পবনকুমারগী ‘জোসেফকী মচা’ স্পিসিএল জুরি মেন্সন এৱার্দ ফংলে
ইম্ফাল, সেপ্তেম্বর ১৭ : রাশিয়াগী কাজানদা পাঙথোকখিবা ২০ শুবা কাজান ইন্তরনেসনেল ফিল্ম ফেস্তিবেলদা মণিপুরগী ফিল্মমেকর হাওবম পবনকুমারগী ফিচর ফিল্ম “জোসেফকী মচা” না লেমজনিংঙাই ওইরবা স্পিসিএল জুরি মেন্সন এৱার্দ ফংলক্তুনা স্তেত অসিগী মিংচৎ পুরকপা ঙমখ্রে।
থা অসিগী ৬ তগী ১১ ফাওবা পাঙথোকখিবা ইন্তরনেসনেল ফিল্ম ফেস্তিবেল অসি পূন্না হিংমিন্নবা অমসুং কলচরগী মরুওইবা হীরমদা মীৎয়েং থম্বগীদমক মশক নাইবা ফেস্তিবেল অমনি। ফেস্তিবেল অসিদা মণিপুরগী শক্নাইরবা ফিল্মমেকর হাওবম পবনকুমারগী ফিল্ম অনী উৎখিবগী মনুংদা “জোসেফকী মচা” অসিসু অমনি। ফিল্ম অসিদা মপা অমনা মচানুপা অমা সিতিদা ফুতবোল মেতচ অমা শান্নবা চৎখ্রবা মতুং দা মাঙখিবদগী থিবদা থেংনরকপা থৌদোকশিংদা য়ূম্ফম ওইরগা শাগৎপা ৱারী শীংবুননি।
ফিল্ম অসিগী খুত্থাংদা হাওবম পবনকুমারান মণিপুরদা হৌজিক থোক্লিবা কাঙলুপকী অমসুং খুন্নাইগী মচোই তাবা মশক অদু উৎলি। ফিল্ম অসি উখ্রুল, কাংপোকপী, তমেংলোং অমদি ইম্ফালদা নম্বনি। ফিল্ম অসিদা চীংদা লৈরিবা মীয়ামগী তম্পাক্তা লৈরিবা মীয়ামগী মরক্তা লৈরিবা ৱাখল্লোনশিং অদু পুথোক্তুনা ঊৎলি। ফিল্ম অসিদা পবনকুমারনা মণিপুরগী লোল অমদি কলচরগী খেন্নবা মশক কয়া অদু ঊৎনবা হোৎনবনি। ফিল্ম অসিদা তাঙ্খুল, মৈতৈলোন, থাদৌ, নেপালি অমদি বিহারী লোল শীজিন্নবগা লোয়ননা তাঙ্খুল ফোক সিঙ্কর রুভেন মসাংবানা লিদ রোল লৌরি। লোল কয়ানা পুনশিল্লগা শেম্বা ফিল্ম অসিনা মণিপুরদা কাঙলুপ কয়ানা অমত্তা ওইনা খুন্দামিন্নরি হায়বদু ঊৎলি।
কাজান ইন্তরনেসনেল ফিল্ম ফেস্তিবেল ২০২৪ অসিদা অপূনবা লৈবাক ৪০ রোমগী ফিল্ম ১৪০ রোম শরুক য়াখি। মসিনা সিনেমাগী খূত্থাংদা কলচরেল এক্সচেঞ্জ তৌবনি। মেন কম্পিতিসনদা শরুক য়াখিবা পবনকুমারগী “জোসেফকী মচা” অসিনা পূক্নিংগী অৱাবা অমসুং মীওইবনা থেংনরিবা অৱাবদগী নান্থোক্নবা মতৌ অদু ঊৎলি। ফেস্তিবেল অদু গালিয়াসাগর কামাল তাতা স্তেত একাদেমি থিয়েতরদা এৱার্দ সিরেমোনি অমা পাঙথোক্তুনা লোইশিনখি। মফম অদুদা ফিল্মমেকর অমসুং ওদিএন্সশিং গী মরক্তা মখোয়গী পুক্নিংদা ফাওবা ৱাফমশিং ফোঙদোক্নহনখি।
মণিপুরী ফিল্ম “জোসেফকী মচা” না স্পিসিএল জুরি মেন্সন এৱার্দ ফংখিবা ফিচর ফিল্ম কেতেগোরি অদুদা বেস্ত ফিচর ফিল্মগী এৱার্দদি রাশিয়ান দিরেক্তর এলেক্সে রোমানোবকী “লিজেন্ত ওব ইতরনেল স্নো” না ফংখি। নেতপেক এৱার্দনা তর্কিগী ফিল্মমেকর ফিক্রেত রেহানগী “গ্লাস কর্তেল” না ফংখি।
মণিপুরদা হৌজিক ওইরিবা লৈতাদবা ফীবম অসিদা হাওবম পবনকুমারবু ইন্তরনেসনেলগী থাক্তা শকখঙলকপা অসিনা মণিপুরগী মীয়ামদা আশা অমা পীবগা লোয়ননা স্তেত অসিদা লাক্লিবা অৱাবশিং অসি শোয়দনমক্কী খূদুম চনবা ঙমগনি হায়বগী ৱাখল্লোন অমদি আশা অমা পীরি।
সোর্স: পোক্নফম
0 কমেন্ট:
কমেন্ট তৌবিয়ু