্বা ফংদনা লৈরি অদুগা অহল মিলিয়ন ৭৬৩ রোম্না বেসিক ওইবা লিটরেসি স্কিল ফাওবা তম্বা ফংদনা লৈরি ঙসি। মসিসু তাবদা নুংঙাইবা পাউদি নত্তে। তৌইগুম্বসু মালেমগী ওইনা লৈরিবা UNESCOগুম্বা লূপনদি য়াম্না কন্না হোৎনদুনা ইমালোলদা লাইরিক লাইশু তমহন্নবা থৌরাংশিং লৌখৎলি।

ইন্টরনেস্নেল মাডর লেঙ্গ্যুএজ ডে অসিমক ফেব্রুৱারি তাং ২১দা মালেম শিনবা থুংনা পাঙথোকনবা হায়দুনা য়ুনেস্কোনা নভেম্বর ১৭, ১৯৯৯দা লাওথোকখি। নুমিৎ অসি পাঙথোক্লিবগী মরু ওইবা পান্দমদি মালেমদা খুন্দা লৈতাদুনা লৈরিবা তোঙাণ তোঙানবা লোল ঙাংবা মীওই ফূরুপ কাংলূপ কয়াগী মরক্তা লিঙ্গ্যুইস্তিক অমসুং কলচরেল দাইভর্সিতিগী নিংথিজবা মশক অমসুং মরু ওইবদুগী এৱরনেস অমা পুরকনবনি। মসিগা লোয়ননা মলতিলিঙ্গ্যুএল্লিজমগী ফজবা অদুসু হেন্না পুকনিং থৌগৎনবনি।

মালেমদা ইন্টরনেস্নেল মাদর লেঙ্গ্যুএজ ডেগী ৱাখল্লোন অমা তশেংনা পোকহল্লক্লিবসিদি বঙ্গলাদেশননি হায়বদা হায়মনবা থোক্লোই। মরমদি বঙ্গলাদেশ হায়রিবা লৈবাক অসিমক মমালোল বঙ্গলাদা য়ুম্ফম ওইদুনা শেমলকখিবনি। ১৯৪৭তা ইন্দিয়া পাকিস্তান হায়না খায়দোক্লকপদা পাকিস্তান অনী থোকনা লৈরম্মি, ইস্ট অমসুং ৱেস্ট পাকিস্তান হায়না। জিওগ্রাফিকেল মীয়েংদসু ইন্দিয়া লৈবাকনা মরক্তা লৈবা অমসুং কলচর অমসুং লোলসু নোংপোক অমসুং নোংচুপ পাকিস্তান অসিমক য়াম্না খেন্নরমমি। অদুনা মতম অমগী ইস্ট পাকিস্তান অমসুং ৱেস্ট অণিমক্তা উর্দুনা লৈবাক অসিগী নেস্নেল লেঙ্গ্যুএজ ওইগদবনি হায়রকপদা বঙ্গলাদেশ লৈবাকতা লৈরিবা বেঙ্গলালিশিং তুমিন্না লৈবা ঙমখিদে। মীয়ামগী ওইবা খোঙজং কয়া চংশিনখি উর্দুনা নেস্নেল লেঙ্গ্যেজ ওইবা য়ারোই হায়দুনা। ইহৌ অমসুং অন্দোলন কয়া হৌখি। ইং ১৯৫২গী ফেব্রুৱারি ২১দা ধাকাদা লোলগী মতাংসিদা চাওরবা ইহৌ লাকখি।  ইরাং অসিদা সিফাইশিংনা নোংমৈ কাপ্পদা মমালোলগীদমক শিবা কিদনা থোক্লকখিবা অদুগুম্বা  ঢাকা য়ুনিভর্সিতিগী মহৈরোইশিং অমসুং নহারোলশিংনা থৱায়না পোন্থা পীখি। নুমিৎ অসি মালেমগী পুৱারীদা সনাগী ময়েকণা ইদুনা লৈহৌরি ঙসিসু। বঙ্গলা লোলদা য়ুম্ফম ওইদুনা  ইস্ট পাকিস্তান হায়না খঙনরম্বদগী বঙ্গলাদেশসু পোকখি মনিং তম্বা লৈবাক অমা ওইনা। কুমওন খুদিং বঙ্গলাদেশকি য়াম্লবা মীয়াম্না মখোয়গী লোলগীদমক থৱায় কত্থোকখ্রবা অথৌবশিংদা ইকায়খুম্নবা উৎলি মখোয়গী সাহিদ মিনারদা। নুমিৎ অসি নেস্নেল হোলিদে ওইরি বঙ্গলাদেশতা।   

মালেমসিদা ঙাংনরিবা লোল খুদিংমক মীওইবা খুনাইগী চৎনবী নাৎ, লাইনিংলোল, পুন্সি মহিং, থাজনবী অসিনচিংবা পুম্নমকপু মাংদনবা অমসুং হেন্ন চাওখৎনবা লাচল্লিবনি। তাঞ্জিবল অমসুং ইন্তাঞ্জিবল হেরিতেজ পুম্নমক মাংদ-তাদনবা য়োকখৎপদা লোল অমসুং ময়েকনা চাওরবা থৌদাং লৌরিবনি।   

