• 159
• ১৮ই সেপ্টেম্বর ২০২৪ ইং
• Share on:

ত্রিপুরাগী মীথোই-মীহেনবা মণিপুরীশিংদা মনা পীদুনা ইকায়খুম্নখ্রে

ইম্ফাল, সেপ্তেম্বর ১৭ : ত্রিপুরাদা মণিপুরী লোল অমদি কলা-সংস্কৃতি চাওখৎনবা হোৎনবদা অচৌবা থৌদাং লৌরিবা মণিপুরী লিতরেরি এন্দ কলচরেল ফোরাম ত্রিপুরানা তোঙান-তোঙানবা হীরমদা মীথোই-মীহেনবা ত্রিপুরাগী মণিপুরীশিংদা মনা পীদুনা মখোয়বু ইকায়খুম্নখ্রে।

মণিপুরী লিতরেরি এন্দ কলচরেল ফোরাম ত্রিপুরানা শীন্দুনা চহী অসিগী অনীশুবা তাঙ্কক্কী ওইনা মনা-মথুম য়েন্থোকপগী থৌরম অমা হৌখিবা সেপ্তেম্বর ১৫ দা আগরতলাদা শৈরেং শৈদিন্নবগী থৌরমগা লোয়ননা পাঙথোকখ্রে। নজরুল কলাক্ষেত্র কমপ্লেক্স, আগরতলাদা লৈবা সাহিত্য একাদেমী ওদিতোরিয়ামদা পাঙথোকখিবা থৌরম অদুদা ত্রিপুরাগী এম এল এ য়াংলেম বীরজিৎ সিংহনা অথোইবা মীথুংলেন, মণিপুরী লিতরেরি এন্দ কালচারেল ফোরাম ত্রিপুরাগী প্রেসিদেন্ত নিংঙোম্বম বীর সিংহনা থৌরম মপু অমসুং মণিপুরী সাহিত্য পরিষদ ত্রিপুরাগী প্রেসিদেন্ত লাঙ্গোইজম বীরমঙ্গল সিংহনা ইকায়খুম্নরবা মীথুং ওইনা শরুক য়াখি।

থৌরম অদুদা ত্রিপুরাদা পূং-ঈশৈ হিংহন্নবা অমসুং চাওখৎহন্নবা হোৎনবদা মশাগী পুন্সিগী শাংলবা মতম কয়া কত্থোক্তুনা লাকখ্রবা শক্নায়রবা সংস্কৃতি সেবক মাইথেম কিশোরমোহন সিংহদা এম এল এ য়ালেম বীরজিৎনা মণিপুরী লিতরেরি এন্দ কলচরেল ফোরাম ত্রিপুরা লাইফ তাইম এচিবমেন্ত এৱার্দ খূৎশিন্নখি। ত্রিপুরাগী লৈহাওদা মণিপুরী জগোয় অমসুং সাহিত্যগী লমদা মচীন তুমখৎলক্লিবা মথংশীৎনা লৈশাংথেম আশা অমসুং ময়েংবম প্রদয়োৎ সিংহদা খোইস্নাম বঙ্গবীর মেমোরিয়েল য়ঙ তেলেন্ত এৱার্দ লান্থোকখি।

লোয়ননা আই সি এফ এ আই য়ুনিভার্সিতি ত্রিপুরাদগী গোল্ড মেদেলগা লোয়ননা মাস্তর পাস তৌরকখ্রবী ফিজবন অনন্দিতা অমসুং ত্রিপুরা লো কলেজদগী এল এল বি (ওর্নর্স) তা গোল্ড মেদল ফংলবী খাংখ্রাকপম উত্তরা অনীদা রাজকুমার ৱাঙ্গোলসনা নীংশিং মনা পীদুনা ইকায়খুম্নখি। অদুগা হন্দক্তা নাগালেন্দদা পাঙথোকখিবা ৩শুবা নোর্থ ইস্ত নেসনেল গেমস ২০২৪ দা পেনকাক সিলাত (মার্সিয়েল আর্তস) তা সিলভর মেদল ফংলক্লবা নোংশাতাবম সনবুসু ফোরম্না শকখঙ-চে অমসুং লেংয়ানফি খূদোল তমদুনা হরাও-তয়াম্না ওকখি।

থৌরম অদুগী শরুক অমা ওইনা ত্রিপুরাগী নুপী অইবীশিংগী শৈরৈং পাবগী থৌরম অমসু পাঙথোকখি।

সোর্স: পোক্নফম