মনিপুরদসু সাহিত্য থৌপাং লূপনা শিন্দুনা ইন্টরনেস্নেল মাদর লেঙ্গ্যুএজ ডেগী থৌরমগা মরি লৈননা ২০১৩দগী হৌদুনা শুই জেনরিস মাদর লেঙ্গ্যুএজ এৱার্দ পিদুনা লাকখি। হায়রিবা এৱার্দ অসিমক লেঙ্গ্যুএজ এক্তিভিস লৈবাকনা শকখঙনরবা লৈহাওথাবম সরতচন্দ্রদা অমসুং এমসুদা মখোয়না মনিপুরী লোলগী ইহৌদা মাংজিল থানা থৌদাং লৌখিবা ইমালোল মনিপুরীবু নীপালশুবা সেদ্যুলদা চনবদা লৌখিবা মপাল নাইদ্রবা থৌদাং অদুবু শকখঙবা ওইনা পীখিবনি। মসিগী মতুংদসু কাছরগী ওক্রম চুরামনিসু হায়রিবা সুই জেনরিস মাদর লেঙ্গ্যেজ এৱার্দ অসি পীদুনা ইকায়খুম্নখি। তুংদা হায়রিবা এৱার্দ অসি খুম্বোংময়ূম গৌরহরি মধুমাতি মাদর লেঙ্গ্যুএজ এৱার্দ হায়দুনা অমুক লেপ্তনা পীদুনা লাক্লি সাথৌলূপনা চহী খুদিংগী। মসিদা য়াম্না নুংঙাইবা অমসুং পুকনিং থৌগৎনীংঙাই ওইরিবদি মণিপুরদা খুন্দারিবা অপিকপা ফুরুপশিং হায়বদি কোম, কাবুই, রোংমৈ, তাংখুল, অনাল অসিনচিংবা মশাগী লোল লৈজবা য়েলহৌ ফুরুপশিংগী লোল, কলচর পূৱারী লোয়ননা ত্রেদিসনবু ঙাকনা হিংলিবা মখোয়গীদমকসু পুকনিং থৌগৎতুনা খুম্বোংময়ুম গৌরহারি মাধুমতি মাদর লেঙ্গ্যুএজ এৱার্দ পীরকপসিনি। কবুই ফুরুপকীদমক মসিগী খোরিলোল অমসুং লোলবু হিংনবা হোৎনরিবা দি এল কবুইসু মনা অসি পিদুনা ইকায়খুম্নখি। অদুগা কোম ফুরুপকিসু মাংপু কোমদা মনা পীখি। কুমসি ২০২৪গী ইন্টরনেস্নেল মাদর লেঙ্গ্যুএজ দেগা মরি লৈননা রোবিন্সন মোয়োনদা ইকায়খুম্নবা উৎতুনা খুম্বোংময়ুম গৌরহরি মাধুমতি মাদর লেঙ্গ্যুএজ এৱার্দ পিগদৌরি।  

ঙসিদি ইমালোলদা লাইরিক লাইশু তম্বদা মহৈরোইশিংনা হেন্না পুকনিং চংশিন্নরক্লি। ইমালোল ঙাংবদা ইকায়নবা মানবা মওং অমা মতম অমদা লৈরম্বদু ঙসিদি ফনা য়াম্না অহোংবা লাক্লে হায়বা য়ারে মনিপুরদসু। ইমালোল মনিপুরীনা স্তেট অসিগী ওফিয়েল লেঙ্গ্যুএজনি হায়বসি হেক হেক কাওথোকনবা মানবা অমসু তৌরি মনিপুরদা। অদুগা কাংলুপ ফুরুপ কয়ানা ফাওন-লোল ওইদুনা শিজিন্নরিবা লোলনি মনিপুরী হায়বসি। মালেমগী লৈবাক কয়াদসু খুন্দা লৈতাদুনা লৈরিবা মণিপুরীশিংনা শিজিন্নরিবা ইন্টরনেস্নেল লেঙ্গ্যুএজ অমসুনি মনিপুরি লোল। ইমালোলগী খোরিলোল তম্বদা কনাগুম্বশিংনা মসিবু কয়া ভেল্যু লৈতনা খল্লম্বা অদুসু ঙসি তপ্না তপ্না মাংখ্রে হায়বা য়াই। মরমদি মনিপুরী লোল অসিমক মাইক্রোসোপ্ট গুগল ত্রান্সলেসনদা হাপ্লবা লোল অমসু ওইরক্লবনি। সাহিত্য একাদেমিনা শকখঙবা ইন্দিয়াগী লোল ২৪গী মনুংদা মণিপুরীসু অমনি। ঙসিদি মমিং লৈরবা কলেজ অমসুং য়ুনিভর্সিতিশিংদসু ফোরেন লেঙ্গ্যুএজ দিপার্টমেণ্ট কয়া হাংদুনা ফোরেন লেঙ্গ্যুএজ তম্বদা মায় ওনশিন্নরকপসু থেংনরি। রিচার্স কয়া তৌনরক্লি লোল অমসুং কলচরদা। লোল য়াম্না খঙবা হৈবা অদুগা হীরম কয়াদা খঙবা হৈবনা মীওইবগী চাওখৎ লম্বেলদা হেন্না তেংবাংলকলি। মমালোলবু ইকায়খুম্নবা জাতি অদুতনা মালেমদা মাংজিল থাবসু ঙম্লক্লি।